ਮੈਪਲ ਰਿਜ ਦੇ ਘਰ ਵਿੱਚ ਝਗੜੇ ਤੋਂ ਬਾਅਦ ਹੋਏ ਕਤਲ ਦੇ ਸ਼ੱਕੀ 'ਤੇ ਲੱਗੇ ਦੋਸ਼

ਮੈਪਲ ਰਿਜ ਦੇ ਇੱਕ ਘਰ ਵਿਚ 49 ਸਾਲਾ ਵਿਅਕਤੀ ਦੇ ਹੋਏ ਕਤਲ ਦੇ ਮਾਮਲੇ ਵਿਚ ਜਾਂਚਕਰਤਾਵਾਂ ਨੇ ਇੱਕ ਹਫ਼ਤੇ ਬਾਅਦ ਇੱਕ ਸ਼ੱਕੀ ਵਿਅਕਤੀ ਵਿਰੁੱਧ ਕਤਲ ਦਾ ਚਾਰਜ ਲਗਾਇਆ ਹੈ। ਇੰਟੀਗ੍ਰੇਟਿਡ ਹੋਮੀਸਾਈਡ ਇਨਵੈਸਟੀਗੇਸ਼ਨ ਟੀਮ ਨੇ ਮੰਗਲਵਾਰ ਨੂੰ ਇਸ ਮਾਮਲੇ ਬਾਰੇ ਅਪਡੇਟ ਦਿੰਦਿਆਂ ਦੱਸਿਆ ਕਿ ਇਹ ਘਟਨਾ 16 ਮਾਰਚ ਨੂੰ ਸ਼ਾਮ ਲਗਭਗ 7:30 ਵਜੇ 110 ਐਵੇਨਿਊ ਦੇ 23700 ਬਲੌਕ ਵਿਚ ਵਾਪਰੀ ਸੀ।

ਪੁਲਿਸ ਨੂੰ ਘਟਨਾ ਸਥਾਨ 'ਤੇ ਇੱਕ ਵਿਅਕਤੀ ਗੰਭੀਰ ਜ਼ਖ਼ਮੀ ਹਾਲਤ ਵਿਚ ਮਿਲਿਆ ਸੀ, ਜਿਸ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ। ਪੁਲਿਸ ਨੇ ਮ੍ਰਿਤਕ ਦੀ ਪਛਾਣ ਅਜੇ ਜਨਤਕ ਨਹੀਂ ਕੀਤੀ ਹੈ। ਪੁਲਿਸ ਵੱਲੋਂ 45 ਸਾਲਾ ਡਾਰਸੀ ਰੌਬ ਨੂੰ ਘਟਨਾ ਦੇ ਅਗਲੇ ਦਿਨ ਗ੍ਰਿਫ਼ਤਾਰ ਕਰ ਲਿਆ ਗਿਆ ਸੀ।

ਸ਼ੁਰੂਆਤ ਵਿਚ ਉਸ 'ਤੇ ਸਿਰਫ਼ ਹਮਲੇ ਦਾ ਕੇਸ ਦਰਜ ਸੀ ਪਰ ਜਾਂਚ ਤੋਂ ਬਾਅਦ ਸੋਮਵਾਰ ਨੂੰ ਉਸ ਵਿਰੁੱਧ ਕਤਲ ਦੇ ਚਾਰਜ ਲਗਾਏ ਗਏ। IHIT ਦੀ ਸਾਰਜੈਂਟ ਸਾਰਜੈਂਟ ਫਰੈਡਾ ਫੋਂਗ ਅਨੁਸਾਰ, ਸਬੂਤਾਂ ਦੇ ਆਧਾਰ 'ਤੇ ਬੀ.ਸੀ. ਪ੍ਰੌਸੀਕਿਊਸ਼ਨ ਸਰਵਿਸ ਨੂੰ ਵਾਧੂ ਜਾਣਕਾਰੀ ਸੌਂਪੀ ਗਈ ਸੀ। ਪੁਲਿਸ ਨੇ ਸਪੱਸ਼ਟ ਕੀਤਾ ਹੈ ਕਿ ਮ੍ਰਿਤਕ ਅਤੇ ਮੁਲਜ਼ਮ ਇੱਕ-ਦੂਜੇ ਨੂੰ ਪਹਿਲਾਂ ਤੋਂ ਜਾਣਦੇ ਸਨ।