ਸੰਸਦ ਹਾਊਸ ਕਮੇਟੀ ਵਿੱਚ ਅਰਾਈਵਕੈਨ ਐਪ ’ਤੇ ਕੀਤੀ ਜਾਵੇਗੀ ਪੁੱਛਗਿੱਛ

ਕੈਨੇਡਾ ਦੇ ਸਿਆਸੀ ਮਾਹੌਲ ਨੂੰ ਗਰਮਾਉਣ ਵਾਲੇ ਅਰਾਈਵਕੈਨ ਐਪ ਘੋਟਾਲੇ ਦੇ ਸਬੰਧ ਵਿਚ ਅੱਜ ਜੀ.ਸੀ. ਸਟੈਟਜੀਸ ਦੇ ਪਾਰਟਨਰ ਕ੍ਰਿਸਟੀਅਨ ਫਰਥ ਕੋਲੋਂ ਹਾਊਸ ਆਫ਼ ਕਾਮਨ ਦੀ ਕਮੇਟੀ ਵਲੋਂ ਪੁੱਛਗਿੱਛ ਕੀਤੀ ਜਾ ਰਹੀ ਹੈ। ਇਹ ਤੀਜੀ ਵਾਰ ਹੈ ਜਦੋਂ ਉਹ ਹਾਊਸ ਦੀ ਮੈਂਬਰ ਪਾਰਲੀਮੈਂਟ ਕਮੇਟੀ ਸਾਹਮਣੇ ਪੇਸ਼ ਹੋ ਰਹੇ ਹਨ। ਫਰਥ ਦੇ ਕਾਰੋਬਾਰੀ ਸਾਥੀ ਡੈਰੇਨ ਐਂਥਨੀ ਨੂੰ ਇਸ ਸਬੰਧ ਵਿਚ ਪੁੱਛਗਿੱਛ ਲਈ ਵੀਰਵਾਰ ਬੁਲਾਇਆ ਗਿਆ ਹੈ।

ਜੀ.ਸੀ. ਸਟੈਟਜੀਸ ਵਿਚ ਫਰਥ ਅਤੇ ਐਂਥਨੀ ਸਿਰਫ ਦੋ ਹੀ ਸਟਾਫ ਮੈਂਬਰ ਸਨ, ਇਸ ਫਰਮ ਦਾ ਐਪ ਨੂੰ ਬਣਾਉਣ ਵਿਚ ਕੋਈ ਯੋਗਦਾਨ ਨਹੀਂ ਪਰ ਫੈਡਰਲ ਸਰਕਾਰ ਵਲੋਂ ਇਸ ਪ੍ਰੋਜੈਕਟ ਦੇ ਕੁਝ ਹਿੱਸਿਆਂ ਨੂੰ ਪੂਰਾ ਕਰਨ ਦਾ ਕੰਮ ਜੀ.ਸੀ. ਸਟੈਟਜੀਸ ਨੂੰ ਸੌਂਪਿਆ ਗਿਆ ਸੀ। ਫਰਥ ਦਾ ਕਹਿਣਾ ਹੈ ਕਿ ਪੂਰੇ ਪ੍ਰੋਜੈਕਟ ਦੇ ਬਜਟ ਅਤੇ ਲਾਗਤ ਕੰਟਰੋਲ ਦੀ ਜ਼ਿੰਮੇਵਾਰੀ ਫੈਡਰਲ ਸਰਕਾਰ ਦੀ ਸੀ।

ਇੱਕ ਰਿਪੋਰਟ ਮੁਤਾਬਕ, ਜੀ.ਸੀ. ਸਟੈਟਜੀਸ ਅਰਾਈਵਕੈਨ ਐਪ ਪ੍ਰੋਜੈਕਟ ਦੇ ਪ੍ਰਮੁੱਖ ਠੇਕੇਦਾਰਾਂ ਵਿਚੋਂ ਇੱਕ ਸੀ ਅਤੇ ਇਸ ਨੂੰ ਲਗਭਗ $20 ਮਿਲੀਅਨ ਪ੍ਰਾਪਤ ਹੋਏ ਸਨ।

ਆਡੀਟਰ ਜਨਰਲ ਦੀ ਜਾਂਚ ਇਸ ਵਿਚ ਸਭ ਤੋਂ ਹੈਰਾਨ ਕਰਨ ਵਾਲੀ ਹੈ ਜਿਸ ਦਾ ਕਹਿਣਾ ਹੈ ਕਿ ਸਰਕਾਰ ਦੇ ਕਈ ਪੱਧਰਾਂ ’ਤੇ ਵਿੱਤੀ ਰਿਕਾਰਡ ਵਿਚ ਗੜਬੜੀ ਦੇ ਚੱਲਦੇ ਪੂਰੇ ਪ੍ਰੋਜੈਕਟ ਦੀ ਅਸਲ ਲਾਗਤ ਪਤਾ ਨਹੀਂ ਲਗਾਈ ਜਾ ਸਕੀ ਪਰ ਮੋਟੇ ਅਨੁਮਾਨ ਮੁਤਾਬਕ, ਜਿਸ ਅਰਾਈਵਕੈਨ ਐਪ ਲਈ $80,000 ਖ਼ਰਚ ਹੋਣੇ ਸਨ ਉਸ ਦੀ ਲਾਗਤ $60 ਮਿਲੀਅਨ ਤੱਕ ਪਹੁੰਚ ਗਈ।