12C Vancouver 12C VancouverJun 12, 2020 3:47 PM -
ਉੱਤਰੀ ਐਲਬਰਟਾ ਦੇ ਫਰਸਟ ਨੇਸ਼ਨ ਦੇ ਪ੍ਰਮੁੱਖ ਮੁੱਖੀ ਦੀ ਹਿੰਸਕ ਗ੍ਰਿਫਤਾਰੀ ਦੀ ਇੱਕ ਨਵੀਂ ਵੀਡੀਓ ਸਾਹਮਣੇ ਆਈ ਹੈ।
ਐਥਾਬਸਕਾ ਚਿਪੇਵਾਇਨ ਫਰਸਟ ਨੇਸ਼ਨ ਮੁਤਾਬਕ ਆਰ.ਸੀ.ਐੱਮ.ਪੀ. ਦੀ ਡੈਸ਼ ਕੈਮਰਾ ਵੀਡੀਓ ਨੂੰ ਅਦਾਲਤ ਵਿੱਚ ਚੀਫ ਐਲਨ ਐਡਮ ਖ਼ਿਲਾਫ਼ ਲੱਗੇ ਅਪਰਾਧਕ ਦੋਸ਼ਾਂ ਦਾ ਵਿਰੋਧ ਕਰਦੀ ਅਰਜ਼ੀ ਵਿੱਚ ਪੇਸ਼ ਕੀਤਾ ਗਿਆ ਹੈ।
ਇਸ 12 ਮਿੰਟ ਦੀ ਵੀਡੀਓ ਵਿਚ 10 ਮਾਰਚ ਦੀ ਸਵੇਰ ਨੂੰ ਫੋਰਟ ਮੈਕਮਰੀ ਦੇ ਇੱਕ ਕੈਸੀਨੋ ਦੇ ਬਾਹਰ ਇੱਕ ਪੁਲਿਸ ਅਫਸਰ ਨੂੰ ਐਡਮ ਦੇ ਟਰੱਕ ਵੱਲ ਆਉਂਦੇ ਦੇਖਿਆ ਜਾ ਸਕਦਾ ਹੈ।
ਆਰ.ਸੀ.ਐਮ.ਪੀ. ਮੁਤਾਬਕ ਐਡਮ ਦੇ ਟਰੱਕ ਦੀਆਂ ਪਲੇਟਾਂ ਦੀ ਮਿਆਦ ਖਤਮ ਹੋ ਚੁੱਕੀ ਸੀ ਅਤੇ ਵੀਡੀਓ ਵਿੱਚ ਐਡਮ ਨੂੰ ਆਪਣੀ ਗੱਡੀ ਵਿੱਚੋਂ ਅੰਦਰ ਬਾਹਰ ਆਉਂਦੇ, ਗੁੱਸੇ ਨਾਲ ਆਪਣਾ ਕੋਟ ਉਤਾਰਦੇ ਅਤੇ ਪੁਲਿਸ ਵਲੋਂ ਪਰੇਸ਼ਾਨ ਕਰਨ ਦੀ ਸ਼ਿਕਾਇਤ ਕਰਦਿਆਂ ਅਤੇ ਗ਼ਲਤ ਭਾਸ਼ਾ ਦੀ ਵਰਤੋਂ ਕਰਦਿਆਂ ਦੇਖਿਆ ਜਾ ਸਕਦਾ ਹੈ।
ਸਥਿਤੀ ਹੋਰ ਵੀ ਵਿਗੜ ਜਾਂਦੀ ਹੈ ਜਦ ਇੱਕ ਦੂਜਾ ਪੁਲਿਸ ਅਫ਼ਸਰ ਐਡਮ ਨੂੰ ਕਾਬੂ ਕਰਨ ਲਈ ਉਸ ਨੂੰ ਜ਼ਮੀਨ ਤੇ ਸੁੱਟ ਕੇ ਉਸ ਦੇ ਮੁੱਕੇ ਮਾਰਦਾ ਹੈ।
ਚੀਫ ਉੱਤੇ ਗ੍ਰਿਫ਼ਤਾਰੀ ਦੌਰਾਨ ਵਿਰੋਧ ਕਰਨ ਅਤੇ ਪੁਲਿਸ ਅਫ਼ਸਰ ਉੱਤੇ ਹਮਲਾ ਕਰਨ ਦੇ ਦੋਸ਼ ਲਾਏ ਗਏ ਹਨ।
ਵੀਡੀਓ ਵਿਚ ਪੁਲਿਸ, ਚੀਫ ਨੂੰ ਹੱਥਕੜੀਆਂ ਪਾ ਲੈ ਜਾਂਦੀ ਦੇਖੀ ਜਾ ਸਕਦੀ ਹੈ ਅਤੇ ਉਸ ਦਾ ਚਿਹਰਾ ਖੂਨ ਨਾਲ ਲੱਥ ਪੱਥ ਹੈ।
ਪੁਲਿਸ ਦੇ ਮਾਮਲਿਆਂ ਦੀ ਜਾਂਚ ਕਰਦੀ ਏਜੰਸੀ ਵੱਲੋਂ ਹੁਣ ਵਾਰਦਾਤ ਦੀ ਤਫਤੀਸ਼ ਕੀਤੀ ਜਾ ਰਹੀ ਹੈ।
