ਨਾਹੀਦ ਨੈਨਸ਼ੀ ਨੇ ਫੈਡਰਲ ਐਨ.ਡੀ.ਪੀ. ਦੇ ਨਵੇਂ ਚੁਣੇ ਗਏ ਲੀਡਰ ਤੋਂ ਬਣਾਈ ਦੂਰੀ

ਐਲਬਰਟਾ ਦੀ ਐਨ.ਡੀ.ਪੀ. ਨੇਤਾ ਨਾਹੀਦ ਨੈਨਸ਼ੀ ਨੇ ਫੈਡਰਲ ਐਨ.ਡੀ.ਪੀ. ਦੇ ਨਵੇਂ ਚੁਣੇ ਗਏ ਲੀਡਰ ਐਵੀ ਲੇਵਿਸ ਤੋਂ ਦੂਰੀ ਬਣਾ ਲਈ ਹੈ। ਇਸ ਦਾ ਮੁੱਖ ਕਾਰਨ ਐਨਰਜੀ ਸੈਕਟਰ ਨੂੰ ਲੈ ਕੇ ਦੋਵਾਂ ਨੇਤਾਵਾਂ ਦੇ ਵੱਖੋ-ਵੱਖਰੇ ਵਿਚਾਰ ਹਨ।ਐਵੀ ਲੇਵਿਸ ਨੇ ਨਵੇਂ ਪਾਈਪਲਾਈਨ ਪ੍ਰੋਜੈਕਟਾਂ ਅਤੇ ਕੁਦਰਤੀ ਗੈਸ ਪ੍ਰੋਜੈਕਟਾਂ ਨੂੰ ਰੋਕਣ ਦਾ ਵਾਅਦਾ ਕੀਤਾ ਹੈ। ਉਹ ਤੇਜ਼ੀ ਨਾਲ ਸਾਫ਼ ਊਰਜਾ ਵੱਲ ਵਧਣਾ ਚਾਹੁੰਦੇ ਹਨ।

ਨੈਨਸ਼ੀ ਨੇ ਕਿਹਾ ਕਿ ਲੇਵਿਸ ਦੇ ਵਿਚਾਰ ਐਲਬਰਟਾ ਦੇ ਹਿੱਤ ਵਿੱਚ ਨਹੀਂ ਹਨ ਅਤੇ ਉਨ੍ਹਾਂ ਨੇ ਵੀ ਪਹਿਲਾਂ ਐਲਬਰਟਾ ਐਨ.ਡੀ.ਪੀ. ਸਰਕਾਰ ਦੀ ਹਾਰ 'ਤੇ ਖੁਸ਼ੀ ਜਤਾਈ ਸੀ। ਐਲਬਰਟਾ ਐਨ.ਡੀ.ਪੀ. ਤੇਲ ਅਤੇ ਗੈਸ ਉਤਪਾਦਨ ਨੂੰ ਵਧਾਉਣ ਅਤੇ ਟ੍ਰਾਂਸ ਮਾਊਂਟੇਨ ਪਾਈਪਲਾਈਨ ਦੀ ਵਰਤੋਂ ਦੇ ਪੱਖ ਵਿੱਚ ਹੈ। ਦੱਸ ਦੇਈਏ ਕਿ ਲੇਵਿਸ 56 ਫੀਸਦੀ ਵੋਟਾਂ ਲੈ ਕੇ ਜੇਤੂ ਰਹੇ।ਐਡਮਿੰਟਨ ਦੀ ਐਮ.ਪੀ.ਹੀਥਰ ਮੈਕਫਰਸਨ ਜੋ ਕਿ ਮੁੱਖ ਦਾਅਵੇਦਾਰ ਮੰਨੀ ਜਾ ਰਹੀ ਸੀ, 29 ਫੀਸਦੀ ਵੋਟਾਂ ਨਾਲ ਦੂਜੇ ਨੰਬਰ 'ਤੇ ਰਹੀ।

ਪ੍ਰੀਮੀਅਰ ਡੈਨੀਅਲ ਸਮਿਥ ਨੇ ਨਿਸ਼ਾਨਾ ਸਾਧਦੇ ਹੋਏ ਕਿਹਾ ਕਿ ਫੈਡਰਲ ਅਤੇ ਸੂਬਾਈ ਐਨ.ਡੀ.ਪੀ. ਇੱਕੋ ਸੰਵਿਧਾਨ ਨਾਲ ਜੁੜੀਆਂ ਹੋਈਆਂ ਹਨ, ਇਸ ਲਈ ਉਹ ਇੱਕ-ਦੂਜੇ ਤੋਂ ਵੱਖ ਨਹੀਂ ਹੋ ਸਕਦੀਆਂ। ਸਸਕੈਚਵਨ ਐਨ.ਡੀ.ਪੀ. ਨੇਤਾ ਨੇ ਵੀ ਲੇਵਿਸ ਤੋਂ ਦੂਰੀ ਬਣਾ ਲਈ ਹੈ ਕਿਉਂਕਿ ਉਨ੍ਹਾਂ ਦੀਆਂ ਨੀਤੀਆਂ ਸੂਬੇ ਦੇ ਕੁਦਰਤੀ ਸਰੋਤਾਂ ਦੇ ਖੇਤਰ ਵਿੱਚ ਲੱਗੇ 40,000 ਕਰਮਚਾਰੀਆਂ ਦੇ ਰੁਜ਼ਗਾਰ ਅਤੇ $13.6 ਬਿਲੀਅਨ ਦੀ ਸਾਲਾਨਾ ਆਰਥਿਕ ਗਤੀਵਿਧੀ ਲਈ ਖ਼ਤਰਾ ਹਨ।