8.15C Vancouver 8.15C VancouverMay 19, 2022 10:28 PM - The Canadian Press
ਕਿਊਬੈਕ ਦੇ ਪਬਲਿਕ ਹੈਲਥ ਅਧਿਕਾਰੀਆਂ ਵੱਲੋਂ ਮੌਂਟਰੀਅਲ ਦੇ ਇਲਾਕੇ 'ਚ ਮੰਕੀਪੌਕਸ ਦੇ ਕਈ ਸ਼ੱਕੀ ਮਾਮਲਿਆਂ ਦੀ ਜਾਂਚ ਕੀਤੀ ਜਾ ਰਹੀ ਹੈ।
ਪਬਲਿਕ ਹੈਲਥ ਅਧਿਕਾਰੀਆਂ ਅਨੁਸਾਰ ਮੌਂਟਰੀਅਲ 'ਚ ਇਸ ਬਿਮਾਰੀ ਸੰਬੰਧਤ 17 ਮਾਮਲੇ ਰਿਪੋਰਟ ਹੋ ਚੁੱਕੇ ਹਨ।
ਡਾ. ਮੇਲੀਨ ਡਰੂਇਨ ਦਾ ਕਹਿਣਾ ਸੀ ਕਿ ਯੂਰੋਪ 'ਚ ਇਸ ਸੰਬੰਧੀ ਆਊਟਬ੍ਰੇਕ ਅਤੇ ਅਮਰੀਕਾ 'ਚ ਇਸ ਦਾ ਇੱਕ ਮਾਮਲਾ ਰਿਪੋਰਟ ਹੋਣ ਕਾਰਨ ਇਸ ਦੇ ਮਜਬੂਤ ਆਸਾਰ ਮੰਨੇ ਜਾ ਰਹੇ ਹਨ ਕਿ ਸ਼ਹਿਰ 'ਚ ਜਾਰੀ ਇਨਫੈਕਸ਼ਨ ਦਾ ਮੰਕੀਪੌਕਸ ਨਾਲ ਵਾਸਤਾ ਹੈ।
ਅਮਰੀਕਾ 'ਚ ਰਿਪੋਰਟ ਹੋਏ ਮਾਮਲੇ ਦੇ ਵੀ ਮੌਂਟਰੀਅਲ ਤੋਂ ਟਰੈਵਲ ਸੰਬੰਧੀ ਜਾਣਕਾਰੀ ਦਿੱਤੀ ਗਈ ਹੈ।
ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਮਾਮਲਿਆਂ ਦੀ ਫਿਲਹਾਲ ਲੈਬੋਰੇਟਰੀ 'ਚ ਪੁਸ਼ਟੀ ਨਹੀਂ ਹੋਈ ਹੈ।
ਡਾਕਟਰ ਦਾ ਕਹਿਣਾ ਸੀ ਕਿ ਇਹ ਬਿਮਾਰੀ ਲਗਾਤਾਰ ਕਿਸੇ ਪੀੜਤ ਵਿਅਕਤੀ ਦੇ ਸੰਪਰਕ 'ਚ ਆਉਣ ਨਾਲ ਹੁੰਦੀ ਹੈ ਅਤੇ ਰੋਜ ਦੀਆਂ ਗਤੀਵਿਧੀਆਂ 'ਚ ਇਸ ਦਾ ਕੋਈ ਪ੍ਰਭਾਵ ਪੈਣ ਦੀ ਸੰਭਾਵਨਾ ਨਹੀਂ ਹੈ।
ਉਨ੍ਹਾਂ ਕਿਹਾ ਕਿ ਇਸ ਬਿਮਾਰੀ ਕਾਰਨ ਟ੍ਰਾਂਜ਼ਿਟ ਸਵਾਰੀ ਜਾਂ ਸ਼ੌਪਿੰਗ ਜਾਂ ਬਾਹਰ ਖਾਣਪੀਣ ਜਿਹੀਆਂ ਗਤੀਵਿਧੀਆਂ 'ਚ ਕੋਈ ਵਿਘਨ ਪੈਣ ਦੀ ਸੰਭਾਵਨਾ ਨਹੀਂ ਹੈ।
ਕੀ ਹੈ ਮੰਕੀਪੌਕਸ ਦਾ ਇਤਿਹਾਸ ?
