11.75C Vancouver 11.75C VancouverFeb 14, 2024 5:04 PM - The Canadian Press
ਕੈਨੇਡੀਅਨ ਕੋਲੇ ਦੇ ਪ੍ਰੋਡਕਸ਼ਨ ਵਿਚ ਉਛਾਲ ਕਾਰਨ ਐੱਨ.ਡੀ.ਪੀ. ਵਲੋਂ ਇਸ ਦੇ ਨਿਰਯਾਤ ’ਤੇ ਪਾਬੰਦੀ ਲਈ ਹਾਊਸ ਆਫ਼ ਕਾਮਨਜ਼ ਵਿਚ ਬਿੱਲ ਪੇਸ਼ ਕੀਤਾ ਜਾ ਰਿਹਾ ਹੈ। ਇਹ ਐੱਨ.ਡੀ.ਪੀ. ਦੀ ਵਾਤਾਵਰਣ ਆਲੋਚਕ ਲੌਰੇਲ ਕੋਲਿਨਸ ਦਾ ਪ੍ਰਾਈਵੇਟ ਮੈਂਬਰ ਬਿੱਲ ਹੈ।
ਉਨ੍ਹਾਂ ਕਿਹਾ ਕਿ ਜਲਵਾਯੂ ਸੰਕਟ ਉੱਤੇ ਕੋਲੇ ਦੇ ਪ੍ਰਭਾਵ ਨੂੰ ਦੇਖਦੇ ਹੋਏ ਇਹ ਸੱਚਮੁੱਚ ਨਿਰਾਸ਼ਾਜਨਕ ਹੈ ਕਿ ਕੈਨੇਡਾ ਨੇ 2022 ਵਿਚ 8 ਮਿਲੀਅਨ ਟਨ ਤੋਂ ਵੱਧ ਘਰੇਲੂ ਤੌਰ ’ਤੇ ਪੈਦਾ ਹੋਏ ਥਰਮਲ ਕੋਲੇ ਦੀ ਸਪਲਾਈ ਕੀਤੀ, ਜੋ ਕਿ 2021 ਦੇ ਮੁਕਾਬਲੇ 60 ਫੀਸਦੀ ਅਤੇ 2018 ਦੀ ਸਪਲਾਈ ਨਾਲੋਂ ਅੱਠ ਗੁਣਾ ਵੱਧ ਹੈ।
2022 ਵਿਚ ਕੈਨੇਡਾ ਨੇ ਕੁੱਲ 8.23 ਮਿਲੀਅਨ ਟਨ ਥਰਮਲ ਕੋਲਾ ਨਿਰਯਾਤ ਕੀਤਾ, ਜਿਸ ਨਾਲ 18 ਮਿਲੀਅਨ ਟਨ ਗ੍ਰੀਨਹਾਉਸ ਗੈਸ ਪੈਦਾ ਹੋਣ ਦਾ ਅਨੁਮਾਨ ਹੈ ਅਤੇ ਇਹ ਇੱਕ ਸਾਲ ਵਿਚ ਲਗਭਗ 4 ਮਿਲੀਅਨ ਯਾਤਰੀ ਵਾਹਨ ਦੇ ਪ੍ਰਦੂਸ਼ਣ ਦੇ ਬਰਾਬਰ ਬਣਦਾ ਹੈ।
ਲਿਬਰਲਸ ਸਰਕਾਰ ਨੇ ਸਾਰੇ ਸੂਬਿਆਂ ਨੂੰ ਕੋਲੋ ਨਾਲ ਚੱਲਣ ਵਾਲੇ ਪਾਵਰ ਪਲਾਂਟ 2030 ਤੱਕ ਬੰਦ ਕਰਨ ਲਈ ਕਿਹਾ ਹੈ ਅਤੇ ਕੋਲੇ ਦੀ ਘਰੇਲੂ ਮੰਗ ਵਿਚ ਹਾਲ ਹੀ ਦੇ ਸਾਲਾਂ ਵਿਚ ਪਹਿਲਾਂ ਹੀ ਕਮੀ ਆ ਚੁੱਕੀ ਹੈ ਪਰ ਇੰਟਰਨੈਸ਼ਨਲ ਡਿਮਾਂਡ ਕਾਫੀ ਵਧੀ ਹੈ, ਜੋ ਇੱਥੇ ਉਤਪਾਦਨ ਵਿਚ ਵਾਧੇ ਦਾ ਕਾਰਨ ਹੈ।
ਕੈਨੇਡਾ ਵਿਚ ਮੌਜੂਦਾ ਸਮੇਂ ਸਿਰਫ ਚਾਰ ਸੂਬੇ ਅਲਬਰਟਾ, ਸਸਕੈਚਵਨ, ਨੋਵਾ ਸਕੋਸ਼ੀਆ ਅਤੇ ਨਿਊ ਬਰੰਸਵਿਕ ਅਜੇ ਵੀ ਬਿਜਲੀ ਲਈ ਕੋਲੇ ’ਤੇ ਨਿਰਭਰ ਹਨ ਪਰ ਅਲਬਰਟਾ ਇਸ ਸਾਲ ਕਿਸੇ ਵੀ ਸਮੇਂ ਆਪਣਾ ਅੰਤਿਮ ਕੋਲੇ ਨਾਲ ਚੱਲਣ ਵਾਲਾ ਪਲਾਂਟ ਬੰਦ ਕਰਨ ਦੀ ਰਾਹ ’ਤੇ ਹੈ।
