ਮੇਅਰ ਬ੍ਰੈਂਡਾ ਲੌਕ ਨੇ ਰੀਮੈਂਬਰੈਂਸ ਡੇਅ 'ਤੇ ਸਰੀ 'ਚ ਹੋ ਰਹੇ ਸਮਾਗਮਾਂ ਦੇ ਵੇਰਵੇ ਕੀਤੇ ਸਾਂਝੇ, ਲੋਕਾਂ ਨੂੰ ਪਰਿਵਾਰਾਂ ਸਮੇਤ ਪਹੁੰਚਣ ਦਾ ਦਿੱਤਾ ਸੱਦਾ

ਸਿਟੀ ਆਫ ਸਰੀ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਰੀਮੈਂਬਰੈਂਸ ਡੇਅ ਮੌਕੇ ਕੁਝ ਸਮਾਂ ਕੱਢ ਕੇ ਉਸ ਦਿਨ ਹੋ ਰਹੇ ਰੀਮੈਂਬਰੈਂਸ ਡੇਅ ਸਮਾਗਮਾਂ ਦਾ ਹਿੱਸਾ ਬਣਿਆ ਜਾਵੇ।

ਸਰੀ ਦੇ ਵਿੱਚ ਰੀਮੈਂਬਰੈਂਸ ਡੇਅ ਮੌਕੇ 17610 56A ਐਵੀਨਿਊ 'ਤੇ ਵੈਟਰਨਸ ਸਕਵੇਅਰ, 16671 ਓਲਡ ਮੈਕਲੈਲਨ ਰੋਡ 'ਤੇ ਸਰੀ ਸੈਂਟਰ ਸਿਮਿਟਰੀ, 13633 ਗਰੌਸਵੈਨਰ ਰੋਡ 'ਤੇ ਵੌਲੀ ਸੈਨੋਟੈਫ, ਅਤੇ 2643 128 ਸਟ੍ਰੀਟ 'ਤੇ ਸਥਿਤ ਰਾਇਲ ਕਨੇਡੀਅਨ ਲਿਜਨ ਕ੍ਰੀਸੈਂਟ ਬਰਾਂਚ 'ਤੇ ਰੀਮੈਂਬਰੈਂਸ ਡੇਅ ਦੇ ਮੌਕੇ ਸਮਾਗਮ ਹੋਣਗੇ।

ਇਹ ਸਮਾਗਮ ਸਵੇਰ 10 ਵਜੇ ਤੋਂ ਦੁਪਹਿਰ 1 ਵਜੇ ਦਰਮਿਆਨ ਹੋਣਗੇ ਅਤੇ ਟਰੈਡੀਸ਼ਨਲ ਢੰਗ ਨਾਲ ਸਵੇਰ 11 ਵਜੇ 2 ਮਿੰਟ ਦਾ ਮੌਨ ਰੱਖਿਆ ਜਾਵੇਗਾ।

ਮੇਅਰ ਬ੍ਰੈਂਡਾ ਲੌਕ ਨੇ ਕਿਹਾ ਕਿ ਹਰ ਸਾਲ ਸਰੀ ਦੇ ਨਿਵਾਸੀ ਇਕੱਤਰ ਹੋਂਦੇ ਹਨ ਤਾਂ ਜੋ ਦੇਸ਼ ਦੀ ਸੇਵਾ ਕਰਨ ਵਾਲੇ ਮੈਂਬਰਾਂ ਨੂੰ ਯਾਦ ਕੀਤਾ ਜਾ ਸਕੇ ਅਤੇ ਉਨ੍ਹਾਂ ਦਾ ਸਨਮਾਨ ਕੀਤਾ ਜਾ ਸਕੇ।

ਉਨ੍ਹਾਂ ਕਿਹਾ ਕਿ 'ਆਓ ਇਸ ਸ਼ੁੱਕਰਵਾਰ ਆਪਾਂ ਸਭ ਪਰਿਵਾਰਾਂ ਸਮੇਤ ਸਮਾਂ ਕੱਢੀਏ ਅਤੇ ਉਨ੍ਹਾਂ ਲੋਕਾਂ ਨੂੰ ਯਾਦ ਕਰੀਏ ਜਿੰਨਾ ਦੇਸ਼ ਲਈ ਸਭ ਤੋਂ ਵੱਡੀ ਕੁਰਬਾਨੀ ਦਿੱਤੀ।'

ਸ਼ਹਿਰ ਵਿੱਚ ਹੋ ਰਹੇ ਰੀਮੈਂਬਰੈਂਸ ਡੇਅ ਸਮਾਗਮਾਂ 'ਚ ਸ਼ਾਮਿਲ ਹੋਣ ਲਈ ਮੇਅਰ ਬ੍ਰੈਂਡਾ ਲੌਕ ਨੇ ਇਲਾਕੇ ਦੇ ਲੋਕਾਂ ਨੂੰ ਉਤਸ਼ਾਹਤ ਕੀਤਾ।