ਖਸਰੇ ਦੇ ਮਾਮਲਿਆਂ ਵਿੱਚ ਵਾਧਾ ਚਿੰਤਾਜਨਕ': ਸਿਹਤ ਅਧਿਕਾਰੀ

ਕਿਊਬੈਕ ਅਤੇ ਓਨਟਾਰੀਓ ਵਿੱਚ ਖਸਰੇ ਦੇ ਦੋ ਤਾਜ਼ਾ ਕੇਸਾਂ ਨੇ ਕਨੇਡੀਅਨ ਸਿਹਤ ਅਧਿਕਾਰੀਆਂ ਵਿੱਚ ਚਿੰਤਾ ਵਧਾ ਦਿੱਤੀ ਹੈ। ਅਧਿਕਾਰੀਆਂ ਨੇ ਕਿਹਾ ਕਿ ਇਹ ਸੰਕਰਮਣ ਨਾ ਤਾਂ ਯਾਤਰਾ ਨਾਲ ਜੁੜੇ ਸਨ ਅਤੇ ਨਾ ਹੀ ਜਾਣੇ-ਪਛਾਣੇ ਸੰਪਰਕਾਂ ਨਾਲ, ਜਿਸ ਤੋਂ ਪਤਾ ਲੱਗਦਾ ਹੈ ਕਿ ਬਿਮਾਰੀ ਪਹਿਲਾਂ ਹੀ ਕੁਝ ਕਮਿਊਨਿਟੀਆਂ ਵਿੱਚ ਫੈਲ ਰਹੀ ਹੋ ਸਕਦੀ ਹੈ।

ਹੁਣ ਤੱਕ ਦੇਸ਼ ਭਰ ਵਿੱਚ ਘੱਟੋ-ਘੱਟ ਨੌਂ ਕੇਸ ਪੁਸ਼ਟੀਕਰਤ ਹੋ ਚੁੱਕੇ ਹਨ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਵੱਡੇ ਪੱਧਰ 'ਤੇ ਫੈਲਣ ਦਾ ਖ਼ਤਰਾ ਘੱਟ ਹੈ, ਪਰ ਉਹ ਚੇਤਾਵਨੀ ਦੇ ਰਹੇ ਹਨ ਕਿ ਜਿੱਥੇ ਟੀਕਾਕਰਨ ਦਰ ਘੱਟ ਹੈ, ਉੱਥੇ ਖਤਰਾ ਕਾਇਮ ਹੈ।

ਫੈਡਰਲ ਡਾਟਾ ਦਿਖਾਉਂਦਾ ਹੈ ਕਿ ਪਿਛਲੇ ਦਹਾਕੇ ਵਿੱਚ ਟੀਕਾਕਰਨ ਕਵਰੇਜ ਘਟੀ ਹੈ – 2021 ਵਿੱਚ ਸਿਰਫ਼ 79 ਫੀਸਦੀ ਬੱਚਿਆਂ ਨੇ ਖਸਰੇ ਦੇ ਦੋਵੇਂ ਟੀਕੇ ਲਏ, ਜਦਕਿ 2017 ਵਿੱਚ ਇਹ ਦਰ 87 ਫੀਸਦੀ ਸੀ। ਇਸ ਘਾਟੇ ਦਾ ਮਤਲਬ ਹੈ ਕਿ ਲਗਭਗ ਹਰ 10 ਵਿੱਚੋਂ 2 ਬੱਚਿਆਂ ਕੋਲ ਪੂਰੀ ਸੁਰੱਖਿਆ ਨਹੀਂ ਹੈ।

ਸਰੀ ਦੇ ਬਾਲ ਰੋਗ ਵਿਸ਼ੇਸ਼ਗਿਆ ਡਾ. ਪਰਗਟ ਭੁਰਜੀ ਨੇ Connect Newsroom ਨੂੰ ਦੱਸਿਆ ਕਿ ਘਟਦੀ ਟੀਕਾਕਰਨ ਦਰ ਕਮਿਊਨਿਟੀਆਂ ਨੂੰ ਖਤਰੇ ਵਿੱਚ ਛੱਡ ਸਕਦੀ ਹੈ। ਉਨ੍ਹਾਂ ਕਿਹਾ, “ਖਸਰਾ ਸਭ ਤੋਂ ਤੇਜ਼ੀ ਨਾਲ ਫੈਲਣ ਵਾਲੇ ਵਾਇਰਸਾਂ ਵਿੱਚੋਂ ਇੱਕ ਹੈ। ਟੀਕਾਕਰਨ ਦਰ ਵਿੱਚ ਥੋੜ੍ਹੀ ਵੀ ਘਟੋਤਰੀ ਫੈਲਾਅ ਲਈ ਮੌਕਾ ਪੈਦਾ ਕਰ ਸਕਦੀ ਹੈ।”

ਇਹ ਚਿੰਤਾ ਉਸ ਵੇਲੇ ਸਾਹਮਣੇ ਆਈ ਹੈ ਜਦੋਂ ਐਂਗਸ ਰੀਡ ਇੰਸਟੀਚਿਊਟ ਦੇ ਨਵੇਂ ਸਰਵੇਖਣ ਵਿੱਚ ਪਤਾ ਲੱਗਾ ਕਿ ਕਨੇਡਾ ਵਿੱਚ ਹਰ 6 ਵਿੱਚੋਂ 1 ਮਾਤਾ–ਪਿਤਾ ਬਚਪਨ ਦੇ ਟੀਕਾਕਰਨ ਦੇ ਵਿਰੋਧੀ ਹਨ। ਸਿਹਤ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਭਰੋਸਾ ਮੁੜ ਬਣਾਉਣ ਅਤੇ ਹਿਰਡ ਇਮਿਊਨਿਟੀ ਕਾਇਮ ਰੱਖਣ ਲਈ ਸਿੱਖਿਆ ਮੁਹਿੰਮਾਂ ਲਾਜ਼ਮੀ ਹੋਣਗੀਆਂ।