ਸਰੀ ਮੈਮੋਰੀਅਲ ਹਸਪਤਾਲ ਵਿਖੇ ਕਿਡਨੀ ਕੇਅਰ ਦੀ ਸਹੂਲਤ ਅਗਲੇ ਸਾਲ ਤੋਂ ਹੋਵੇਗੀ ਸ਼ੁਰੂ

ਸਰੀ ਮੈਮੋਰੀਅਲ ਹਸਪਤਾਲ ਦੀ ਕਿਡਨੀ ਕੇਅਰ ਦੀ ਸਹੂਲਤ 2026 ਦੀਆਂ ਗਰਮੀਆਂ ਵਿਚ ਖੁੱਲ੍ਹੇਗੀ। ਇਨਫਰਾਸਟਕਚਰ ਮੰਤਰੀ ਬੋਵਿਨ ਮਾ ਨੇ ਕਿਹਾ ਕਿ ਇਹ ਨਵੀਂ ਸਹੂਲਤ ਕਿਡਨੀ ਦੇ ਇਲਾਜ ਦੀ ਸਮਰੱਥਾ ਵਿਚ 55 ਫੀਸਦੀ ਵਾਧਾ ਕਰੇਗੀ, ਜਿਸ ਨਾਲ ਸਰੀ ਅਤੇ ਨੇੜਲੇ ਇਲਾਕਿਆਂ ਵਿਚ ਵੱਧ ਰਹੀ ਮੰਗ ਨੂੰ ਪੂਰਾ ਕੀਤਾ ਜਾ ਸਕੇਗਾ ਅਤੇ ਇਸ ਨਾਲ ਉਡੀਕ ਸਮਾਂ ਘਟੇਗਾ ਅਤੇ ਮਰੀਜ਼ਾਂ ਨੂੰ ਆਪਣੇ ਘਰਾਂ ਦੇ ਨੇੜੇ ਇਲਾਜ ਮਿਲੇਗਾ।

ਇਸ ਪ੍ਰੋਜੈਕਟ ਲਈ ਸੂਬਾ ਸਰਕਾਰ ਵਲੋਂ 84 ਮਿਲੀਅਨ ਡਾਲਰ ਅਤੇ ਸਰੀ ਹਸਪਤਾਲ ਫਾਊਂਡੇਸ਼ਨ ਵਲੋਂ 1 ਮਿਲੀਅਨ ਡਾਲਰ ਦਾ ਯੋਗਦਾਨ ਦਿੱਤਾ ਗਿਆ ਹੈ। ਇਹ ਨਿਵੇਸ਼ ਸਰਕਾਰ ਦੀ ਵੱਡੀ ਯੋਜਨਾ ਦਾ ਹਿੱਸਾ ਹੈ ਜਿਸ ਵਿਚ ਸਾਈਮਨ ਫਰੇਜ਼ਰ ਯੂਨੀਵਰਸਿਟੀ ਵਿਚ ਨਵਾਂ ਮੈਡੀਕਲ ਸਕੂਲ, ਕਲੋਵਰਡੇਲ ਵਿਚ ਨਵਾਂ ਹਸਪਤਾਲ ਅਤੇ ਬੀਸੀ ਕੈਂਸਰ ਸੈਂਟਰ ਅਤੇ ਕਮਿਊਨਿਟੀ ਬੇਸਡ ਸਰਵਿਸ ਨੂੰ ਵਧਾਉਣਾ ਸ਼ਾਮਲ ਹੈ।

ਬੋਵਿਨ ਮਾ ਨੇ ਕਿਹਾ ਕਿ ਕਿਡਨੀ ਕੇਅਰ ਦੀ ਸਹੂਲਤ ਦੇ ਬਾਹਰੀ ਹਿੱਸੇ ਦਾ ਕੰਮ ਪੂਰਾ ਹੋ ਗਿਆ ਹੈ, ਹੁਣ ਇਸ ਦੇ ਅੰਦਰ ਇਲਾਜ ਖੇਤਰ, ਮਰੀਜ਼ ਸਥਾਨ ਅਤੇ ਵਰਕਸਪੇਸ ਵਰਗੇ ਇੰਟੀਰੀਅਰ ਲਈ ਕੰਮ ਸ਼ੁਰੂ ਹੋ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਇਸ ਸਹੂਲਤ ਨਾਲ ਸੂਬਾ ਸਰਕਾਰ ਸਰੀ ਦੇ ਲੋਕਾਂ ਨਾਲ ਕੀਤੇ ਗਏ ਵਾਅਦੇ ਨੂੰ ਪੂਰਾ ਕਰ ਰਹੀ ਹੈ।