8.32C Vancouver 8.32C VancouverJun 29, 2022 2:42 PM - ANI
ਰਾਜਸਥਾਨ ਦੇ ਉਦੈਪੁਰ ਵਿਚ ਦੋ ਵਿਅਕਤੀਆਂ ਵੱਲੋਂ ਇੱਕ ਦਰਜ਼ੀ ਕਨ੍ਹਈਆ ਲਾਲ ਦਾ ਸਿਰ ਕਲਮ ਕਰਨ ਦੀ ਵਾਰਦਾਤ ਨੇ ਜਨਤਕ ਰੋਸ਼ ਪੈਦਾ ਕਰ ਦਿੱਤਾ ਹੈ। ਭਾਜਪਾ ਤੋਂ ਮੁਅੱਤਲ ਕੀਤੀ ਗਈ ਨੂਪੁਰ ਸ਼ਰਮਾ ਦੇ ਸਮਰਥਨ ਵਿਚ ਇੱਕ ਪੋਸਟ ਪਾਉਣ 'ਤੇ ਇਸ ਘਿਨੋਣੀ ਵਾਰਦਾਤ ਨੂੰ ਅੰਜ਼ਾਮ ਦਿੱਤਾ ਗਿਆ। ਕਨ੍ਹਈਆ ਲਾਲ ਦੀ ਭਿਆਨਕ ਅਤੇ ਬੇਰਹਿਮੀ ਨਾਲ ਹੱਤਿਆ 'ਤੇ ਪ੍ਰਤੀਕਿਰਿਆ ਜ਼ਾਹਰ ਕਰਦਿਆਂ ਉਨ੍ਹਾਂ ਦੀ ਪਤਨੀ ਯਸ਼ੋਦਾ ਨੇ ਦੋਸ਼ੀਆਂ ਨੂੰ ਫਾਂਸੀ ਦੀ ਸਜ਼ਾ ਦੇਣ ਦੀ ਮੰਗ ਕੀਤੀ ਹੈ।
ਕਨ੍ਹਈਆ ਲਾਲ ਦਾ ਬੁੱਧਵਾਰ ਨੂੰ ਰਾਜਸਥਾਨ ਦੇ ਉਦੈਪੁਰ ਵਿੱਚ ਵੱਡੀ ਗਿਣਤੀ ਵਿੱਚ ਲੋਕਾਂ ਦੀ ਮੌਜੂਦਗੀ ਵਿਚ ਸਸਕਾਰ ਹੋਇਆ।
ਇਸ ਦੌਰਾਨ ਲੋਕਾਂ ਨੇ ਦੋਸ਼ੀਆਂ ਨੂੰ ਫਾਂਸੀ ਦੀ ਸਜ਼ਾ ਦੀ ਮੰਗ ਕਰਦੇ ਹੋਏ ਨਾਅਰੇਬਾਜ਼ੀ ਕੀਤੀ।
ਕਨ੍ਹਈਆ ਲਾਲ ਦੀ ਪਤਨੀ ਯਸ਼ੋਦਾ ਨੇ ਦੱਸਿਆ ਕਿ ਪਿਛਲੇ 10-15 ਦਿਨਾਂ ਤੋਂ ਉਸ ਦੇ ਪਤੀ ਨੂੰ ਜਾਨੋਂ ਮਾਰਨ ਦੀਆਂ ਧਮਕੀਆਂ ਮਿਲ ਰਹੀਆਂ ਸਨ। ਲੋਕ ਉਸ ਨੂੰ ਧਮਕੀਆਂ ਦੇਣ ਲਈ ਘਰ ਅਤੇ ਦੁਕਾਨ ਦੋਵਾਂ 'ਤੇ ਆਉਂਦੇ ਸਨ। ਫ਼ੋਨ 'ਤੇ ਵੀ ਧਮਕੀਆਂ ਮਿਲਦੀਆਂ ਸਨ।
ਬੀਤੇ ਕੱਲ੍ਹ ਜਦੋਂ ਕਨ੍ਹਈਆ ਲਾਲ ਨੇ ਆਪਣੀ ਦੁਕਾਨ ਖੋਲ੍ਹੀ ਤਾਂ ਦੋ ਵਿਅਕਤੀਆਂ ਨੇ ਗਾਹਕ ਦੇ ਰੂਪ ਵਿਚ ਆ ਕੇ ਵਾਰਦਾਤ ਨੂੰ ਅੰਜ਼ਾਮ ਦਿੱਤਾ ਅਤੇ ਵੀਡੀਓ ਵੀ ਬਣਾਈ। ਕਨ੍ਹਈਆ ਨੇ ਪੁਲਿਸ ਨੂੰ ਧਮਕੀਆਂ ਦੇਣ ਦੀ ਸ਼ਿਕਾਇਤ ਵੀ ਦਰਜ ਕਰਵਾਈ ਹੋਈ ਸੀ। ਵੀਡੀਓ ਵਿਚ ਨਜ਼ਰ ਆਏ ਦੋਵੇਂ ਵਿਅਕਤੀਆਂ ਨੂੰ ਬੀਤੀ ਰਾਤ ਗ੍ਰਿਫ਼ਤਾਰ ਕੀਤਾ ਜਾ ਚੁੱਕਾ ਹੈ। ਹਮਲਾਵਰਾਂ ਨੇ ਵੀਡੀਓ ਵਿਚ ਆਪਣੀ ਪਛਾਣ ਰਿਆਜ਼ ਅਖਤਾਰੀ ਅਤੇ ਗੌਸ ਮੁਹੰਮਦ ਵਜੋਂ ਦੱਸੀ ਸੀ।
