15.88C Vancouver 15.88C VancouverAug 5, 2021 8:41 AM -
ਅੱਜ ਵੀਰਵਾਰ ਨੂੰ ਲੋਕ ਸਭਾ ਦੀ ਕਾਰਵਾਈ, ਵਿਰੋਧੀ ਧਿਰ ਦੇ ਨੇਤਾਵਾਂ ਵੱਲੋਂ ਐਵਾਨ ਵਿੱਚ ਵੱਖੋ-ਵੱਖ ਮੁੱਦਿਆਂ 'ਤੇ ਲਗਾਤਾਰ ਹੁੰਦੇ ਹੰਗਾਮੇ ਕਰਕੇ, 2 ਵਜੇ ਤੱਕ ਮੁਲਤਵੀ ਕਰ ਦਿੱਤੀ ਗਈ।
ਅੱਜ ਪਹਿਲਾਂ, ਕਾਂਗਰਸ ਦੇ ਐੱਮਪੀ ਮਨੀਸ਼ ਤਿਵਾੜੀ ਨੇ 'ਪੈਗੈਸਸ ਪ੍ਰੌਜੈਕਟ' ਦੇ ਮੁੱਦੇ 'ਤੇ ਹੇਠਲੇ ਐਵਾਨ ਵਿੱਚ ਕਾਰਵਾਈ ਮੁਲਤਵੀ ਕਰਨ ਦਾ ਨੋਟਿਸ ਦਿੱਤਾ ਸੀ।
ਆਪਣੇ ਨੋਟਸ ਵਿੱਚ ਤਿਵਾੜੀ ਨੇ ਆਖਿਆ,"ਇਹ ਖ਼ਬਰਾਂ ਕਿ ਭਾਰਤ ਸਰਕਾਰ ਵੱਲੋਂ ਇਜ਼ਰਾਇਲੀ ਕੰਪਨੀ ਐੱਨਐੱਸਓ ਗਰੁੱਪ ਤੋਂ ਪੈਗੈਸਸ ਖ਼ਰੀਦ ਕੇ, ਉਸ ਰਾਹੀਂ ਪੱਤਰਕਾਰਾਂ, ਸਮਾਜਿਕ ਕਾਰਕੁੰਨ, ਸਿਆਸੀ ਲੀਡਰਾਂ ਅਤੇ ਸਰਵ-ਉੱਚ ਅਦਾਲਤ ਦੇ ਜੱਜਾਂ ਦੀ ਜਾਸੂਸੀ ਕਰਵਾਈ ਗਈ ਹੈ।"
ਉਨ੍ਹਾਂ ਅੱਗੇ ਆਖਿਆ ਕਿ ਕਿਉਂਕਿ ਐੱਨਐੱਸਓ ਗਰੁੱਪ ਦੀ ਨੀਤੀ ਇਹ ਹੈ ਕਿ ਜਾਸੂਸੀ ਵਾਲਾ ਇਹ ਸੌਫਟਵੇਅਰ ਸਿਰਫ਼ 'ਜਾਸੂਸੀ ਕਰਾਉਣ ਵਾਲੀਆਂ ਸਰਕਾਰਾਂ' ਨੂੰ ਹੀ ਦਿੱਤਾ ਜਾਂਦਾ ਹੈ, ਤਾਂ ਇਸ ਤੋਂ ਜ਼ਾਹਰ ਹੈ ਕਿ ਇਹ ਭਾਰਤ ਸਰਕਾਰ ਵੱਲੋਂ ਹੀ ਵਰਤਿਆ ਗਿਆ ਹੈ, ਨਾ ਕਿ ਕਿਸੇ ਨਿੱਜੀ ਅਦਾਰੇ ਵੱਲੋਂ।
ਅੱਗੇ ਉਨ੍ਹਾਂ ਕਿਹਾ ਕਿ ਸਿਟੀਜ਼ਨ ਲੈਬ ਵਰਗੀਆਂ ਪ੍ਰਸਿੱਧ ਏਜੰਸੀਆਂ ਨੇ ਇਸ ਜਾਸੂਸੀ ਦੇ ਸ਼ਿਕਾਰ ਬਣੇ ਕੁਝ ਯੰਤਰਾਂ 'ਤੇ ਇਸਦੇ ਨਿਸ਼ਾਨ ਲੱਭੇ ਹਨ।
"ਇਸ ਗੱਲ 'ਤੇ ਧਿਆਨ ਦੇਣਾ ਚਾਹੀਦਾ ਹੈ ਕਿ ਇਸ ਤਰਾਂ ਦੀ ਨਿਗਰਾਨੀ ਨੂੰ ਹੈਕਿੰਗ ਦਾ ਹੀ ਇੱਕ ਹਿੱਸਾ ਆਖਿਆ ਜਾਂਦਾ ਹੈ, ਇਹੀ ਹੈ ਜੋ ਇਹ ਜਾਸੂਸੀ ਵਾਲਾ ਸੌਫਟਵੇਅਰ ਕਰਦਾ ਹੈ ਅਤੇ ਸੂਚਨਾ ਅਤੇ ਤਕਨੀਕੀ ਐਕਟ, 2000 ਦੇ ਤਹਿਤ ਇਸਨੂੰ "ਅਣਅਧਿਕਾਰਤ ਰੁਕਾਵਟ ਜਾਂ ਹੈਕਿੰਗ ਦੇ ਤੌਰ 'ਤੇ ਲਿਆ ਜਾਣਾ ਚਾਹੀਦਾ ਹੈ," ਕਾਂਗਰਸ ਐੱਮਪੀ ਨੇ ਆਪਣੇ ਮੁਲਤਵੀ ਨੋਟਿਸ ਵਿੱਚ ਆਖਿਆ।
