15.34C Vancouver 15.34C VancouverJul 30, 2026 1:28 PM - Connect Newsroom - Ramanpreet kaur with files from The Canadian Press
ਕੈਲਗਰੀ ਵਿੱਚ ਪਿਛਲੇ ਦੋ ਹਫ਼ਤਿਆਂ ਤੋਂ ਲਾਪਤਾ ਇੱਕ 11 ਸਾਲਾ ਬੱਚਾ ਮ੍ਰਿਤਕ ਪਾਇਆ ਗਿਆ ਹੈ, ਜਿਸ ਦੀ ਪੁਸ਼ਟੀ ਪੁਲਿਸ ਚੀਫ਼ Katie McLellan ਨੇ ਕੀਤੀ ਹੈ। ਪਾਰਕਰ ਨਾਂ ਦਾ ਇਹ ਲੜਕਾ autism ਤੋਂ ਪੀੜਤ ਅਤੇ ਬੋਲਣ ਵਿੱਚ ਅਸਮਰੱਥ ਸੀ, ਜੋ 16 ਜੁਲਾਈ ਨੂੰ ਇੱਕ ਡੇਅ-ਹੋਮ ਤੋਂ ਲਾਪਤਾ ਹੋਇਆ ਸੀ। ਉਸ ਦੀ ਮ੍ਰਿਤਕ ਦੇਹ ਬੁੱਧਵਾਰ ਦੁਪਹਿਰ ਨੂੰ 2.30 ਵਜੇ ਦੇ ਕਰੀਬ ਡੀਅਰਫੁੱਟ ਟ੍ਰੇਲ ਨੇੜੇ ਟਨਲ ਵਿੱਚ ਲਗਭਗ 137 ਤੋਂ 152 metres ਅੰਦਰ ਇੱਕ ਛੋਟੇ ਜਿਹੇ ਪਾਈਪ ਵਿੱਚੋਂ ਮਿਲੀ।
ਇਹ ਜਗ੍ਹਾ ਉਸ ਦੇ ਲਾਪਤਾ ਹੋਣ ਵਾਲੀ ਆਖਰੀ ਲੋਕੇਸ਼ਨ Connaught Drive ਨੌਰਥ ਵੈਸਟ ਤੋਂ 1 ਕਿਲੋਮੀਟਰ ਦੀ ਦੂਰੀ 'ਤੇ ਸੀ। ਮੰਗਲਵਾਰ ਨੂੰ ਇੱਕ ਵਿਅਕਤੀ ਨੇ ਪੁਲਿਸ ਨੂੰ ਡੀਅਰਫੁੱਟ ਟ੍ਰੇਲ ਦੀ ਵੈਸਟ ਸਾਈਡ ਦੇ ਗ੍ਰੀਨ ਸਪੇਸ ਏਰੀਏ ਵਿੱਚ ਟਨਲ ਦੇ ਨਿਕਾਸੀ ਨਾਲੇ ਕੋਲ ਇੱਕ ਜੁੱਤੀ ਮਿਲਣ ਦੀ ਇਤਲਾਹ ਦਿੱਤੀ ਸੀ, ਜਦੋਂ ਸਰਚ ਟੀਮ ਨੇ ਜਾਂਚ ਅੱਗੇ ਵਧਾਈ ਤਾਂ ਉਨ੍ਹਾਂ ਨੂੰ ਦੂਜੀ ਜੁੱਤੀ ਵੀ ਬਰਾਮਦ ਹੋਈ, ਇਸ ਮਗਰੋਂ ਪੂਰਾ ਪਾਈਪ ਸਿਸਟਮ ਖੰਗਾਲਇਆ ਗਿਆ, ਜਿੱਥੇ ਬੱਚੇ ਦੀ ਲਾਸ਼ ਮਿਲੀ।
ਇਸ ਬੱਚੇ ਨੂੰ ਲੱਭਣ ਲਈ ਕੈਲਗਰੀ ਦੇ ਇਤਿਹਾਸ ਵਿੱਚ ਸਭ ਤੋਂ ਵੱਡੀਆਂ ਖੋਜ ਮੁਹਿੰਮਾਂ ਵਿੱਚੋਂ ਇੱਕ ਚਲਾਈ ਗਈ ਸੀ, ਜਿਸ ਵਿੱਚ ਸੈਂਕੜੇ ਪੁਲਿਸ ਅਧਿਕਾਰੀਆਂ, ਖੋਜੀ ਕੁੱਤਿਆਂ ਅਤੇ ਹਜ਼ਾਰਾਂ ਸਥਾਨਕ ਵਾਲੰਟੀਅਰਸ ਨੇ ਦਿਨ-ਰਾਤ ਇੱਕ ਕੀਤਾ ਹੋਇਆ ਸੀ। ਪਰਿਵਾਰ ਅਤੇ ਭਾਈਚਾਰੇ ਨੇ ਇਸ ਦੁਖਦਾਈ ਖ਼ਬਰ 'ਤੇ ਡੂੰਘੇ ਦੁੱਖ ਦਾ ਪ੍ਰਗਟਾਵਾ ਕੀਤਾ ਹੈ ਅਤੇ ਐਲਬਰਟਾ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਸਣੇ ਕਈ ਆਗੂਆਂ ਨੇ ਪਰਿਵਾਰ ਨਾਲ ਹਮਦਰਦੀ ਜਤਾਈ ਹੈ।
