ਔਂਟੈਰੀਓ ਦੇ ਪੰਜ ਲੌਂਗ-ਟਰਮ ਕੇਅਰ ਹੋਮਜ਼ 'ਤੇ ਮਿਲਟਰੀ ਰਿਪੋਰਟ ਨੇ ਖੜੇ ਕੀਤੇ ਗੰਭੀਰ ਸਵਾਲ

ਔਂਟੈਰੀਓ ਦੇ ਪੰਜ ਲੌਂਗ ਟਰਮ ਕੇਅਰ ਹੋਮਜ਼ ਬਾਰੇ ਇੱਕ ਮਿਲਟਰੀ ਰਿਪੋਰਟ ਨੇ ਕੁਝ ਵੱਡੇ ਸਵਾਲ ਖੜੇ ਕੀਤੇ ਹਨ, ਜਿੰਨਾ ਨੂੰ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਵੀ 'ਬੇਹੱਦ ਪ੍ਰੇਸ਼ਾਨ' ਕਰਨ ਵਾਲਾ ਦੱਸਿਆ ਹੈ।

ਕੋਵਿਡ-19 ਦੇ ਪਾਜ਼ਿਟਿਵ ਮਰੀਜ਼ਾਂ ਨੂੰ ਇਸ ਬਿਮਾਰੀ ਤੋਂ ਬਚੇ ਰਹਿਣ ਵਾਲੇ ਲੋਕਾਂ ਦੇ ਨਾਲ ਠਹਿਰਾਉਣਾ, ਕਮਰਿਆਂ 'ਚ ਕੀੜੇ-ਮਕੌੜੇ ਹੋਣਾ, ਰੈਜ਼ੀਡੈਂਟਸ ਨੂੰ ਜ਼ਬਰਦਸਤੀ ਫੀਡ (feed) ਕਰਨਾ ਜਿਸ ਕਾਰਨ ਰੈਜ਼ੀਡੈਂਟਸ ਨੂੰ ਚੋਕਿੰਗ (choking) ਤੱਕ ਹੋਈ, ਜਿਹੇ ਇਲਜ਼ਾਮ ਇਨ੍ਹਾਂ ਕੇਅਰ ਹੋਮਜ਼ 'ਤੇ ਲਗਾਏ ਗਏ ਹਨ।

ਕਨੇਡੀਅਨ ਆਰਮਡ ਫੋਰਸਿਜ਼ ਦੇ ਮੈਂਬਰਾਂ ਵੱਲੋਂ ਲਗਾਏ ਗਏ ਇਲਜ਼ਾਮਾਂ 'ਚ ਕੋਵਿਡ-19 ਦੇ ਮਰੀਜ਼ਾਂ ਨੂੰ ਇਕੱਲੇ 'ਚ ਰੱਖਣ 'ਚ ਨਾਕਾਮ ਹੋਣਾ, ਅਤੇ ਉਨ੍ਹਾਂ ਨੂੰ ਕਮਰਿਆਂ ਤੋਂ ਬਾਹਰ ਘੁੰਮਦੇ ਰਹਿਣ ਦੇਣ ਦੀ ਇਜਾਜ਼ਤ ਹੋਣ ਜਿਹੇ ਇਲਜ਼ਾਮ ਵੀ ਸ਼ਾਮਿਲ ਹਨ।

ਇੱਕ ਕੇਅਰ ਹੋਮ 'ਚ ਮਿਲਟਰੀ ਨੇ ਕਮਰਿਆਂ 'ਚ ਫੀਕਲ ਕੰਟੈਮੀਨੇਸ਼ਨ (fecal contamination), ਕੌਕਰੋਚ ਹੋਣਾ, ਰੈਜ਼ੀਡੈਂਟਸ ਨੂੰ ਕਈ ਹਫ਼ਤੇ ਤੱਕ ਨਾ ਨਹਿਲੌਣਾ, ਅਤੇ ਕਈ ਰੈਜ਼ੀਡੈਂਟਸ ਦੇ 2-2 ਘੰਟੇ ਤੱਕ ਮਦਦ ਲਈ ਰੋਂਦੇ ਰਹਿਣ ਤੱਕ ਦੇ ਇਲਜ਼ਾਮ ਲਗਾਏ ਹਨ।

ਯਾਦ ਰਹੇ ਔਂਟੈਰੀਓ ਦੇ ਪ੍ਰੀਮਿਅਰ ਡੱਗ ਫੋਰਡ ਨੇ ਬੀਤੇ ਮਹੀਨੇ ਕੁਝ ਕੇਅਰ ਹੋਮਜ਼ ਲਈ ਮਿਲਟਰੀ ਦੀ ਮਦਦ ਦੀ ਮੰਗ ਕੀਤੀ ਸੀ।

ਮਿਲਟਰੀ ਦੇ ਕੋਵਿਡ-19 ਦੇ ਮਰੀਜ਼ਾਂ ਨੂੰ ਸਹਾਇਤਾ ਪ੍ਰਦਾਨ ਕਰਨ ਲਈ ਪਹੁੰਚਣ ਤੋਂ ਹੁਣ ਤੱਕ, ਔਂਟੈਰੀਓ ਵਿੱਚ ਮਿਲਟਰੀ ਦੇ 14 ਮੈਂਬਰ ਕੋਵਿਡ-19 ਤੋਂ ਪੀੜਤ ਹੋ ਚੁੱਕੇ ਹਨ।