16.02C Vancouver 16.02C VancouverMar 30, 2022 9:27 PM - The Canadian Press
ਫਲੋਰੀਡਾ ਦੇ ਇੱਕ ਆਦਮੀ ਬਾਰੇ ਜਾਣਕਾਰੀ ਦਿੱਤੀ ਗਈ ਹੈ ਕਿ ਉਸ ਦਾ ਟਰਾਇਲ 18 ਜੁਲਾਈ ਤੋਂ ਮੀਨੇਸੋਟਾ ਦੇ ਵਿੱਚ ਸ਼ੁਰੂ ਹੋ ਜਾਵੇਗਾ।
ਮਾਮਲਾ ਮਨੁੱਖੀ ਤਸਕਰੀ ਦੇ ਦੋਸ਼ਾਂ ਨਾਲ ਸੰਬੰਧਤ ਹੈ।
ਇਸ ਵਿਅਕਤੀ 'ਤੇ ਦੋਸ਼ ਉਸ ਵੇਲੇ ਲੱਗੇ ਸਨ ਜਦ ਮੈਨੀਟੋਬਾ ਤੋਂ ਅਮਰੀਕਾ 'ਚ ਦਾਖਿਲ ਹੋਣ ਦੀ ਕੋਸ਼ਿਸ਼ ਕਰਦੇ 4 ਭਾਰਤੀ ਮੂਲ ਦੇ ਲੋਕਾਂ ਦੀ ਠੰਡ ਕਾਰਨ ਮੌਤ ਹੋ ਗਈ ਸੀ।
ਦੋਸ਼ਾਂ ਦਾ ਸਾਹਮਣਾ ਕਰ ਰਹੇ ਵਿਅਕਤੀ ਦਾ ਨਾਮ ਸਟੀਵ ਸ਼ੈਂਡ ਹੈ।
ਇਸ ਵਿਅਕਤੀ 'ਤੇ 2 ਲੋਕਾਂ ਨੂੰ ਗੈਰਕਨੂੰਨੀ ਢੰਗ ਨਾਲ ਅਮਰੀਕਾ ਲਿਆਉਣ ਅਤੇ ਉਨ੍ਹਾਂ ਨੂੰ ਦੇਸ਼ 'ਚ ਗੈਰਕਨੂੰਨੀ ਢੰਗ ਨਾਲ ਘਟੋ-ਘੱਟ ਇੱਕ ਵਾਰ ਦਾਖਿਲ ਕਰਵਾਉਣ ਦਾ ਦੋਸ਼ ਹੈ।
ਯਾਦ ਰਹੇ ਮੈਨੀਟੋਬਾ 'ਚ ਐਮਰਸਨ ਕੋਲ 4 ਲੋਕਾਂ ਦੇ ਮ੍ਰਿਤ ਸ਼ਰੀਰ ਮਿਲੇ ਸਨ।
ਹਾਲਾਂਕਿ ਸ਼ੈਂਡ 'ਤੇ ਮਾਈਗ੍ਰੈਂਟਸ ਦੀ ਮੌਤ ਸੰਬੰਧੀ ਦੋਸ਼ ਨਹੀਂ ਲੱਗੇ ਸਨ।
ਜਿਸ ਦਿਨ ਭਾਰਤੀ ਮੂਲ ਦੇ ਪਰਿਵਾਰ ਦੇ ਮ੍ਰਿਤ ਸ਼ਰੀਰ ਮਿਲੇ ਸਨ ਉਸੇ ਮੌਕੇ ਸ਼ੈਂਡ ਦੀ ਵੈਨ 'ਚ 2 ਲੋਕ ਮਿਲੇ ਸਨ।
ਕੀ ਸੀ ਪੂਰਾ ਮਾਮਲਾ:
ਮੈਨੀਟੋਬਾ 'ਚ ਐਮਰਸਨ ਦੇ ਕੋਲ ਕੈਨੇਡਾ-ਅਮਰੀਕਾ ਬੌਰਡਰ ਕੋਲ ਜਨਵਰੀ ਮਹੀਨੇ 'ਚ ਜਾਨ ਗਵਾਉਣ ਵਾਲੇ ਭਾਰਤੀ ਮੂਲ ਦੇ ਪਰਿਵਾਰ ਦੀ ਪਛਾਣ ਪਟੇਲ ਪਰਿਵਾਰ ਵਜੋਂ ਕੀਤੀ ਗਈ ਸੀ।
ਬੌਰਡਰ ਦੇ ਕੋਲ ਬੇਹੱਦ ਠੰਡੇ ਹਾਲਾਤਾਂ ਵਿੱਚ ਮ੍ਰਿਤ ਮਿਲੇ ਲੋਕਾਂ 'ਚ 39 ਸਾਲਾ ਆਦਮੀ, 37 ਸਾਲਾ ਔਰਤ, 11 ਸਾਲਾ ਲੜਕੀ ਅਤੇ 3 ਸਾਲਾ ਲੜਕਾ ਸ਼ਾਮਿਲ ਦੱਸਿਆ ਗਿਆ ਸੀ।
ਅਧਿਕਾਰੀਆਂ ਦਾ ਕਹਿਣਾ ਸੀ ਕਿ ਪਟੇਲ ਪਰਿਵਾਰ ਟੋਰੌਂਟੋ 'ਚ 12 ਜਨਵਰੀ 2022 ਨੂੰ ਪਹੁੰਚਿਆ ਸੀ।
ਇਸ ਤੋਂ ਬਾਅਦ ਇਹ ਪਰਿਵਾਰ ਮੈਨੀਟੋਬਾ ਪਹੁੰਚਿਆ ਅਤੇ ਫਿਰ 18 ਜਨਵਰੀ ਨੂੰ ਐਮਰਸਨ ਪਹੁੰਚਿਆ।
ਪੁਲਿਸ ਦਾ ਕਹਿਣਾ ਸੀ ਕਿ ਮੌਕੇ 'ਤੇ ਕੋਈ ਵਾਹਨ ਨਹੀਂ ਮਿਲਿਆ, ਜਿਸ ਤੋਂ ਅੰਦਾਜਾ ਲਗਾਇਆ ਜਾ ਰਿਹਾ ਸੀ ਕਿ ਕੋਈ ਉਨ੍ਹਾਂ ਨੂੰ ਬੌਰਡਰ ਦੇ ਕੋਲ ਛੱਡ ਕੇ ਮੌਕੇ ਤੋਂ ਨਿਕਲ ਗਿਆ।
