29.63C Vancouver 29.63C VancouverJun 23, 2021 3:33 PM -
ਨੋਵਾ ਸਕੋਸ਼ਿਆ ਵਿੱਚ ਕੋਵਿਡ -19 ਸੰਬੰਧੀ ਪਾਬੰਦੀਆਂ ਦੇ ਵਿਰੋਧ ਵਿੱਚ ਕੀਤੇ ਜਾ ਰਹੇ ਪ੍ਰਦਰਸ਼ਨ ਕਾਰਣ ਨਿਊ ਬਰਨਸਵਿੱਕ ਦੀ ਸੀਮਾ ’ਤੇ ਟ੍ਰਾਂਸ-ਕੈਨੇਡਾ ਹਾਈਵੇਅ ਦੋਵੇਂ ਦਿਸ਼ਾਵਾਂ ਵਿੱਚ ਬੰਦ ਹੈ।
ਨੋਵਾ ਸਕੋਸ਼ਿਆ ਨੇ ਅਟਲਾਂਟਿਕ ਸੂਬਿਆਂ ਤੋਂ ਆ ਰਹੇ ਯਾਤਰੀਆਂ ਲਈ ਸੂਬੇ ਨੂੰ ਖੋਲ ਦਿੱਤਾ ਹੈ ਪਰ ਨਿਊ ਬਰਨਸਵਿੱਕ ਤੋਂ ਸੂਬੇ ਵਿੱਚ ਦਾਖ਼ਲ ਹੋਣ ਵਾਲੇ ਲੋਕਾਂ ’ਤੇ ਪਾਬੰਦੀਆਂ ਖਿਲਾਫ ਇਹ ਰੋਸ ਮੁਜ਼ਾਹਰਾ ਕੀਤਾ ਜਾ ਰਿਹਾ ਹੈ।
ਕੱਲ ਮੰਗਲਵਾਰ ਨੂੰ ਨੋਵਾ ਸਕੋਸ਼ਿਆ ਸਰਕਾਰ ਨੇ ਇਹ ਐਲਾਨ ਕੀਤਾ ਸੀ ਕਿ ਨਿਊ ਬਰਨਸਵਿੱਕ ਤੋਂ ਆ ਰਹੇ ਯਾਤਰੀਆਂ ਨੂੰ ਸੂਬੇ ਵਿੱਚ ਦਾਖ਼ਲ ਹੋਣ ਤੋਂ ਬਾਅਦ ਟੀਕਾਕਰਣ ਅਤੇ ਕੋਵਿਡ -19 ਦੇ ਟੈਸਟ ਦੇ ਨਤੀਜੇ ਦੇ ਅਧਾਰ ’ਤੇ ਇਕਾਂਤਵਾਸ ਵਿੱਚ ਰਹਿਣਾ ਪਵੇਗਾ ਜੱਦ ਕਿ ਪੀ.ਈ.ਆਈ. ਅਤੇ ਨਿਊਫੰਡਲੈਂਡ ਅਤੇ ਲੈਬਰਾਡੋਰ ਦੇ ਮੁਸਾਫ਼ਰਾਂ ’ਤੇ ਟੈਸਟਿੰਗ ਅਤੇ ਆਈਸੋਲੇਸ਼ਨ ਦੇ ਅਜਿਹੇ ਨਿਯਮ ਲਾਗੂ ਨਹੀਂ ਹਨ।
ਪ੍ਰੀਮੀਅਰ ਇਅੰਨ ਰੈਂਕਿਨ ਮੁਤਾਬਕ ਇਹ ਕਦਮ ਲਾਜ਼ਮੀ ਹੈ ਕਿਉਂਕਿ ਨਿਊ ਬਰਨਸਵਿੱਕ ਨੇ ਪਿੱਛਲੇ ਹਫਤੇ ਸੂਬੇ ਨੂੰ ਕੋਵਿਡ -19 ਦੀ ਵੈਕਸੀਨ ਦੀ ਪਹਿਲੀ ਖੁਰਾਕ ਹਾਸਿਲ ਕਰ ਚੁੱਕੇ ਕਨੇਡੀਅਨ ਯਾਤਰੀਆਂ ਲਈ ਬਿਨਾਂ ਇਕਾਂਤਵਾਸ ਦੇ ਖੋਲਣ ਦਾ ਐਲਾਨ ਕੀਤਾ ਹੈ।
ਪੁਲਿਸ ਨੂੰ ਆਸ ਹੈ ਕਿ ਪ੍ਰਦਰਸ਼ਨਕਾਰੀਆਂ ਨਾਲ ਗੱਲਬਾਤ ਕਰ ਮਸਲੇ ਨੂੰ ਸੁਲਝਾਇਆ ਜਾ ਸਕੇਗਾ ਤਾਂ ਕਿ ਹਾਈਵੇਅ ’ਤੇ ਆਵਾਜਾਈ ਵਿੱਚ ਪੈ ਰਹੀ ਰੁਕਾਵਟ ਨੂੰ ਦੂਰ ਕੀਤਾ ਜਾ ਸਕੇ।
