16.5C Vancouver 16.5C VancouverMay 28, 2020 4:40 PM -
ਕੋਵਿਡ-19 ਦੇ ਉਹ ਪਹਿਲੇ ਦੋ ਮਰੀਜ਼ ਜਿਨ੍ਹਾਂ ਉੱਤੇ ਪਲਾਜ਼ਮਾ ਟਰਾਂਸਫਿਊਜ਼ਨ ਕੀਤੇ ਗਏ ਸਨ, ਦੀ ਸਿਹਤ ਵਿੱਚ ਸੁਧਾਰ ਹੁੰਦਾ ਨਜ਼ਰ ਆ ਰਿਹਾ ਹੈ।
ਹੁਣ ਔਂਟੈਰੀਓ ਅਤੇ ਕਿਊਬੈੱਕ ਦੀਆਂ ਦਰਜਨਾਂ ਥਾਵਾਂ ਤੇ ਪਲਾਜ਼ਮਾ ਟਰਾਂਸਫਿਊਜ਼ਨ ਦੇ ਪ੍ਰਯੋਗ ਕਰਨ ਦੀ ਯੋਜਨਾ ਹੈ।
15 ਮਈ ਨੂੰ ਮੌਂਟਰੀਆਲ ਦੀ ਜਿਸ ਮਹਿਲਾ ਮਰੀਜ਼ ਉੱਤੇ ਸਭ ਤੋਂ ਪਹਿਲਾਂ ਇਹ ਟਰਾਂਸਫਿਊਜ਼ਨ ਕੀਤੀ ਗਈ, ਉਸ ਦੀ ਹਾਲਤ ਬੇਹਤਰ ਹੁੰਦੀ ਦੱਸੀ ਗਈ ਹੈ।
ਪਹਿਲਾਂ ਇੰਟੈਂਸਿਵ ਕੇਅਰ ਵਿੱਚ ਦਾਖਲ ਔਰਤ ਨੂੰ ਹੁਣ ਉਥੋਂ ਰਿਲੀਜ਼ ਕਰ ਦਿੱਤਾ ਗਿਆ ਹੈ।
ਟੋਰੌਂਟੋ ਵਿੱਚ 78 ਸਾਲਾ ਮਰੀਜ਼ ਜੋ ਕਿ 22 ਮਈ ਨੂੰ ਇਹ ਟ੍ਰਾਂਸਫਿਊਜ਼ਨ ਕਰਵਾਉਣ ਵਾਲਾ ਦੂਜਾ ਵਿਅਕਤੀ ਸੀ, ਦੇ ਵੀ ਪੂਰੀ ਤਰ੍ਹਾਂ ਠੀਕ ਹੋ ਜਾਣ ਦਾ ਅੰਦਾਜ਼ਾ ਹੈ।
ਇਹ ਉਮੀਦ ਕੀਤੀ ਜਾ ਰਹੀ ਹੈ ਕਿ ਇੱਕ ਵਿਅਕਤੀ ਦੀਆਂ ਐਂਟੀਬੌਡੀਜ਼ ਪੀੜਤ ਮਰੀਜ਼ ਦੇ ਉਦੋਂ ਤੱਕ ਕੰਮ ਆ ਸਕਣਗੀਆਂ ਜਦ ਤੱਕ ਉਸ ਦੇ ਸਰੀਰ ਵਿੱਚ ਆਪ ਵਾਇਰਸ ਦਾ ਮੁਕਾਬਲਾ ਕਰਨ ਵਾਲੀਆਂ ਐਂਟੀਬੌਡੀਜ਼ ਨਹੀਂ ਬਣ ਜਾਂਦੀਆਂ।
ਕੱਲ੍ਹ ਤੱਕ ਤਕਰੀਬਨ ਪੰਜ ਮਰੀਜ਼ਾਂ ਤੇ ਇਹ ਟਰਾਂਸਫਿਊਜ਼ਨ ਕੀਤੇ ਜਾ ਚੁੱਕੇ ਸਨ ਅਤੇ ਹੋਰ ਟਰਾਇਲ ਰੋਜ਼ਾਨਾ ਕਰਨ ਦੀ ਯੋਜਨਾ ਹੈ।
ਖੋਜ ਕਰਤਾਵਾਂ ਵੱਲੋਂ 60 ਮੈਡੀਕਲ ਸੈਂਟਰਾਂ ਦੇ 12,00 ਮਰੀਜ਼ਾਂ ਨੂੰ ਸਟੱਡੀ ਕਰਨ ਦੀ ਉਮੀਦ ਕੀਤੀ ਜਾ ਰਹੀ ਹੈ ਜਿਨ੍ਹਾਂ ਵਿੱਚੋਂ 800 ਨੂੰ ਟ੍ਰਾਂਸਫਿਊਜ਼ਨ ਦਿੱਤੇ ਜਾਣਗੇ ਅਤੇ 400 ਅਜਿਹੇ ਕੰਟਰੋਲ ਗਰੁੱਪ ਦਾ ਹਿੱਸਾ ਹੋਣਗੇ ਜਿਨ੍ਹਾਂ ਨੂੰ ਕੋਈ ਟਰਾਂਸਫਿਊਜ਼ਨ ਨਹੀਂ ਦਿੱਤੀ ਜਾਵੇਗੀ।
ਇਸ ਟਰਾਇਲ ਨੂੰ ਵੀਕਐਂਡ ਤੱਕ 20 ਹਸਪਤਾਲਾਂ ਤੱਕ ਪਹੁੰਚਾਉਣ ਦਾ ਟੀਚਾ ਹੈ ਜਿਨ੍ਹਾਂ ਵਿੱਚੋਂ ਜ਼ਿਆਦਾਤਰ ਔਂਟੈਰੀਓ ਦੇ ਵਿੱਚ ਹਨ, ਕੁਝ ਕਿਊਬੈੱਕ ਦੇ ਵਿੱਚ ਅਤੇ ਤਿੰਨ ਨਿਊਯਾਰਕ ਵਿੱਚ ਹਨ।
