24.03C Vancouver 24.03C VancouverOct 13, 2022 8:13 PM - Connect News
ਐਸਕੌਰਟ ਸਰਵਿਸ ਭਾਲਦੇ ਮਰਦਾਂ ਨੂੰ ਡਰੱਗ ਦੇਣ ਅਤੇ ਫਿਰ ਡਕੈਤੀ ਦਾ ਨਿਸ਼ਾਨਾ ਬਣਾਉਣ ਦੇ ਮਾਮਲੇ 'ਚ ਵੈਨਕੂਵਰ ਦੀ ਇੱਕ ਔਰਤ 'ਤੇ ਦੋਸ਼ ਲੱਗੇ ਹਨ।
ਇਸ ਔਰਤ 'ਤੇ ਮੈਨਸਲੌਟਰ ਦੇ ਦੋਸ਼ ਵੀ ਲੱਗੇ ਹਨ।
ਸਰੀ ਆਰ.ਸੀ.ਐਮ.ਪੀ. ਦਾ ਕਹਿਣਾ ਹੈ ਕਿ ਦੋਸ਼ਾਂ ਦਾ ਸਾਹਮਣਾ ਕਰ ਰਹੀ ਔਰਤ ਦੀ ਉਮਰ 30 ਸਾਲ ਅਤੇ ਉਸ ਦਾ ਨਾਮ ਜੈਸਿਕਾ ਨਿਕੋਲ ਰੈਨੀ ਕੇਨ ਹੈ।
ਕਰੀਬ ਇੱਕ ਸਾਲ ਤਕ ਚੱਲੀ ਜਾਂਚ ਤੋਂ ਬਾਅਦ ਇਸ ਔਰਤ 'ਤੇ ਦੋਸ਼ ਤੈਅ ਕੀਤੇ ਗਏ ਹਨ।
ਸਿਤੰਬਰ 2021 'ਚ ਪੁਲਿਸ ਨੇ ਕਈ ਰਿਪੋਰਟਸ 'ਤੇ ਕੰਮ ਕਰਨਾ ਸ਼ੁਰੂ ਕੀਤਾ ਜਿੱਥੇ ਕੁਝ ਮਰਦਾਂ ਦਾ ਕਹਿਣਾ ਸੀ ਕਿ ਉਹ ਐਸਕੌਰਟ ਸੇਵਾ ਹਾਸਿਲ ਕਰਨ ਗਏ ਸਨ ਪਰ ਉਨ੍ਹਾਂ ਨੂੰ ਕੁਝ ਨਸ਼ੀਲਾ ਪਦਾਰਥ ਦੇ ਦਿੱਤਾ ਗਿਆ ਅਤੇ ਉਨ੍ਹਾਂ ਦਾ ਕੀਮਤੀ ਸਾਮਾਨ 'ਤੇ ਡਾਕਾ ਮਾਰਿਆ ਗਿਆ।
ਇਸੇ ਦੌਰਾਨ ਬੀਤੇ ਸਾਲ ਫਰਵਰੀ 'ਚ ਇੱਕ ਆਦਮੀ ਦੀ ਮੌਤ ਵੀ ਹੋ ਗਈ ਸੀ ਅਤੇ ਉਸ ਨੂੰ ਕਥਿਤ ਤੌਰ 'ਤੇ ਕੋਈ ਨਸ਼ੀਲਾ ਪਦਾਰਥ ਦਿੱਤਾ ਗਿਆ ਸੀ।
ਪੁਲਿਸ ਨੇ ਸਰੀ, ਬਰਨਬੀ, ਲੈਂਗਲੀ ਅਤੇ ਵੈਨਕੂਵਰ 'ਚ ਵਾਪਰੀਆਂ ਇਸ ਪ੍ਰਕਾਰ ਦੀਆਂ ਘਟਨਾਵਾਂ 'ਚ ਇੱਕ ਸ਼ੱਕੀ ਦੀ ਪਛਾਣ ਕੀਤੀ।
ਇਸ ਮਾਮਲੇ 'ਚ 20 ਸਿਤੰਬਰ ਨੂੰ ਕੇਨ ਨਾਮ ਦੀ ਔਰਤ ਨੂੰ ਗ੍ਰਿਫਤਾਰ ਕੀਤਾ ਗਿਆ।
ਇਸ ਔਰਤ 'ਤੇ ਮੈਨਸਲੌਟਰ ਦਾ ਇੱਕ ਦੋਸ਼, ਖਤਰਨਾਕ ਡਰੱਗਸ ਦੇਣ ਸੰਬੰਧੀ 7 ਦੋਸ਼, 5,000 ਤੋਂ ਵਧ ਦੀ ਡਕੈਤੀ ਦੇ 6 ਦੋਸ਼, ਚੋਰੀ ਦਾ ਇੱਕ ਦੋਸ਼, ਧੋਖਾਧੜੀ ਦੇ 4 ਦੋਸ਼ ਅਤੇ ਐਕਸਟੌਰਸ਼ਨ ਦੇ 2 ਦੋਸ਼ ਲੱਗੇ ਹਨ।
ਪੁਲਿਸ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਜੇਕਰ ਕਿਸੇ ਹੋਰ ਵਿਅਕਤੀ ਨਾਲ ਅਜਿਹੀ ਘਟਨਾ ਵਾਪਰੀ ਹੈ ਜਾਂ ਕਿਸੇ ਕੋਲ ਇਸ ਬਾਰੇ ਕੋਈ ਜਾਣਕਾਰੀ ਹੈ ਤਾਂ ਦੱਸਿਆ ਜਾਵੇ।
