17.87C Vancouver 17.87C VancouverMay 28, 2020 2:46 AM -
ਗ੍ਰੀਸ ਦੇ ਕੋਲ ਸਮੁੰਦਰ 'ਚ ਦੁਰਘਟਨਾ ਦਾ ਸ਼ਿਕਾਰ ਹੋਏ ਹੈਲੀਕਾਪਟਰ 'ਤੇ ਸਵਾਰ, ਜਾਨ ਗਵਾਉਣ ਵਾਲੇ ਕਨੇਡੀਅਨ ਆਰਮਡ ਫੋਰਸਿਜ਼ ਦੇ ਕੁਝ ਹੋਰ ਮੈਂਬਰਾਂ ਦੇ ਮ੍ਰਿਤ ਸ਼ਰੀਰ ਮਿਲੇ ਹਨ।
ਇਹ ਅਵਸ਼ੇਸ਼ ਅੱਜ ਸਵੇਰੇ ਮਿਲਣ ਦੀਆਂ ਖਬਰਾਂ ਹਨ। ਕਨੇਡੀਅਨ ਮਿਲਟਰੀ ਅਤੇ ਅਮਰੀਕੀ ਨੇਵੀ ਦੀਆਂ ਭਾਲ ਅਤੇ ਰਿਕਵਰੀ ਟੀਮਾਂ ਵੱਲੋਂ ਇੱਕ ਰਿਮੋਟ ਉਪਕਰਣ ਨਾਲ ਚਲਾਏ ਜਾਣ ਵਾਲਾ ਵਾਹਨ, ਸਮੁੰਦਰ 'ਚ ਕਰੀਬ 3,000 ਮੀਟਰ ਦੀ ਗਹਿਰਾਈ 'ਚ ਉਤਾਰਿਆ ਗਿਆ।
ਇਸੇ ਦਰਮਿਆਨ ਹੈਲੀਕਾਪਟਰ ਦਾ ਕੁਝ ਮਲਬਾ ਅਤੇ ਜਾਨ ਗਵਾਉਣ ਵਾਲੇ ਮੈਂਬਰਾਂ ਦੇ ਮ੍ਰਿਤ ਸ਼ਰੀਰ ਮਿਲਣ ਦੀਆਂ ਖਬਰਾਂ ਹਨ।
ਕਰੀਬ 10 ਦਿਨ ਪਹਿਲਾਂ ਜਾਣਕਾਰੀ ਸਾਂਝੀ ਕੀਤੀ ਗਈ ਸੀ ਕਿ ਗ੍ਰੀਸ ਕੋਲ ਕ੍ਰੈਸ਼ ਹੋਏ ਕਨੇਡੀਅਨ ਹੈਲੀਕਾਪਟਰ ਦੀ ਭਾਲ ਲਈ ਹੁਣ ਕਨੇਡੀਅਨ ਆਰਮਡ ਫੋਰਸਿਜ਼ ਵੱਲੋਂ ਅਮਰੀਕੀ ਮਿਲਟਰੀ ਦੀ ਮਦਦ ਲਈ ਜਾ ਰਹੀ ਹੈ।
ਗ੍ਰੀਸ ਦੇ ਸਮੁੰਦਰੀ ਤਟਾਂ ਕੋਲ ਆਇਓਨੀਅਨ ਸਮੁੰਦਰ 'ਚ ਕਨੇਡੀਅਨ ਨੇਟੋ ਹੈਲੀਕੌਪਟਰ 29 ਅਪ੍ਰੈਲ ਨੂੰ ਕ੍ਰੈਸ਼ ਹੋ ਗਿਆ ਸੀ।
ਇਸ 'ਤੇ ਸਵਾਰ 6 ਸਰਵਿਸ ਮੈਂਬਰਾਂ ਵਿੱਚੋਂ ਸਿਰਫ ਦੋ ਦੇ ਹੀ ਅਵਸ਼ੇਸ਼ ਮਿਲ ਸਕੇ ਸਨ। ਚਾਰ ਅਫਸਰਾਂ ਦੇ ਅਵਸ਼ੇਸ਼ ਅਤੇ ਹੈਲੀਕਾਪਟਰ ਦੇ ਮਲਬੇ ਸੰਬੰਧੀ ਭਾਲ ਕੀਤੀ ਜਾ ਰਹੀ ਸੀ।
ਚਾਰੇ ਲਾਪਤਾ ਅਫ਼ਸਰਾਂ ਨੂੰ ਮ੍ਰਿਤ ਮੰਨ ਲਿਆ ਗਿਆ ਸੀ।
ਇਸ ਤੋਂ ਪਹਿਲਾਂ ਵਾਇਸ ਅਤੇ ਫਲਾਈਟ ਡਾਟਾ-ਰਿਕਾਰਡਰ ਦੀ ਖੋਜ ਹੋ ਚੁੱਕੀ ਸੀ, ਪਰ ਹੈਲੀਕਾਪਟਰ ਦਾ ਮੁੱਖ ਮਲਬਾ ਕਰੀਬ 3,000 ਮੀਟਰ ਡੂੰਘੇ ਪਾਣੀਆਂ 'ਚ ਕਿਸੇ ਜਗ੍ਹਾ 'ਤੇ ਪਿਆ ਸੀ, ਜਿਸ ਦੀ ਭਾਲ ਲਈ ਕੋਸ਼ਿਸ਼ਾਂ ਜਾਰੀ ਸਨ।
ਜਾਨ ਗਵਾਉਣ ਵਾਲੇ ਸਰਵਿਸ ਮੈਂਬਰਾਂ 'ਚ ਕੈਪਟਨ ਕੇਵਿਨ ਹੈਗਨ, ਕੈਪਟਨ ਬ੍ਰੈਂਡਨ ਈਅਨ ਮੈਕਡੌਨਲਡ, ਕੈਪਟਨ ਮੈਕਸਿਮ ਮੈਰੀਨ-ਮੌਰੀਨ, ਸਬ ਲੈਫਟੀਨੈਂਟ ਮੈਥਿਊ ਪਾਈਕ ਅਤੇ ਮਾਸਟਰ ਕੌਰਪੋਰਲ ਮੈਥਿਊ ਕਜ਼ਨਸ ਸ਼ਾਮਿਲ ਸਨ।
ਸਬ-ਲੈਫਟੀਨੈਂਟ ਐਬੀਗੇਲ ਕੌਬਰੋ ਦਾ ਮ੍ਰਿਤ ਸ਼ਰੀਰ ਘਟਨਾ ਤੋਂ ਬਾਅਦ ਮਿਲ ਗਿਆ ਸੀ।
