ਰਿਚਮੰਡ ਵਿਚ ਨਸ਼ਾ ਤਸਕਰੀ ਦੇ ਮਾਮਲੇ ਵਿਚ ਇੱਕ ਮੁਲਜ਼ਮ ਸੁਣਾਈ ਗਈ ਕੈਦ ਦੀ ਸਜ਼ਾ

ਰਿਚਮੰਡ ਵਿਚ ਨਸ਼ਾ ਤਸਕਰੀ ਦੇ ਮਾਮਲੇ ਵਿਚ ਇੱਕ ਮੁਲਜ਼ਮ ਨੂੰ 43 ਮਹੀਨੇ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ। ਪੁਲਿਸ ਨੇ ਕਿਹਾ ਕਿ 9 ਸਤੰਬਰ 2025 ਨੂੰ Su-Kai Chow ਨੇ ਤਸਕਰੀ ਦੇ ਉਦੇਸ਼ ਲਈ ਕੈਨਾਬਿਸ ਅਤੇ ਮੈਥਾਮਫੇਟਾਮਾਈਨ ਰੱਖਣ ਦਾ ਦੋਸ਼ ਕਬੂਲ ਕੀਤਾ, ਜੋ ਹੁਣ ਹਿਰਾਸਤ ਵਿਚ ਆਪਣੀ ਸਜ਼ਾ ਕੱਟ ਰਿਹਾ ਹੈ।

ਰਿਚਮੰਡ ਪੁਲਿਸ ਨੇ ਕਿਹਾ ਕਿ 2021 ਵਿਚ ਉਸ ਦੀ ਆਰਗੇਨਾਈਜ਼ਡ ਕ੍ਰਾਈਮ ਯੂਨਿਟ ਨੇ ਡਰੱਗ ਟ੍ਰੈਫਕਿੰਗ ਕੇਸ ਵਿਚ ਜਾਂਚ ਸ਼ੁਰੂ ਕੀਤੀ ਸੀ, ਜਿਸ ਦੌਰਾਨ ਡੈਮੋਰੇਸਟ ਡਰਾਈਵ ਦੇ 8000 ਬਲਾਕ ਵਿਚ ਇੱਕ ਰਿਹਾਇਸ਼ ਦੀ ਤਲਾਸ਼ੀ ਲਈ ਗਈ ਅਤੇ ਇਨਵੈਸਟੀਗੇਟਰਸ ਨੇ ਪਾਇਆ ਕਿ ਇਸ ਜਗ੍ਹਾ ਦਾ ਇਸਤੇਮਾਲ ਪਾਬੰਦੀਸ਼ੁਦਾ ਨਸ਼ੇ ਦੇ ਡਿਸਟ੍ਰੀਬਿਊਸ਼ਨ ਹੱਬ ਦੇ ਰੂਪ ਵਿਚ ਕੀਤਾ ਜਾ ਰਿਹਾ ਸੀ। 28 ਅਪ੍ਰੈਲ 2022 ਨੂੰ ਪਬਲਿਕ ਪ੍ਰੌਸੀਕਿਊਸ਼ਨ ਸਰਵਿਸ ਆਫ਼ ਕੈਨੇਡਾ ਵਲੋਂ Su-Kai Chow ਸਮੇਤ ਤਿੰਨ ਵਿਅਕਤੀਆਂ ਵਿਰੁੱਧ ਦੋਸ਼ਾਂ ਨੂੰ ਮਨਜ਼ੂਰੀ ਦਿੱਤੀ ਗਈ।

ਪੁਲਿਸ ਨੇ ਕਿਹਾ ਕਿ ਇਸ ਕੇਸ ਵਿਚ ਇੱਕ 39 ਸਾਲਾ ਔਰਤ ਵੀ ਸ਼ਾਮਲ ਸੀ। ਉਥੇ ਹੀ, ਸਜ਼ਾ ਕੱਟ ਰਿਹਾ Su-Kai Chow ਇਸ ਸਮੇਂ 68 ਸਾਲ ਤੋਂ ਉੱਪਰ ਦਾ ਹੈ। ਰਿਚਮੰਡ ਆਰ.ਸੀ.ਐਮ.ਪੀ. ਦੇ ਅਫਸਰ ਇੰਚਾਰਜ ਚੀਫ ਸੁਪਰਡੈਂਟ ਡੇਵ ਚੌਹਾਨ ਨੇ ਕਿਹਾ ਕਿ ਇਸ ਤਰ੍ਹਾਂ ਦੀ ਜਾਂਚ ਅਕਸਰ ਲੰਮੀ ਅਤੇ ਗੁੰਝਲਦਾਰ ਹੁੰਦੀ ਹੈ, ਜਿਨ੍ਹਾਂ ਵਿਚ ਮਹੀਨੇ ਜਾਂ ਸਾਲਾਂ ਤੱਕ ਕੰਮ ਕਰਨਾ ਪੈਂਦਾ ਹੈ।