ਮਿਸਟਿਸਿਨੀ ਕ੍ਰੀ ਨੇਸ਼ਨ ਵਿੱਚ ਗੋਲੀਬਾਰੀ ਕਾਰਨ ਦੋ ਵਿਅਕਤੀਆਂ ਦੀ ਮੌਤ, ਲੱਗਾ ਲੌਕਡਾਊਨ

ਕਿਊੂਬੈਕ ਵਿਚ ਕ੍ਰੀ ਫਸਟ ਨੇਸ਼ਨ ਕਮਿਊਨਿਟੀ ਦੇ ਟਾਊਨ ਮਿਸਟਿਸਿਨੀ ਵਿਚ ਵੀਰਵਾਰ ਸਵੇਰੇ ਮਾਸ ਸ਼ੂਟਿੰਗ ਦੀ ਵਾਰਦਾਤ ਹੋਈ ਹੈ, ਜਿਸ ਵਿਚ ਕਈ ਲੋਕਾਂ ਦੀ ਮੌਤ ਹੋਣ ਦੀ ਰਿਪੋਰਟ ਹੈ। ਇਹ ਜਾਣਕਾਰੀ ਕਮਿਊਨਿਟੀ ਦੇ ਲੀਡਰ ਮਾਈਕਲ ਪੇਟਾਵਾਬਾਨੋ ਨੇ ਸੋਸ਼ਲ ਮੀਡੀਆ ਰਾਹੀਂ ਦਿੱਤੀ। ਉੱਤਰੀ ਕਿਊੂਬੈਕ ਵਿਚ ਸਥਿਤ ਇਸ ਦੂਰ-ਦੁਰਾਡੇ ਸ਼ਹਿਰ ਦੀ ਆਬਾਦੀ ਲਗਭਗ 4,000 ਲੋਕਾਂ ਦੀ ਹੈ।

ਸੋਸ਼ਲ ਮੀਡੀਆ 'ਤੇ ਦਿੱਤੇ ਬਿਆਨ ਵਿਚ ਪੇਟਾਵਾਬਾਨੋ ਨੇ ਕਿਹਾ ਕਿ ਗੰਭੀਰ ਗੋਲੀਬਾਰੀ ਦੀ ਘਟਨਾ ਤੋਂ ਬਾਅਦ ਲੌਕਡਾਊਨ ਲਾਗੂ ਹੈ। ਸਾਰੇ ਸਕੂਲ ਅਤੇ ਕਮਿਊਨਿਟੀ ਇਮਾਰਤਾਂ ਬੰਦ ਹਨ ਅਤੇ ਨਿਵਾਸੀਆਂ ਨੂੰ ਆਪਣੇ ਘਰਾਂ ਵਿਚ ਰਹਿਣ ਦੀ ਸਲਾਹ ਦਿੱਤੀ ਗਈ ਹੈ। ਇਸ ਵਿਚਕਾਰ ਪੁਲਿਸ ਨੇ ਅਜੇ ਤੱਕ ਮਰਨ ਵਾਲਿਆਂ ਦੀ ਸਹੀ ਗਿਣਤੀ ਜਾਂ ਹਮਲਾਵਰ ਬਾਰੇ ਕੋਈ ਜਾਣਕਾਰੀ ਸਾਂਝੀ ਨਹੀਂ ਕੀਤੀ ਹੈ।

ਰਿਪੋਰਟਸ ਮੁਤਾਬਕ, ਹੁਣ ਤੱਕ ਦੋ ਲੋਕਾਂ ਦੀ ਮੌਤ ਦੀ ਪੁਸ਼ਟੀ ਕੀਤੀ ਗਈ ਹੈ, ਜੋ ਸ਼ੂਟਿੰਗ ਮਗਰੋਂ ਇੱਕ ਗੱਡੀ ਵਿਚ ਜ਼ਖਮੀ ਮਿਲੇ ਅਤੇ ਬਾਅਦ ਵਿਚ ਉਹਨਾਂ ਦਮ ਤੋੜ ਦਿੱਤਾ। ਇਨ੍ਹਾਂ ਦੋਹਾਂ ਦੀ ਉਮਰ ਕਰੀਬ 30 ਤੋਂ 35 ਸਾਲ ਸੀ।