ਵਿਕਟੋਰੀਆ ਦੇ ਇਨਰ ਹਾਰਬਰ 'ਤੇ ਇਸੇ ਗਰਮੀ ਰੁੱਤੇ ਨਵੇਂ ਫੈਰੀ ਟਰਮੀਨਲ ਦੀ ਕੰਸਟ੍ਰਕਸ਼ਨ ਹੋਵੇਗੀ ਸ਼ੁਰੂ

ਬੀਸੀ ਦੀ ਰਾਜਧਾਨੀ ਵਿਕਟੋਰੀਆ ਦੇ ਡਾਊਨਟਾਊਨ ਵਿਚ ਨਵੇਂ ਫੈਰੀ ਟਰਮੀਨਲ ਦੀ ਉਸਾਰੀ ਇਸ ਮਹੀਨੇ ਦੇ ਅਖੀਰ ਵਿਚ ਸ਼ੁਰੂ ਹੋਣ ਜਾ ਰਹੀ ਹੈ। ਟਰਾਂਸਪੋਰਟੇਸ਼ਨ ਅਤੇ ਟ੍ਰਾਂਜ਼ਿਟ ਮੰਤਰੀ ਮਾਈਕ ਫਾਰਨਵਰਥ ਨੇ ਇਸ ਦਾ ਐਲਾਨ ਕੀਤਾ, ਉਨ੍ਹਾਂ ਕਿਹਾ ਕਿ ਨਵਾਂ ਬੈਲੇਵਿਲ ਟਰਮੀਨਲ-ਵਿਕਟੋਰੀਆ ਅਤੇ ਦੱਖਣੀ ਟਾਪੂ ਆਉਣ-ਜਾਣ ਸੈਲਾਨੀਆਂ ਲਈ ਨਵਾਂ ਯਾਤਰਾ ਦਾ ਤਜਰਬਾ ਜੋੜਨ ਜਾ ਰਿਹਾ ਹੈ।

ਇਸ ਨਾਲ ਡਾਊਨਟਾਊਨ ਵਿਕਟੋਰੀਆ ਵਿਚ ਲੋਕਲ ਜੌਬਸ, ਕਾਰੋਬਾਰ ਅਤੇ ਇਲਾਕੇ ਦੀ ਆਰਥਿਕਤਾ ਨੂੰ ਬੂਸਟ ਮਿਲੇਗਾ। ਫਾਰਨਵਰਥ ਨੇ ਇਸ ਨੂੰ ਆਧੁਨਿਕ ਫੈਰੀ ਟਰਮੀਨਲ ਦੱਸਿਆ ਅਤੇ ਕਿਹਾ ਕਿ ਪਿਛਲੇ ਦੋ ਦਹਾਕਿਆਂ ਤੋਂ ਕਮਿਊਨਿਟੀ ਅਤੇ ਸਰਕਾਰ ਦੇ ਸਾਰੇ ਪੱਧਰਾਂ ਦਾ ਇਹ ਟੀਚਾ ਸੀ।

ਇਹ ਵੈਨਕੂਵਰ ਆਈਲੈਂਡ ਅਤੇ ਵਾਸ਼ਿੰਗਟਨ ਵਿਚਕਾਰ ਇੰਟਰਨੈਸ਼ਨਲ ਗੇਟਵੇਅ ਦੇ ਰੂਪ ਵਿਚ ਮਾਲ ਅਤੇ ਸੈਰ ਸਪਾਟੇ ਲਈ ਸੁਰੱਖਿਅਤ ਆਵਾਜਾਈ ਪ੍ਰਦਾਨ ਕਰੇਗਾ। ਇਹ ਪ੍ਰੋਜੈਕਟ 2028 ਵਿਚ ਪੂਰਾ ਹੋਣ ਦੀ ਉਮੀਦ ਹੈ।