ਮਾਂਟਰੀਅਲ ਦੇ ਬੱਸ ਸਟਾਪ 'ਤੇ ਛੱਡਿਆ ਨਵਜੰਮਿਆ ਬੱਚਾ ਮਰਿਆ, ਪੁਲਿਸ ਕਰ ਰਹੀ ਜਾਂਚ

ਮਾਂਟਰੀਅਲ ਦੇ ਲੋਂਗਯੂਇਲ ਵਿਚ ਇੱਕ ਬੱਸ ਸਟਾਪ 'ਤੇ ਨਵਜੰਮਿਆ ਬੱਚਾ ਛੱਡੇ ਜਾਣ ਦਾ ਮਾਮਲਾ ਸਾਹਮਣੇ ਆਇਆ ਹੈ, ਜਿਸ ਦੀ ਮੌਤ ਹੋ ਗਈ। ਲੋਂਗਯੂਇਲ ਪੁਲਿਸ ਨੇ ਕਿਹਾ ਕਿ ਇਹ ਇੱਕ ਮਹੀਨੇ ਤੋਂ ਵੀ ਘੱਟ ਸਮੇਂ ਵਿਚ ਇਸ ਇਲਾਕੇ ਵਿਚ ਲਾਵਾਰਿਸ ਛੱਡੇ ਗਏ ਬੱਚੇ ਨਾਲ ਜੁੜੀ ਦੂਜੀ ਘਟਨਾ ਹੈ। ਅਧਿਕਾਰੀਆਂ ਨੇ ਕਿਹਾ ਕਿ ਸਵੇਰੇ 6:30 ਵਜੇ ਦੇ ਕਰੀਬ ਉਨ੍ਹਾਂ ਨੂੰ ਕਮਿਊਨਿਟੀ ਦੀ ਮੇਨ ਸੜਕ ਚੈਂਬਲੀ ਰੋਡ ਦੇ ਬੱਸ ਸ਼ੈਲਟਰ ਵਿਚ ਬੱਚੇ ਬਾਰੇ ਸੂਚਨਾ ਮਿਲੀ, ਜੋ ਬੇਹੋਸ਼ੀ ਦੀ ਹਾਲਤ ਵਿਚ ਸੀ।

ਪੈਰਾਮੈਡਿਕਸ ਨੇ ਪਹਿਲਾਂ ਉਸ ਨੂੰ ਮੌਕੇ 'ਤੇ ਮੁੱਢਲੀ ਸਹਾਇਤਾ ਦਿੱਤੀ ਅਤੇ ਫਿਰ ਹਸਪਤਾਲ ਪਹੁੰਚਾਇਆ ਜਿਥੇ ਸਵੇਰ 8 ਵਜੇ ਦੇ ਕਰੀਬ ਉਸ ਨੂੰ ਮ੍ਰਿਤਕ ਘੋਸ਼ਿਤ ਕਰ ਦਿੱਤਾ ਗਿਆ, ਪੁਲਿਸ ਮੁਤਾਬਕ, ਇਸ ਤੋਂ ਪਹਿਲਾਂ 5 ਅਕਤੂਬਰ ਨੂੰ ਲੋਂਗਯੂਇਲ ਦੇ ਇੱਕ ਰਿਹਾਇਸ਼ ਦੇ ਦਰਵਾਜ਼ੇ 'ਤੇ ਨਵਜੰਮੇ ਬੱਚੇ ਨੂੰ ਛੱਡਿਆ ਗਿਆ ਸੀ ਪਰ ਉਹ ਬਚ ਗਿਆ ਸੀ।

ਲੋਂਗਯੂਇਲ ਪੁਲਿਸ ਨੇ ਤਾਜ਼ਾ ਕੇਸ ਵਿਚ ਇੱਕ ਵਿਅਕਤੀ ਦੀ ਫੁਟੇਜ ਜਾਰੀ ਕੀਤੀ ਹੈ ਜਿਸ ਬਾਰੇ ਉਨ੍ਹਾਂ ਦਾ ਮੰਨਣਾ ਹੈ ਕਿ ਉਹ ਉਸ ਮਾਮਲੇ ਵਿਚ ਸ਼ੱਕੀ ਹੋ ਸਕਦਾ ਹੈ। ਇਨਵੈਸਟੀਗੇਟਰਸ ਨੇ ਕਿਹਾ ਕਿ ਬੱਚਾ ਮੌਕੇ ਉਤੇ ਪਾਏ ਜਾਣ ਸਮੇਂ ਪਲੈਸੈਂਟਾ ਨਾਲ ਜੁੜਿਆ ਹੋਇਆ, ਨੰਗਾ ਅਤੇ ਬਹੁਤ ਠੰਡਾ ਸੀ।