ਵਿਧਾਇਕ ਗੈਰੀ ਬੇਗ ਬੀਸੀ ਐਨ.ਡੀ.ਪੀ. ਕਾਕਸ ਦੇ ਨਵੇਂ ਚੇਅਰ ਨਿਯੁਕਤ

ਸਰੀ-ਗਿਲਡਫੋਰਡ ਤੋਂ ਵਿਧਾਇਕ ਗੈਰੀ ਬੇਗ ਨੂੰ ਬੀਸੀ ਐਨਡੀਪੀ ਕਾਕਸ ਦੇ ਨਵੇਂ ਚੇਅਰ ਨਿਯੁਕਤ ਕੀਤਾ ਗਿਆ ਹੈ, ਪ੍ਰੀਮੀਅਰ ਡੇਵਿਡ ਈਬੀ ਨੇ ਇਸ ਦਾ ਐਲਾਨ ਕੀਤਾ, ਉਨ੍ਹਾਂ ਕਿਹਾ ਕਿ ਬੇਗ ਕੋਲ ਬੀ. ਸੀ. ਦੇ ਲੋਕਾਂ ਦੀ ਸੇਵਾ ਕਰਨ ਦਾ ਲੰਮਾ ਤਜਰਬਾ ਹੈ ਅਤੇ ਉਹ ਇੱਕ ਬਿਹਤਰ ਕਾਕਸ ਚੇਅਰ ਸਾਬਤ ਹੋਣਗੇ। ਪ੍ਰੀਮੀਅਰ ਨੇ ਕਿਹਾ ਕਿ ਗੈਰੀ ਬੇਗ ਸਰਕਾਰ ਨੂੰ ਸੂਬੇ ਦੇ ਲੋਕਾਂ ਦੀਆਂ ਜ਼ਰੂਰਤਾਂ 'ਤੇ ਫੋਕਸ ਰੱਖਣਗੇ।

ਬੇਗ ਨੇ ਸਾਬਕਾ ਐਨ.ਡੀ.ਪੀ. ਕਾਕਸ ਚੇਅਰ ਸਟੈਫਨੀ ਹਿਗਿਨਸਨ ਦੀ ਜਗ੍ਹਾ ਲਈ ਹੈ। ਪ੍ਰੀਮੀਅਰ ਨੇ ਕਿਹਾ ਕਿ ਮੈਂ ਹਿਗਿਨਸਨ ਦਾ ਉਨ੍ਹਾਂ ਦੀ ਮਿਹਨਤ ਲਈ ਧੰਨਵਾਦ ਕਰਨਾ ਚਾਹੁੰਦਾ ਹਾਂ, ਜਿਸ ਨੇ ਪਿਛਲੇ ਉਥਲ-ਪੁਥਲ ਵਾਲੇ ਸਾਲ ਵਿਚ ਸਾਡਾ ਮਾਰਗਦਰਸ਼ਨ ਕੀਤਾ। ਉਥੇ ਹੀ, ਬੇਗ ਨੇ ਕਿਹਾ ਕਿ ਉਹ ਨਵੀਂ ਭੂਮਿਕਾ ਨੂੰ ਨਿਭਾਉਣ ਲਈ ਉਤਸੁਕ ਹਨ ਅਤੇ ਇੱਕ ਟੀਮ ਦੇ ਰੂਪ ਵਿਚ ਸਾਡੀ ਸਭ ਦੀ ਸੂਬੇ ਦਾ ਉੱਜਵਲ ਭਵਿੱਖ ਬਣਾਉਣ ਦੀ ਜ਼ਿੰਮੇਵਾਰੀ ਹੈ।

ਗੌਰਤਲਬ ਹੈ ਕਿ ਬੇਗ ਪਹਿਲੀ ਵਾਰ 2017 ਵਿਚ ਵਿਧਾਇਕ ਚੁਣੇ ਗਏ ਸਨ, 2020 ਅਤੇ 2024 ਵਿਚ ਉਹ ਦੁਬਾਰਾ ਐਮ.ਐਲ.ਏ. ਬਣੇ। ਰਾਜਨੀਤੀ ਵਿਚ ਆਉਣ ਤੋਂ ਪਹਿਲਾਂ ਉਹਨਾਂ 38 ਸਾਲਾਂ ਤੋਂ ਵੱਧ ਸਮਾਂ ਆਰ.ਸੀ.ਐਮ.ਪੀ. ਔਫੀਸਰ ਦੇ ਰੂਪ ਵਿਚ ਕੰਮ ਕੀਤਾ ਹੈ।