ਐਲਬਰਟਾ ਦੀ ਲੇਕ ਵਿਚ ਡੁੱਬਣ ਕਾਰਨ ਲਾਪਤਾ ਹੋਏ ਦੋ ਵਿਅਕਤੀਆਂ ਦੀਆਂ ਲਾਸ਼ਾਂ ਬਰਾਮਦ

ਐਲਬਰਟਾ ਦੇ ਅਪਰ ਕਨਾਨਾਸਕਿਸ ਲੇਕ ਵਿਚ ਡੁੱਬਣ ਕਾਰਨ ਲਾਪਤਾ ਹੋਏ ਦੋ ਵਿਅਕਤੀਆਂ ਦੀਆਂ ਲਾਸ਼ਾਂ ਮਿਲੀਆਂ ਹਨ। 33 ਸਾਲਾ ਵਿਅਕਤੀ ਅਤੇ 34 ਸਾਲਾ ਔਰਤ ਦੀ ਭਾਲ 26 ਅਗਸਤ ਤੋਂ ਕੀਤੀ ਜਾ ਰਹੀ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਕਿਸ਼ਤੀ ਵਿਚ 4 ਜਾਣੇ ਸਵਾਰ ਸਨ ਅਤੇ ਇਸ ਦੇ ਡੁੱਬਣ ਕਾਰਨ ਸਭ ਫਸ ਗਏ ਸਨ। ਇਨ੍ਹਾਂ ਵਿਚੋਂ ਇਕ ਔਰਤ ਅਤੇ ਵਿਅਕਤੀ ਨੂੰ ਕਿਸ਼ਤੀਆਂ ਅਤੇ ਪੈਡਲਬੋਰਡ ਦੀ ਮਦਦ ਨਾਲ ਸੁਰੱਖਿਅਤ ਬਚਾਅ ਲਿਆ ਗਿਆ ਸੀ।

ਬੈਨਫ ਦੀ ਰਹਿਣ ਵਾਲੀ ਔਰਤ ਅਤੇ ਕੈਨਮੋਰ ਦੇ ਰਹਿਣ ਵਾਲੇ ਵਿਅਕਤੀ ਦੀਆਂ ਲਾਸ਼ਾਂ ਵੀਰਵਾਰ ਮਿਲੀਆਂ। ਪੁਲਿਸ ਮੁਤਾਬਕ ਅੰਡਰਵਾਟਰ ਸਰਚ ਟੀਮ ਅਤੇ ਕਨਾਨਾਸਕਿਸ ਮਾਊਂਟੇਨ ਰੈਸਕਿਊ ਨੇ ਇਸ ਲਈ ਮਦਦ ਕੀਤੀ। ਇਹ ਜਾਣਕਾਰੀ ਨਹੀਂ ਮਿਲੀ ਕਿ ਕਿਸ਼ਤੀ ਕਿਵੇਂ ਡੁੱਬੀ ਪਰ ਦੱਸਿਆ ਜਾ ਰਿਹਾ ਹੈ ਕਿ 4 ਵਿਚੋਂ ਕਿਸੇ ਨੇ ਵੀ ਲਾਈਫ ਜੈਕਟਾਂ ਨਹੀਂ ਪਾਈਆਂ ਸਨ।

ਪੁਲਿਸ ਨੇ ਕਿਸੇ ਦੀ ਵੀ ਪਛਾਣ ਅਜੇ ਸਾਂਝੀ ਨਹੀਂ ਕੀਤੀ। ਗੌਰਤਲਬ ਹੈ ਕਿ 16 ਅਗਸਤ ਨੂੰ ਇਸੇ ਤਰ੍ਹਾਂ ਬੈਰੀਅਰ ਲੇਕ ਵਿਚ ਕਿਸ਼ਤੀ ਡੁੱਬਣ ਕਾਰਨ ਕੈਲਗਰੀ ਦੇ ਦੋ ਵਿਅਕਤੀਆਂ ਦੀ ਮੌਤ ਹੋ ਗਈ ਸੀ।