ਕੈਨੇਡਾ ਪੋਸਟ, ਯੂਨੀਅਨ ਵਿਚਕਾਰ ਗੱਲਬਾਤ ਮੁੜ ਸ਼ੁਰੂ ਹੋਣ ਲਈ ਤਿਆਰ

ਕੈਨੇਡਾ ਪੋਸਟ ਅਤੇ ਪੋਸਟਲ ਵਰਕਰਜ਼ ਯੂਨੀਅਨ ਦੀ ਅੱਜ Bargaining Table 'ਤੇ ਵਾਪਸ ਗੱਲਬਾਤ ਹੋਵੇਗੀ। ਲੰਘੇ ਹਫ਼ਤੇ ਯੂਨੀਅਨ ਨੇ ਤਨਖ਼ਾਹਾਂ ਵਿਚ ਵਾਧੇ ਦੀ ਮੰਗ ਸਬੰਧੀ ਕ੍ਰਾਊਨ ਕਾਰਪੋਰੇਸ਼ਨ ਨੂੰ ਨਵਾਂ ਪ੍ਰਸਤਾਵ ਦਿੱਤਾ ਸੀ, ਜਿਸ 'ਤੇ ਪ੍ਰਤੀਕਿਰਿਆ ਨਾਲ ਹੀ ਅੱਗੇ ਦੀ ਦਿਸ਼ਾ ਤੈਅ ਹੋਵੇਗੀ।

ਇਸ ਵਿਚਕਾਰ ਕੈਨੇਡਾ ਪੋਸਟ ਦੀ ਇੱਕ ਬੁਲਾਰੇ ਨੇ ਬਿਆਨ ਵਿਚ ਕਿਹਾ ਕਿ ਡਿਪਾਰਟਮੈਂਟ ਸੰਘੀ ਵਿਚੋਲੇ ਰਾਹੀਂ ਕੈਨੇਡੀਅਨ ਯੂਨੀਅਨ ਆਫ਼ ਪੋਸਟਲ ਵਰਕਰਜ਼ ਨਾਲ ਕਿਸੇ ਸਮਝੌਤੇ 'ਤੇ ਪਹੁੰਚਣ ਲਈ ਵਚਨਬੱਧ ਹੈ।

ਲਗਭਗ 55,000 ਡਾਕ ਕਰਮਚਾਰੀਆਂ ਦੀ ਨੁਮਾਇੰਦਗੀ ਕਰਨ ਵਾਲੀ ਯੂਨੀਅਨ ਨੇ ਕੈਨੇਡਾ ਪੋਸਟ ਨੂੰ ਦਿੱਤੀ ਗਈ ਆਪਣੀ ਨਵੀਂ ਪੇਸ਼ਕਸ਼ ਵਿਚ 4 ਸਾਲਾਂ ਦੌਰਾਨ ਤਨਖਾਹਾਂ ਵਿਚ ਕੁੱਲ 19 ਫੀਸਦੀ ਵਾਧੇ ਦੀ ਮੰਗ ਕੀਤੀ ਹੈ, ਜਦੋਂ ਕਿ ਕੈਨੇਡਾ ਪੋਸਟ ਨੇ ਆਪਣੀ ਪਿਛਲੇ ਪ੍ਰਸਤਾਵ ਵਿਚ 13 ਫੀਸਦੀ ਵਾਧੇ ਦਾ ਆਫਰ ਦਿੱਤਾ ਸੀ, ਜਿਸ ਨੂੰ ਯੂਨੀਅਨ ਦੇ ਮੈਂਬਰਸ ਨੇ ਵੋਟਿੰਗ ਪ੍ਰਕਿਰਿਆ ਵਿਚ ਰੱਦ ਕਰ ਦਿੱਤਾ ਸੀ। ਗੌਰਤਲਬ ਹੈ ਕਿ ਦੋਵੇਂ ਧਿਰਾਂ ਵਿਚਕਾਰ ਨਵੇਂ ਸਮਝੌਤੇ ਲਈ ਗੱਲਬਾਤ ਲਗਭਗ ਡੇਢ ਸਾਲ ਤੋਂ ਚੱਲ ਰਹੀ ਹੈ।