ਪੀ.ਐਮ. ਕਾਰਨੀ ਅੱਜ ਹੋਰ ਨੇਤਾਵਾਂ ਨਾਲ ਟੰਬਲਰ ਰਿਜ 'ਚ ਹੋਣ ਵਾਲੇ ਕਮਿਊਨਿਟੀ ਵਿਜਲ ਵਿਚ ਹੋਣਗੇ ਸ਼ਾਮਲ

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਅਤੇ ਹੋਰ ਫੈਡਰਲ ਪਾਰਟੀ ਦੇ ਆਗੂ ਅੱਜ ਸ਼ਾਮ ਟੰਬਲਰ ਰਿਜ ਵਿਚ ਹੋਣ ਵਾਲੇ ਕਮਿਊਨਿਟੀ ਵਿਜਲ ਵਿਚ ਸ਼ਾਮਲ ਹੋਣਗੇ। ਪ੍ਰਧਾਨ ਮੰਤਰੀ ਦਾ ਇਹ ਦੌਰਾ ਸਮੂਹਿਕ ਗੋਲੀਬਾਰੀ ਦੇ ਤਿੰਨ ਦਿਨਾਂ ਬਾਅਦ ਹੋ ਰਿਹਾ ਹੈ। ਸ਼ੂਟਰ ਸਮੇਤ ਇਸ ਘਟਨਾ ਵਿਚ ਕੁੱਲ ਨੌ ਲੋਕਾਂ ਦੀ ਮੌਤ ਹੋਈ ਸੀ।

ਸ਼ਹਿਰ ਦੇ ਮੇਅਰ ਦੇ ਸੱਦੇ 'ਤੇ ਪਹੁੰਚ ਰਹੇ ਪੀ. ਐੱਮ. ਕਾਰਨੀ ਨੇ ਹੋਰਨਾਂ ਸਿਆਸੀ ਪਾਰਟੀਆਂ ਦੇ ਆਗੂਆਂ ਨੂੰ ਵੀ ਇਸ ਦੁੱਖ ਦੀ ਘੜੀ ਵਿਚ ਸ਼ਾਮਲ ਹੋਣ ਦਾ ਸੱਦਾ ਦਿੱਤਾ ਸੀ, ਜਿਸ ਮਗਰੋਂ ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ , ਬਲਾਕ ਕਿਊਬੈਕਵਾ ਲੀਡਰ ਯਵੇਸ-ਫ੍ਰੈਂਕੋਇਸ ਬਲੈਂਚੇਟ, ਐਨ.ਡੀ.ਪੀ. ਅੰਤਰਿਮ ਲੀਡਰ ਡੌਨ ਡੇਵਿਸ ਅਤੇ ਗ੍ਰੀਨ ਪਾਰਟੀ ਦੀ ਲੀਡਰ ਐਲਿਜ਼ਾਬੈਥ ਮੇਅ ਨੇ ਇਸ ਸੋਗ ਸਭਾ ਵਿਚ ਸ਼ਾਮਲ ਹੋਣ ਦੀ ਪੁਸ਼ਟੀ ਕੀਤੀ ਹੈ।

ਗੌਰਤਲਬ ਹੈ ਕਿ ਪੁਲਿਸ ਵਲੋਂ ਜਾਰੀ ਵੇਰਵਿਆਂ ਅਨੁਸਾਰ, 18 ਸਾਲਾ ਹਮਲਾਵਰ ਜੈਸੀ ਵੈਨ ਰੂਟਸੇਲਰ ਨੇ ਮੰਗਲਵਾਰ ਨੂੰ ਪਹਿਲਾਂ ਆਪਣੇ ਘਰ ਵਿਚ ਆਪਣੀ ਮਾਂ ਅਤੇ 11 ਸਾਲਾ ਮਤਰੇਏ ਭਰਾ ਦਾ ਗੋਲੀਆਂ ਮਾਰ ਕੇ ਕਤਲ ਕੀਤਾ। ਇਸ ਤੋਂ ਬਾਅਦ ਸਕੂਲ ਵਿਚ ਜਾ ਕੇ ਫਾਇਰਿੰਗ ਕੀਤੀ, ਜਿਸ ਵਿਚ 12 ਤੋਂ 13 ਸਾਲ ਦੀ ਉਮਰ ਦੇ 5 ਵਿਦਿਆਰਥੀਆਂ ਅਤੇ ਇੱਕ ਐਜੂਕੇਸ਼ਨ ਅਸੀਸਟੈਂਟ ਦੀ ਮੌਤ ਹੋ ਗਈ।

ਇਸ ਘਟਨਾ ਵਿਚ ਦੋ ਦਰਜਨ ਤੋਂ ਵੱਧ ਹੋਰ ਵੀ ਜ਼ਖ਼ਮੀ ਹੋਏ ਸਨ, ਜਿਹਨਾਂ ਵਿਚੋਂ 12 ਸਾਲਾ ਮਾਸੂਮ ਬੱਚੀ ਮਾਇਆ ਗੇਬਾਲਾ ਦੀ ਹਾਲਤ ਬੇਹੱਦ ਨਾਜ਼ੁਕ ਹੈ ਅਤੇ ਉਹ ਹਸਪਤਾਲ ਵਿਚ ਜ਼ਿੰਦਗੀ ਤੇ ਮੌਤ ਦੀ ਲੜਾਈ ਲੜ ਰਹੀ ਹੈ। ਬੁੱਧਵਾਰ ਨੂੰ ਹਾਊਸ ਔਫ ਕੌਮਨਜ਼ ਵਿਚ ਵੀ ਕਾਰਨੀ ਸਮੇਤ ਸਾਰੇ ਆਗੂਆਂ ਨੇ ਪੀੜਤ ਪਰਿਵਾਰਾਂ ਨਾਲ ਇਕਜੁੱਟਤਾ ਪ੍ਰਗਟ ਕਰਦਿਆਂ ਹਰ ਸੰਭਵ ਸਹਾਇਤਾ ਦਾ ਭਰੋਸਾ ਦਿੱਤਾ ਸੀ।