20.08C Vancouver 20.08C VancouverJun 16, 2025 6:35 PM - The Canadian Press
ਮੈਟਰੋ ਵੈਨਕੂਵਰ ਦੀ ਇੱਕ ਝੀਲ ਵਿਚ ਆਪਣੀ ਮੰਗੇਤਰ ਨਾਲ ਸਵੀਮਿੰਗ ਦੌਰਾਨ ਐਤਵਾਰ ਨੂੰ ਲਾਪਤਾ ਹੋਏ 29 ਸਾਲਾ ਨੌਜਵਾਨ ਦੀ ਪੁਲਿਸ ਨੇ ਮੌਤ ਹੋਣ ਦਾ ਖ਼ਦਸ਼ਾ ਜਤਾਇਆ ਹੈ, ਉਹ ਬਰਨਬੀ ਦਾ ਰਹਿਣ ਵਾਲਾ ਸੀ। ਫਰਸਟ ਰਿਸਪੋਂਡਰ ਨੂੰ ਸ਼ਾਮ ਕਰੀਬ 6.30 ਵਜੇ ਸਾਈਪ੍ਰਸ ਪ੍ਰੋਵਿੰਸ਼ੀਅਲ ਪਾਰਕ ਨੇੜੇ ਕੈਬਿਨ ਝੀਲ ਵਿਚ ਨੌਜਵਾਨ ਦੇ ਡੁੱਬਣ ਦੀ ਰਿਪੋਰਟ ਮਿਲੀ ਸੀ।
ਵੈਸਟ ਵੈਨਕੂਵਰ ਪੁਲਿਸ ਦੇ ਸਾਰਜੈਂਟ ਕ੍ਰਿਸ ਬਿਗਲੈਂਡ ਨੇ ਸੋਮਵਾਰ ਨੂੰ ਬਿਆਨ ਵਿਚ ਕਿਹਾ ਕਿ ਕਈ ਚਸ਼ਮਦੀਦਾਂ ਨੇ ਨੌਜਵਾਨ ਨੂੰ ਮੁਸੀਬਤ ਵਿਚ ਤੇ ਉਸ ਦੀ ਸਾਥੀ ਨੂੰ ਉਸ ਦੀ ਮਦਦ ਕਰਨ ਦੀ ਕੋਸ਼ਿਸ਼ ਕਰਦੇ ਦੇਖਿਆ ਪਰ ਬਦਕਿਸਮਤੀ ਨਾਲ ਉਹ ਪਾਣੀ ਦੀ ਸਤ੍ਹਾ ਤੋਂ ਹੇਠਾਂ ਖਿਸਕ ਗਿਆ ਅਤੇ ਉਦੋਂ ਤੋਂ ਨਹੀਂ ਦੇਖਿਆ ਗਿਆ।
ਉਨ੍ਹਾਂ ਕਿਹਾ ਕਿ ਬਚਾਅ ਟੀਮਾਂ ਵਲੋਂ ਹੁਣ ਉਸ ਦੀ ਬਾਡੀ ਬਰਾਮਦ ਕਰਨ ਲਈ ਕੰਮ ਕੀਤਾ ਜਾ ਰਿਹਾ ਹੈ। ਪੁਲਿਸ ਨੇ ਕਿਹਾ ਕਿ ਨੌਜਵਾਨ ਦੇ ਪਰਿਵਾਰ ਨੂੰ ਉਸ ਦੀ ਮੌਤ ਬਾਰੇ ਸੂਚਿਤ ਕਰ ਦਿੱਤਾ ਗਿਆ ਹੈ ਅਤੇ ਲਾਸ਼ ਬਰਾਮਦ ਹੋਣ ਤੋਂ ਬਾਅਦ ਜਾਂਚ ਬੀ.ਸੀ. ਕੋਰੋਨਰ ਸਰਵਿਸ ਨੂੰ ਸੌਂਪ ਦਿੱਤੀ ਜਾਵੇਗੀ।
