14.37C Vancouver 14.37C VancouverOct 18, 2024 4:32 PM - Connect Newsroom - Debby Rai with files from The Canadian Press
ਕੇਂਦਰੀ ਅਤੇ ਮੈਨੀਟੋਬਾ ਸਰਕਾਰਾਂ ਨੇ ਸਕੂਲਾਂ ਵਿਚ ਭੋਜਨ ਸਹਾਇਤਾ ਪ੍ਰੋਗਰਾਮ ਵਧਾਉਣ ਲਈ ਇਕ ਨਵਾਂ ਸਮਝੌਤਾ ਸਾਈਨ ਕੀਤਾ ਹੈ, ਜਿਸਦਾ ਉਦੇਸ਼ ਵਿਦਿਆਰਥੀਆਂ ਲਈ ਪੋਸ਼ਟਿਕ ਖੁਰਾਕ ਅਤੇ ਸੁਰੱਖਿਆ ਯਕੀਨੀ ਬਣਾਉਣਾ ਹੈ।
ਇਸ ਤਹਿਤ, ਮੈਨੀਟੋਬਾ ਨੂੰ ਅਗਲੇ ਤਿੰਨ ਸਾਲਾਂ ਦੌਰਾਨ 17.2 ਮਿਲੀਅਨ ਡਾਲਰ ਦੀ ਮਦਦ ਮਿਲੇਗੀ, ਜਿਸ ਨਾਲ ਘੱਟ ਆਮਦਨ ਅਤੇ ਸਮਾਜਿਕ ਤੌਰ ’ਤੇ ਪਿੱਛੜੇ ਖੇਤਰਾਂ ਦੇ ਸਕੂਲਾਂ ਵਿਚ ਖਾਣੇ ਤੇ ਨਾਸ਼ਤੇ ਦੇ ਪ੍ਰੋਗਰਾਮ ਚਲਾਏ ਜਾਣਗੇ।
ਇਹ ਫੰਡ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਵੱਲੋਂ 2024 ਦੇ ਬਜਟ ਵਿਚ ਐਲਾਨੇ ਪੰਜ ਸਾਲਾਂ ਦੇ 1 ਬਿਲੀਅਨ ਡਾਲਰ ਦੇ ਕੌਮੀ ਸਕੂਲ ਫੂਡ ਪ੍ਰੋਗਰਾਮ ਦਾ ਹਿੱਸਾ ਹਨ — ਜੋ ਕਿ ਫੈਡਰਲ ਐਨ.ਡੀ.ਪੀ. ਵੱਲੋਂ ਕੀਤੇ ਦਬਾਅ ਦੇ ਬਾਅਦ ਸ਼ੁਰੂ ਕੀਤਾ ਗਿਆ ਸੀ।
ਡਿਪਟੀ ਪ੍ਰਧਾਨ ਮੰਤਰੀ ਕ੍ਰਿਸਟੀਆ ਫ੍ਰੀਲੈਂਡ ਨੇ ਕਿਹਾ ਕਿ ਇਹ ਸਮਝੌਤਾ ਮੈਨੀਟੋਬਾ ਦੀ ਆਪਣੀ ਨਿਊਟ੍ਰੀਸ਼ਨ ਯੋਜਨਾ ਨੂੰ ਹੋਰ ਮਜ਼ਬੂਤ ਕਰਦਾ ਹੈ, ਜਿਸ ਲਈ ਸੂਬਾਈ ਐਨ.ਡੀ.ਪੀ. ਸਰਕਾਰ ਨੇ ਇਸ ਸਾਲ 30 ਮਿਲੀਅਨ ਡਾਲਰ ਰਾਖਵੇਂ ਰੱਖੇ ਹਨ।
ਮੈਨੀਟੋਬਾ ਇਸ ਤਰ੍ਹਾਂ ਦੀ ਸਾਂਝ ਵਿਚ ਸ਼ਾਮਲ ਹੋਣ ਵਾਲਾ ਦੂਜਾ ਸੂਬਾ ਬਣ ਗਿਆ ਹੈ। ਇਸ ਤੋਂ ਪਹਿਲਾਂ ਨਿਊਫਾਊਂਡਲੈਂਡ ਅਤੇ ਲਾਬਰਡੋਰ ਨੇ ਪਿਛਲੇ ਮਹੀਨੇ ਇਹ ਸਮਝੌਤਾ ਸਾਈਨ ਕੀਤਾ ਸੀ।
ਐਡਮੰਟਨ, ਸਰੀ ਅਤੇ ਬ੍ਰੈਂਪਟਨ ਵਰਗੇ ਸ਼ਹਿਰਾਂ ਵਿਚ ਕਮਿਊਨਿਟੀ ਆਗੂਆਂ ਨੇ ਇਸ ਪਹਿਲ ਨੂੰ ਬੱਚਿਆਂ ਵਿਚ ਭੁੱਖ ਤੇ ਮਹਿੰਗਾਈ ਨਾਲ ਜੂਝ ਰਹੇ ਪਰਿਵਾਰਾਂ ਲਈ ਰਾਹਤਕਾਰੀ ਕਦਮ ਕਰਾਰ ਦਿੱਤਾ ਹੈ।
