11.36C Vancouver 11.36C VancouverMay 4, 2021 8:24 PM -
ਮੈਟਰੋ ਵੈਨਕੂਵਰ 'ਚ ਰੈਜ਼ੀਡੈਂਸ਼ੀਅਲ ਰੀਅਲ ਐਸਟੇਟ ਦੀ ਵਧਦੀ ਮੰਗ ਵਿਚਾਲੇ ਵਧੇਰੇ ਘਰਾਂ ਦੀ ਲਿਸਟਿੰਗ ਦੀ ਜਾਣਕਾਰੀ ਦਿੱਤੀ ਜਾ ਰਹੀ ਹੈ।
ਹਾਲਾਂਕਿ ਮਾਹਿਰਾਂ ਦਾ ਕਹਿਣਾ ਹੈ ਕਿ ਖਰੀਦਦਾਰਾਂ ਲਈ ਅਜੇ ਵੀ ਬਹੁਤੇ ਵਿਕਲਪ ਮੌਜੂਦ ਨਹੀਂ ਹਨ।
ਰੀਅਲ ਐਸਟੇਟ ਬੋਰਡ ਆਫ ਗ੍ਰੇਟਰ ਵੈਨਕੂਵਰ ਦਾ ਕਹਿਣਾ ਹੈ ਕਿ ਇਸ ਸਾਲ ਅਪ੍ਰੈਲ 'ਚ ਬੀਤੇ ਸਾਲ ਦੇ ਇਸੇ ਮਹੀਨੇ ਦੇ ਮੁਕਾਬਲੇ ਘਰਾਂ ਦੀ ਵਿਕਰੀ 'ਚ 342% ਦਾ ਵਾਧਾ ਵੇਖਣ ਨੂੰ ਮਿਲਿਆ ਹੈ।
ਯਾਦ ਰਹੇ ਬੀਤੇ ਸਾਲ ਅਪ੍ਰੈਲ ਦਾ ਮਹੀਨਾ ਹੀ ਸੀ ਜਦ ਪਹਿਲਾ ਪੂਰਾ ਮਹੀਨਾ ਕੋਵਿਡ-19 ਦੇ ਪ੍ਰਭਾਵ ਵੇਖਣ ਨੂੰ ਮਿਲੇ ਸਨ।
ਬੋਰਡ ਦਾ ਕਹਿਣਾ ਹੈ ਕਿ ਅਪ੍ਰੈਲ ਦੇ ਮਹੀਨੇ 'ਚ ਵਿਕਰੀ ਲਈ ਲਿਸਟ ਹੋਣ ਵਾਲੇ ਘਰਾਂ ਦੀ ਗਿਣਤੀ ਬੀਤੇ ਸਾਲ ਦੇ ਅਪ੍ਰੈਲ ਮਹੀਨੇ ਦੇ ਮੁਕਾਬਲੇ 9% ਵਧੇਰੇ ਸੀ।
ਹਾਲਾਂਕਿ ਇਸ ਨੂੰ ਅਪ੍ਰੈਲ ਮਹੀਨੇ ਦੀ 10 ਸਾਲ ਦੀ ਔਸਤ ਤੋਂ 11% ਘੱਟ ਦੱਸਿਆ ਗਿਆ।
ਬੋਰਡ ਦਾ ਕਹਿਣਾ ਹੈ ਕਿ ਰਿਕਾਰਡ ਪੱਧਰ 'ਤੇ ਘਟੇ ਇੰਟ੍ਰਸਟ ਰੇਟ, ਵਧੇਰੇ ਹਾਊਸਹੋਲਡ ਬੱਚਤਾਂ, ਵਧੇਰੇ ਮਜ਼ਬੂਤ ਇਕਾਨਮੀ, ਅਤੇ ਪੈਂਡੈਮਿਕ ਵਿਚਾਲੇ ਰਹਿਣ ਲਈ ਵਧੇਰੇ ਥਾਂ ਦੀ ਲੋੜ ਨੇ ਵਧੇਰੇ ਲੋਕਾਂ ਨੂੰ ਘਰ ਖਰੀਦਣ ਦੀ ਮਾਰਕਿਟ 'ਚ ਲਿਆ ਖੜਾ ਕੀਤਾ ਹੈ।
ਬੋਰਡ ਅਨੁਸਾਰ ਬੀਤੇ ਮਹੀਨੇ 4,908 ਘਰਾਂ ਦੀ ਵਿਕਰੀ ਵੇਖਣ ਨੂੰ ਮਿਲੀ।
ਇਸੇ ਮਹੀਨੇ 10,245 ਘਰਾਂ ਨੂੰ ਵਿਕਰੀ ਲਈ ਲਿਸਟ ਕੀਤਾ ਗਿਆ ਸੀ।
ਮਾਰਕਿਟ 'ਚ ਕਿਸੇ ਅਲੱਗ ਸਥਿਤ ਘਰ ਦੀ ਔਸਤ ਕੀਮਤ $1.75 ਮਿਲੀਅਨ ਦੀ ਦੱਸੀ ਗਈ ਹੈ ਜਦਕਿ ਕਿਸੇ ਅਪਾਰਟਮੈਂਟ ਦੀ ਔਸਤ ਕੀਮਤ $7,29,000 ਦੀ ਦੱਸੀ ਗਈ ਹੈ।
ਇਹ ਬੀਤੇ ਸਾਲ ਦੇ ਮੁਕਾਬਲੇ 5.9% ਵਧੇਰੇ ਹੈ।
