7.3C Vancouver 7.3C VancouverJan 9, 2020 2:28 AM -
ਸਪੈਸ਼ਲਿਸਟ ਸਿਹਤ ਪ੍ਰੋਗਰਾਮਾਂ ਵਿੱਚ ਵਿਦਿਆਰਥੀਆਂ ਦੀ ਪਹੁੰਚ ਵਿੱਚ ਸੁਧਾਰ ਲਈ, ਬੀ.ਸੀ. ਸਰਕਾਰ ਢਾਈ ਮਿਲੀਅਨ ਡਾਲਰ ਦਾ ਨਿਵੇਸ਼ ਕਰ ਰਹੀ ਹੈ।
ਇਹ ਨਿਵੇਸ਼ ਬੀ.ਸੀ.ਆਈ.ਟੀ. ਡਾਇਗਨੋਸਟਿਕ ਮੈਡੀਕਲ ਸੋਨੋਗ੍ਰਾਫੀ ਅਤੇ ਕਾਰਡੀਓਵੈਸਕੁਲਰ ਪ੍ਰੋਗ੍ਰਾਮਸ ਵਿੱਚ ਕੀਤਾ ਜਾਵੇਗਾ।
ਅੱਠ ਲੱਖ ਅੱਸੀ ਹਜ਼ਾਰ ਡਾਲਰ ਲਾ ਕੇ ਬੀ.ਸੀ.ਆਈ.ਟੀ. ਦੇ ਇਸ ਪ੍ਰੋਗਰਾਮ ਵਿੱਚ ਵਿਦਿਆਰਥੀਆਂ ਦੇ ਦਾਖ਼ਲੇ ਲਈ ਵਧੇਰੀਆਂ ਸੀਟਾਂ ਸਥਾਪਿਤ ਕੀਤੀਆਂ ਜਾਣਗੀਆਂ ਅਤੇ 1.6 ਮਿਲੀਅਨ ਡਾਲਰ ਲਾ ਕੇ ਜ਼ਰੂਰੀ ਸੋਨੋਗ੍ਰਾਫੀ ਉਪਕਰਨ ਖਰੀਦਿਆ ਜਾਵੇਗਾ।
ਬੀ.ਸੀ.ਆਈ.ਟੀ. ਬਰਨਬੀ ਕੈਂਪਸ ਵਿਖੇ ਇਸ ਐਲਾਨ ਦੇ ਮੌਕੇ, ਮਨਿਸਟਰ ਆਫ਼ ਅਡਵਾਂਸਡ ਐਜੂਕੇਸ਼ਨ ਸਕਿਲਜ਼ ਐਾਡ ਟ੍ਰੇਨਿੰਗ, ਮੈਲੇਨੀ ਮਾਰਕ ਨੇ ਕਿਹਾ ਕਿ ਵਿਦਿਆਰਥੀ, ਸਿਹਤ ਸੰਭਾਲ ਕਰਮਚਾਰੀਆਂ ਅਤੇ ਮਰੀਜ਼ਾਂ ਦੀ ਕਈ ਸਾਲਾਂ ਤੋਂ ਸਰਕਾਰ ਤੋਂ ਮੰਗ ਸੀ ਕਿ ਸੂਬੇ ਵਿੱਚ ਸੋਨੋਗ੍ਰਾਫੀ ਟ੍ਰੇਨਿੰਗ ਵਧਾਈ ਜਾਏ ਅਤੇ ਹੁਣ ਸਰਕਾਰ ਇਸ ਮੰਗ ਦਾ ਹੱਲ ਕਰ ਰਹੀ ਹੈ।
ਉਨ੍ਹਾਂ ਨੇ ਕਿਹਾ ਕਿ ਬੀ.ਸੀ.ਆਈ.ਟੀ. ਤੇ ਪੈਸਾ ਲਗਾਇਆ ਜਾ ਰਿਹਾ ਹੈ, ਤਾਂ ਕਿ ਸਿਹਤ ਸੰਭਾਲ ਦੇ ਲਾਭਕਾਰੀ ਕਰੀਅਰ ਵਿੱਚ ਵਧੇਰੇ ਵਿਦਿਆਰਥੀ ਆਉਣ ਅਤੇ ਬ੍ਰਿਟਿਸ਼ ਕੋਲੰਬੀਅਨਸ ਨੂੰ ਉੱਚ ਗੁਣਵਤਾ ਦੀ ਸਿਹਤ ਦੇਖਭਾਲ ਮਿਲ ਸਕੇ।
ਇਸ ਪ੍ਰੋਗਰਾਮ ਸੰਬੰਧੀ ਬੀਤੇ ਸਾਲ ਸਿਤੰਬਰ ਵਿੱਚ 8 ਸੀਟਾਂ ਦੇ ਵਾਧੇ ਤੋਂ ਬਾਅਦ, ਹੁਣ ਇਸ ਸਾਲ ਹੋਰ 8 ਸੀਟਾਂ ਦਾ ਵਾਧਾ ਕੀਤਾ ਜਾਣਾ ਤੈਅ ਕੀਤਾ ਗਿਆ ਹੈ।