ਯੂਰੋਪੀਅਨ ਅਤੇ ਅਮਰੀਕੀ ਹੈਲਥ ਅਧਿਕਾਰੀਆਂ ਵੱਲੋਂ ਇਸ ਹਫ਼ਤੇ ਅਨੇਕਾਂ ਮੰਕੀਪੌਕਸ ਮਾਮਲਿਆਂ ਦੀ ਪਛਾਣ ਕੀਤੀ ਗਈ ਹੈ।
ਇਸ ਬਿਮਾਰੀ ਸੰਬੰਧੀ ਆਊਟਬ੍ਰੇਕ ਨੂੰ ਅਚੰਭੇ ਭਰਿਆ ਵੀ ਮੰਨਿਆ ਜਾ ਰਿਹਾ ਹੈ ਕਿਉਂਕਿ ਇਸ ਤੋਂ ਪਹਿਲਾਂ ਇਹ ਬਿਮਾਰੀ ਸੈਂਟਰਲ ਅਤੇ ਪੱਛਮੀ ਅਫਰੀਕਾ ਤਕ ਸੀਮਤ ਰਹਿੰਦੀ ਮੰਨੀ ਜਾਂਦੀ ਸੀ।
ਡਾਕਟਰ ਹੁਣ ਵੀ ਕੋਈ ਸਪਸ਼ਟ ਜਾਣਕਾਰੀ ਹਾਸਿਲ ਨਹੀਂ ਕਰ ਸਕੇ ਹਨ ਕਿ ਮੰਕੀਪੌਕਸ ਆਖਿਰ ਫੈਲ ਕਿਵੇਂ ਰਿਹਾ ਹੈ।
ਇਸ ਬਿਮਾਰੀ ਨੂੰ ਆਮ ਤੌਰ 'ਤੇ ਰੋਡੈਂਟਸ ਕਾਰਨ ਜਾਂ ਕਿਸੇ ਪੀੜਤ ਵਿਅਕਤੀ ਦੇ ਬੇਹੱਦ ਨੇੜੇ ਦੇ ਸੰਪਰਕ ਕਾਰਨ ਵਧਣ ਦੇ ਆਸਾਰ ਮੰਨੇ ਜਾਂਦੇ ਹਨ।
ਬ੍ਰਿਟਿਸ਼ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਸ ਬਿਮਾਰੀ ਨਾਲ ਜੂਝਦੇ ਹਾਲ ਦੇ ਬਹੁਤੇ ਮਾਮਲੇ ਉਨ੍ਹਾਂ ਆਦਮੀਆਂ ਨਾਲ ਸੰਬੰਧਤ ਹਨ ਜਿੰਨਾ ਨੇ ਕਿਸੇ ਹੋਰ ਆਦਮੀ ਨਾਲ ਸ਼ਰੀਰਕ ਸੰਬੰਧ ਬਣਾਏ ਸਨ ਅਤੇ ਇਹ ਮਾਮਲੇ ਅਜਿਹੇ ਲੋਕਾਂ ਨਾਲ ਸੰਬੰਧਤ ਸਨ ਜਿੰਨਾ ਦਾ ਕੋਈ ਟਰੈਵਲ ਇਤਿਹਾਸ ਵੀ ਨਹੀਂ ਸੀ।
ਕੀ ਹੈ ਇਸ ਬਿਮਾਰੀ ਦਾ ਇਨਕਿਉਬੇਸ਼ਨ ਪੀਰੀਅਡ ?
ਡਾਕਟਰਾਂ ਦਾ ਕਹਿਣਾ ਹੈ ਕਿ ਆਮ ਤੌਰ 'ਤੇ ਇਸ ਬਿਮਾਰੀ ਦੇ ਵਿਕਸਿਤ ਹੋਣ 'ਚ 7 ਤੋਂ 17 ਦਿਨ ਦਾ ਸਮਾਂ ਲਗਦਾ ਹੈ।
ਹਾਲਾਂਕਿ ਕੁਝ ਮਾਮਲਿਆਂ 'ਚ ਇਸ ਬਿਮਾਰੀ ਦੇ ਲੱਛਣ ਸਥਾਪਿਤ ਹੋਣ 'ਚ 5 ਦਿਨ ਅਤੇ ਕੁਝ ਮਾਮਲਿਆਂ 'ਚ 21 ਦਿਨ ਤਕ ਦਾ ਸਮਾਂ ਲੱਗਣ ਦੀ ਜਾਣਕਾਰੀ ਦਿੱਤੀ ਗਈ ਹੈ।
ਮਾਹਿਰਾਂ ਅਨੁਸਾਰ ਇਹ ਇਨਫੈਕਸ਼ਨ ਆਮ ਤੌਰ 'ਤੇ 2 ਤੋਂ 4 ਹਫ਼ਤੇ ਤਕ ਅਸਰ ਵਿਖਾਉਂਦੀ ਹੈ।
ਕੀ ਹਨ ਮੰਕੀਪੌਕਸ ਦੇ ਲੱਛਣ ?
ਮੰਕੀਪੌਕਸ ਨਾਮ ਦੀ ਬਿਮਾਰੀ ਨਾਲ ਸੰਬੰਧਤ ਲੱਛਣਾਂ ਨੂੰ ਸਮੌਲਪੌਕਸ ਦੇ ਨਾਲ ਰਲਦੇ-ਮਿਲਦੇ ਦੱਸਿਆ ਗਿਆ ਹੈ।
ਇਸ ਦੌਰਾਨ ਬੁਖਾਰ, ਸਿਰ ਦਰਦ, ਮਸਲਸ ਸੰਬੰਧੀ ਦਰਦ, ਪਿੱਠ ਦਰਦ, ਕੰਬਣੀ ਅਤੇ ਥਕਾਵਟ ਜਿਹੇ ਲੱਛਣ ਸਥਾਪਿਤ ਹੁੰਦੇ ਹਨ।
ਹਾਲਾਂਕਿ ਕੁਝ ਲੋਕਾਂ 'ਚ ਇਸ ਬਿਮਾਰੀ ਕਾਰਨ ਲਿੰਫ ਨੋਡਸ 'ਚ ਸੋਜ ਹੋਣ ਦੀ ਵੀ ਗੱਲ ਆਖੀ ਗਈ ਹੈ।