ਤਿਵਾੜੀ ਨੇ ਆਖਿਆ ਕਿ ਸਰਕਾਰ ਹਲੇ ਤੱਕ ਸਾਫ਼ ਤੌਰ 'ਤੇ ਮੁਨਕਰ ਨਹੀਂ ਹੋਈ ਹੈ ਕਿ ਪੈਗੈਸਸ ਅਧਿਕਾਰਿਤ ਤੌਰ 'ਤੇ ਵਰਤਿਆ ਗਿਆ ਹੈ, ਇਸਦੇ ਨਾਲ ਹੀ ਉਨ੍ਹਾਂ ਇਸ ਨੂੰ ਗੰਭੀਰ ਮੁੱਦਾ ਗਰਦਾਨਦਿਆਂ ਇਸ 'ਤੇ ਚਰਚਾ ਕਰਨ ਲਈ ਆਖਿਆ।
ਇਸੇ ਦਰਮਿਆਨ ਵੀਰਵਾਰ ਨੂੰ ਲੋਕ ਸਭਾ ਵਿੱਚ ਪ੍ਰਧਾਨ ਮੰਤਰੀ ਜਾਂ ਗ੍ਰਹਿ ਮੰਤਰੀ ਦੀ ਮੌਜੂਦਗੀ ਵਿੱਚ, ਕਾਂਗਰਸ ਐੱਮਪੀ ਮਨਿੱਕਮ ਟੈਗੋਰ ਨੇ ਕਾਰਵਾਈ ਮੁਲਤਵੀ ਕਰਨ ਦੇ ਮੋਸ਼ਨ ਨੋਟਿਸ ਨੂੰ ਪੈਗੈਸਸ 'ਤੇ ਚਰਚਾ ਕਰਨ ਲਈ ਅੱਗੇ ਤੋਰਿਆ।
"ਮੈਂ, ਜ਼ਰੂਰੀ ਅਹਿਮੀਅਤ ਦੇ ਮੁੱਦਿਆਂ 'ਤੇ ਚਰਚਾ ਕਰਨ ਦੇ ਇਰਾਦੇ ਨਾਲ, ਏਵਾਨ ਦੀ ਕਾਰਵਾਈ ਨੂੰ ਮੁਲਤਵੀ ਕਰਨ ਦਾ ਨੋਟਿਸ ਦੇਣ ਦੀ ਆਪਣੀ ਮੰਗ ਰੱਖਦਾ ਹਾਂ, ਜਿਸ ਦੇ ਅੰਤਰਗਤ ਇਹ ਮੁੱਦੇ ਹਨ:-ਪ੍ਰਧਾਨ ਮੰਤਰੀ ਜਾਂ ਗ੍ਰਹਿ ਮੰਤਰੀ ਦੀ ਹਾਜ਼ਰੀ 'ਚ ਇੱਕ ਦਿਨ, ਸਰਕਾਰ ਦੇ ਕਥਿਤ ਤੌਰ 'ਤੇ ਭਾਰਤੀ ਵਿਰੋਧੀ ਧਿਰ ਦੇ ਲੀਡਰਾਂ, ਭਾਰਤ ਦੇ ਮੁੱਖ ਜੱਜ, ਭਾਰਤੀ ਦੇ ਚੋਣ ਕਮਿਸ਼ਨਰ, ਸੀਬੀਆਈ ਦੇ ਨਿਰਦੇਸ਼ਕ, ਔਰਤ ਪੱਤਰਕਾਰਾਂ ਅਤੇ ਬੀਜੇਪੀ ਦੇ ਐੱਮਪੀਜ਼ ਖ਼ਿਲਾਫ਼ ਹਥਿਆਰ ਦੇ ਤੌਰ 'ਤੇ ਇਜ਼ਰਾਇਲੀ ਜਾਸੂਸੀ ਸੌਫ਼ਟਵੇਅਰ ਪੈਗੈਸਸ ਦੀ ਵਰਤੋਂ ਕਰਨ 'ਤੇ,"ਕਾਂਗਰਸ ਲੀਡਰ ਨੇ ਆਪਣੇ ਨੋਟਿਸ ਵਿੱਚ ਆਖਿਆ।
ਜ਼ਿਕਰਯੋਗ ਹੈ ਕਿ ਪਾਰਲੀਮੈਂਟ ਦੇ ਦੋਵਾਂ ਐਵਾਨਾਂ ਦੀ ਕਾਰਵਾਈ ਵਿੱਚ, ਵਿਰੋਧੀ ਧਿਰ ਵੱਲੋਂ ਲਗਾਤਾਰ ਕਿਸਾਨੀ ਸੰਘਰਸ਼, ਪੈਗੈਸਸ ਜਾਸੂਸੀ, ਕੋਵਿਡ-19 ਅਤੇ ਮਹਿੰਗਾਈ ਦੇ ਮੁੱਦਿਆਂ 'ਤੇ ਹੰਗਾਮਾ ਕਰਨ ਕਰਕੇ ਰੁਕਾਵਟ ਆ ਰਹੀ ਹੈ।
ਮਾਨਸੂਨ ਦਾ ਇਜਲਾਸ 19 ਜੁਲਾਈ ਨੂੰ ਸ਼ੁਰੂ ਹੋਇਆ ਸੀ ਅਤੇ ਇਹ 13 ਅਗਸਤ ਤੱਕ ਜਾਰੀ ਰਹੇਗਾ।
