ਪੰਜਾਬੀ ਨੌਜਵਾਨ ਲਾਪਤਾ, ਸਰੀ ਪੁਲਿਸ ਨੇ ਲੋਕਾਂ ਨੂੰ ਕੀਤੀ ਮਦਦ ਦੀ ਅਪੀਲ

ਸਰੀ ਪੁਲਿਸ ਨੇ ਇੱਕ ਪੰਜਾਬੀ ਨੌਜਵਾਨ ਦੇ ਲਾਪਤਾ ਹੋਣ ਦੀ ਜਾਣਕਾਰੀ ਦਿੱਤੀ ਹੈ, ਜਿਸ ਦੀ ਭਾਲ ਲਈ ਲੋਕਾਂ ਤੋਂ ਮਦਦ ਦੀ ਅਪੀਲ ਕੀਤੀ ਗਈ ਹੈ। ਸਰੀ ਪੁਲਿਸ ਸਰਵਿਸ ਨੇ ਕਿਹਾ ਕਿ 26 ਸਾਲਾ ਗੁਰਨਿੰਦਰ ਸਿੰਘ ਨੂੰ ਆਖਰੀ ਵਾਰ 22 ਸਤੰਬਰ 2025 ਨੂੰ ਵੱਡੇ ਤੜਕੇ 1:00 ਵਜੇ ਦੇ ਕਰੀਬ ਸਕਾਟ ਰੋਡ ਸਕਾਈਟਰੇਨ ਸਟੇਸ਼ਨ ਅਤੇ ਪੱਟੂਲੋ ਬ੍ਰਿਜ ਦੇ ਖ਼ੇਤਰ ਵਿਚ ਪੁਲ ਵੱਲ ਜਾਂਦੇ ਦੇਖਿਆ ਗਿਆ ਸੀ। ਉਸ ਤੋਂ ਬਾਅਦ ਉਸ ਨੂੰ ਨਾ ਤਾਂ ਦੇਖਿਆ ਗਿਆ ਅਤੇ ਨਾ ਹੀ ਉਸ ਨੇ ਕਿਸੇ ਨਾਲ ਕੋਈ ਸੰਪਰਕ ਕੀਤਾ ਹੈ।

ਐਸ.ਪੀ.ਐਸ. ਨੇ ਕਿਹਾ ਕਿ ਪੁਲਿਸ ਅਤੇ ਪਰਿਵਾਰ ਉਸ ਦੀ ਸਹੀ-ਸਲਾਮਤੀ ਬਾਰੇ ਚਿੰਤਤ ਹਨ ਕਿਉਂਕਿ ਗੁਰਨਿੰਦਰ ਪਹਿਲਾਂ ਕਦੇ ਇੰਨੇ ਲੰਬੇ ਸਮੇਂ ਤੱਕ ਬਿਨਾਂ ਦੱਸੇ ਬਾਹਰ ਨਹੀਂ ਰਿਹਾ ਹੈ। ਪੁਲਿਸ ਨੇ ਕਿਹਾ ਕਿ ਹੁਣ ਤੱਕ ਉਸ ਨੂੰ ਲੱਭਣ ਦੀਆਂ ਕੋਸ਼ਿਸ਼ਾਂ ਅਸਫਲ ਰਹੀਆਂ ਹਨ, ਇਸ ਲਈ ਜਨਤਾ ਨੂੰ ਮਦਦ ਦੀ ਅਪੀਲ ਕੀਤੀ ਗਈ ਹੈ। ਗੁਰਨਿੰਦਰ ਦਾ ਕੱਦ 6 ਫੁੱਟ, ਵਜ਼ਨ 177 ਪੌਂਡ ਅਤੇ ਸਰੀਰ ਪਤਲਾ ਦੱਸਿਆ ਗਿਆ ਹੈ।

ਪੁਲਿਸ ਨੇ ਕਿਹਾ ਕਿ ਜਿਸ ਕਿਸੇ ਨੇ ਵੀ ਗੁਰਨਿੰਦਰ ਨੂੰ 22 ਸਤੰਬਰ ਦੇ ਤੜਕੇ 1 ਵਜੇ ਤੋਂ 2 ਵਜੇ ਵਿਚਕਾਰ ਪੁਲ 'ਤੇ ਜਾਂ ਉਸ ਦੇ ਨੇੜੇ ਦੇਖਿਆ ਹੈ ਜਾਂ ਉਸ ਦੀ ਡੈਸ਼ ਕੈਮ ਫੁਟੇਜ ਹੈ ਤਾਂ ਉਸ ਨੂੰ ਸਰੀ ਪੁਲਿਸ ਨੂੰ 604-599-0502 'ਤੇ ਜਾਂ ਕ੍ਰਾਈਮ ਸਟੌਪਰਸ ਨੂੰ 1-800-222-8477 'ਤੇ ਸੰਪਰਕ ਕਰਨ ਦੀ ਅਪੀਲ ਕੀਤੀ ਜਾਂਦੀ ਹੈ।