ਜੰਗਲੀ ਅੱਗ ਕਾਰਨ ਮੈਨੀਟੋਬਾ ਸ਼ਹਿਰ ਨੂੰ ਕਰਵਾਇਆ ਜਾਵੇਗਾ ਖਾਲੀ

ਕੈਨੇਡਾ ਦੇ ਪੱਛਮੀ ਸੂਬਿਆਂ ਵਿਚ ਬਲ ਰਹੀਆਂ ਅੱਗਾਂ ਵਿਚਕਾਰ ਮੈਨੀਟੋਬਾ ਦੇ ਟਾਊਨ ਲਿਨ ਲੇਕ ਦੇ ਸੈਂਕੜੇ ਨਿਵਾਸੀਆਂ ਨੂੰ ਲਾਜ਼ਮੀ ਤੌਰ 'ਤੇ ਘਰ ਛੱਡਣ ਦੇ ਆਦੇਸ਼ ਦਿੱਤੇ ਗਏ ਹਨ ਕਿਉਂਕਿ ਨੇੜੇ ਦੇ ਜੰਗਲ ਵਿਚ ਲੱਗੀ ਅੱਗ ਕਾਰਨ ਕਮਿਊਨਿਟੀ ਦੀ ਬਿਜਲੀ ਸਪਲਾਈ ਪ੍ਰਭਾਵਿਤ ਹੋਣ ਦਾ ਖ਼ਤਰਾ ਮੰਡਰਾ ਗਿਆ ਹੈ। ਨਿਕਾਸੀ ਦੀ ਕਾਰਵਾਈ ਸ਼ੁੱਕਰਵਾਰ ਤੋਂ ਸ਼ੁਰੂ ਹੋਈ ਹੈ ਪਰ ਅਧਿਕਾਰੀਆਂ ਨੇ ਇਹ ਸਮਾਂ-ਸੀਮਾ ਨਹੀਂ ਦੱਸੀ ਕਿ ਲੋਕਾਂ ਨੂੰ ਕਦੋਂ ਤੱਕ ਆਪਣੇ ਘਰਾਂ ਤੋਂ ਬਾਹਰ ਰਹਿਣਾ ਹੋਵੇਗਾ।

ਉਨ੍ਹਾਂ ਦਾ ਕਹਿਣਾ ਹੈ ਕਿ ਜੇ ਜੰਗਲ ਦੀ ਅੱਗ ਮੈਨੀਟੋਬਾ ਹਾਈਡ੍ਰੋ ਟ੍ਰਾਂਸਮਿਸ਼ਨ ਲਾਈਨਾਂ ਨੂੰ ਪ੍ਰਭਾਵਿਤ ਕਰਦੀ ਹੈ ਤਾਂ ਨਿਵਾਸੀਆਂ ਨੂੰ ਘੱਟੋ-ਘੱਟ ਇੱਕ ਮਹੀਨੇ ਤੱਕ ਬਿਜਲੀ ਬੰਦ ਰਹਿਣ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ। ਟਾਊਨ ਦੇ ਅਧਿਕਾਰੀਆਂ ਮੁਤਾਬਕ, ਲਿਨ ਲੇਕ ਤੋਂ ਲਗਭਗ 20 ਕਿਲੋਮੀਟਰ ਸਾਊਥ ਵੈਸਟ ਵਿਚ ਅੱਗ ਬਲ ਰਹੀ ਹੈ।

ਨਿਵਾਸੀਆਂ ਲਈ ਲਿਨ ਲੇਕ ਤੋਂ ਕਰੀਬ 1,100 ਕਿਲੋਮੀਟਰ ਸਾਊਥ ਵਿਚ ਬ੍ਰੈਂਡਨ ਸ਼ਹਿਰ ਵਿਚ ਰਿਸੈਪਸ਼ਨ ਸੈਂਟਰ ਸਥਾਪਤ ਕੀਤਾ ਗਿਆ ਹੈ। ਮੈਨੀਟੋਬਾ ਵਿਚ ਇਸ ਸਮੇਂ 60 ਥਾਵਾਂ 'ਤੇ ਜੰਗਲ ਵਿਚ ਅੱਗ ਲੱਗੀ ਹੋਈ ਹੈ, ਜਿਨ੍ਹਾਂ ਵਿਚੋਂ 17 ਨੂੰ ਕਾਬੂ ਤੋਂ ਬਾਹਰ ਹਨ।