12.06C Vancouver 12.06C VancouverJan 24, 2024 2:49 PM - The Canadian Press
ਐੱਨ.ਡੀ.ਪੀ. ਲੀਡਰ ਜਗਮੀਤ ਸਿੰਘ ਨੇ ਟਰੰਪ ਨੂੰ ਕੈਨੇਡਾ ਲਈ ਪ੍ਰੇਸ਼ਾਨੀ ਖੜ੍ਹੀ ਕਰਨ ਵਾਲੇ ਕਰਾਰ ਦਿੱਤਾ ਹੈ। ਐਡਮਿੰਟਨ ਵਿਚ ਪਾਰਟੀ ਦੀ ਬੈਠਕ ਦੌਰਾਨ ਉਨ੍ਹਾਂ ਕਿਹਾ ਕਿ ਅਮਰੀਕਾ ਦੇ ਸਾਬਕਾ ਰਾਸ਼ਟਰਪਤੀ ਡੋਨਲਡ ਟਰੰਪ ਜੇ ਦੂਜੀ ਵਾਰ ਵਾਈਟ ਹਾਊਸ ਵਿਚ ਵਾਪਸੀ ਕਰਦੇ ਹਨ ਤਾਂ ਉਹ ਕੈਨੇਡਾ ਲਈ ਮੁਸੀਬਤ ਪੈਦਾ ਕਰਨਗੇ।
ਜਗਮੀਤ ਸਿੰਘ ਨੇ ਟਰੰਪ ’ਤੇ ਨਿਸ਼ਾਨਾ ਵੀ ਸਾਧਿਆ ਅਤੇ ਉਨ੍ਹਾਂ ਨੂੰ ਅਹੰਕਾਰੀ ਕਰਾਰ ਦਿੱਤਾ। ਐੱਨ.ਡੀ.ਪੀ. ਦੇ ਪ੍ਰਧਾਨ ਨੇ ਕਿਹਾ ਕਿ ਟਰੰਪ ਨੂੰ ਵਾਪਸ ਆਉਂਦੇ ਦੇਖ ਸੱਚ ਵਿਚ ਪ੍ਰੇਸ਼ਾਨ ਹੋ ਰਹੀ ਹੈ।
ਜਗਮੀਤ ਸਿੰਘ ਦੀ ਇਹ ਟਿੱਪਣੀ ਉਸ ਸਮੇਂ ਆਈ ਹੈ ਜਦੋਂ ਟਰੰਪ ਨਿਊ ਹੈਂਪਸ਼ਾਇਰ ਵਿਚ ਨਿੱਕੀ ਹੈਲੀ ਨੂੰ ਹਰਾ ਕੇ ਰਾਸ਼ਟਰਪਤੀ ਅਹੁਦੇ ਲਈ ਰਿਪਬਲਿਕਨ ਉਮੀਦਵਾਰ ਵਜੋਂ ਆਪਣੀ ਪਕੜ ਮਜ਼ਬੂਤ ਕਰਦੇ ਦਿਸ ਰਹੇ ਹਨ। ਇਸ ਦੌੜ ਵਿਚ ਹੈਲੀ ਉਨ੍ਹਾਂ ਲਈ ਆਖਰੀ ਪ੍ਰਮੁੱਖ ਚੁਣੌਤੀ ਹੈ।
ਫਲੋਰੀਡਾ ਦੇ ਗਵਰਨਰ ਰੌਨ ਡੀਸੈਂਟਿਸ ਅਤੇ ਭਾਰਤੀ ਮੂਲ ਦੇ ਵਿਵੇਕ ਰਾਮਾਸਵਾਮੀ ਇਸ ਰੇਸ ਵਿਚੋਂ ਪਹਿਲਾਂ ਹੀ ਹਟ ਗਏ ਹਨ। ਗੌਰਤਲਬ ਹੈ ਕਿ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਵੀ ਬੀਤੇ ਕੱਲ੍ਹ ਕਿਹਾ ਸੀ ਕਿ ਟਰੰਪ ਦੀ ਵਾਪਸੀ ਕੈਨੇਡਾ ਲਈ ਮੁਸ਼ਕਲ ਪੈਦਾ ਕਰ ਸਕਦੀ ਹੈ ਕਿਉਂਕਿ ਉਨ੍ਹਾਂ ਦੇ ਪਹਿਲੇ ਕਾਰਜਕਾਲ ਵਿਚ ਵਪਾਰ ਨੂੰ ਲੈ ਕੇ ਕਾਫ਼ੀ ਤਕਰਾਰ ਹੋਈ ਸੀ।
ਜਗਮੀਤ ਸਿੰਘ ਨੇ ਕਿਹਾ ਕਿ ਟਰੰਪ ਨੇ ਜੋ ਕੁਝ ਕੀਤਾ ਹੈ ਅਤੇ ਜਿਸ ਕਿਸਮ ਦੇ ਉਹ ਵਿਅਕਤੀ ਹਨ ਉਨ੍ਹਾਂ ਦੀ ਤੁਲਨਾ ਲੋਕਤੰਤਰ ਲਈ ਬੁਰੇ ਕਿਸੇ ਹੋਰ ਵਿਅਕਤੀ ਨਾਲ ਨਹੀਂ ਹੋ ਸਕਦੀ।
ਓਧਰ, ਨਿੱਕੀ ਹੈਲੀ ਨੇ ਕਿਹਾ ਕਿ ਅਜੇ ਰੇਸ ਖਤਮ ਨਹੀਂ ਹੋਈ, ਹੋਰ ਵੀ ਸੂਬਿਆਂ ਵਿਚ ਇਲੈਕਸ਼ਨ ਬਚੇ ਹਨ, ਅਗਲਾ ਸੂਬਾ ਮੇਰਾ ਪਸੰਦੀਦਾ ਦੱਖਣੀ ਕੈਰੋਲੀਨਾ ਹੈ ਜਿੱਥੇ ਮੈਂ 24 ਫਰਵਰੀ ਨੂੰ ਪੂਰੀ ਤਾਕਤ ਲਗਾ ਦੇਵਾਂਗੀ।
