16.77C Vancouver 16.77C VancouverJun 5, 2026 5:01 PM - Connect Newsroom - Ramandeep Kaur
ਨੈਨਾਇਮੋ ਵਿਚ ਇੱਕ ਚੱਲਦੀ ਗੱਡੀ ਵਿਚੋਂ ਸਥਾਨਕ ਪਾਰਕ ਵਿਚ ਲੋਕਾਂ ਵੱਲ ਫਾਇਰਿੰਗ ਕੀਤੇ ਜਾਣ ਦੀ ਵਾਰਦਾਤ ਸਾਹਮਣੇ ਆਈ ਹੈ। ਆਰ.ਸੀ.ਐਮ.ਪੀ. ਮੁਤਾਬਕ, ਘਟਨਾ ਬੁੱਧਵਾਰ ਨੂੰ ਰਾਤ ਦੇ ਕਰੀਬ 8:40 ਵਜੇ ਓਲਡ ਵਿਕਟੋਰੀਆ ਰੋਡ ਅਤੇ ਰੈਨੀਅਰ ਸਟ੍ਰੀਟ ਦੇ ਇੰਟਰਸੈਕਸ਼ਨ ਨੇੜੇ ਸਥਿਤ ਨੋਲਸ ਪਾਰਕ ਵਿਚ ਵਾਪਰੀ।
ਚਸ਼ਮਦੀਦਾਂ ਮੁਤਾਬਕ, ਹਮਲਾਵਰ ਇੱਕ ਚਿੱਟੇ ਰੰਗ ਦੀ ਔਡੀ ਕਾਰ ਵਿਚ ਸਵਾਰ ਸਨ, ਜਿਸ ਵਿਚ ਕਈ ਹੋਰ ਲੋਕ ਵੀ ਬੈਠੇ ਹੋਏ ਸਨ ਅਤੇ ਵਾਰਦਾਤ ਨੂੰ ਅੰਜਾਮ ਦੇਣ ਤੋਂ ਤੁਰੰਤ ਬਾਅਦ ਮੌਕੇ ਤੋਂ ਫਰਾਰ ਹੋ ਗਏ। ਰਾਹਤ ਦੀ ਗੱਲ ਇਹ ਰਹੀ ਕਿ ਇਸ ਸ਼ੂਟਿੰਗ ਵਿਚ ਕਿਸੇ ਦੇ ਵੀ ਜ਼ਖਮੀ ਹੋਣ ਤੋਂ ਬਚਾਅ ਰਿਹਾ।
ਜਾਂਚਕਰਤਾ ਦਾ ਮੰਨਣਾ ਹੈ ਕਿ ਇਹ ਫਾਇਰਿੰਗ ਆਮ ਪਬਲਿਕ 'ਤੇ ਹਮਲਾ ਨਹੀਂ ਸੀ ਬਲਕਿ ਇੱਕ ਟਾਰਗੇਟਿਡ ਮਾਮਲਾ ਸੀ। ਇਸ ਦੇ ਨਿਸ਼ਾਨੇ 'ਤੇ ਕੌਣ ਹੋ ਸਕਦਾ ਸੀ ਫਿਲਹਾਲ ਇਹ ਜਾਣਕਾਰੀ ਨਹੀਂ ਦਿੱਤੀ ਗਈ। ਦੱਸਿਆ ਗਿਆ ਹੈ ਕਿ ਫੋਰੈਂਸਿਕ ਜਾਂਚਕਰਤਾ ਨੇ ਘਟਨਾ ਸਥਾਨ ਤੋਂ ਸਬੂਤ ਇਕੱਠੇ ਕਰ ਲਏ ਸਨ ਅਤੇ ਪੁਲਿਸ ਹੁਣ ਸ਼ੱਕੀ ਗੱਡੀ ਦੀ ਲੋਕੇਸ਼ਨ ਲੱਭਣ ਲਈ ਵੱਖ-ਵੱਖ ਸੁਰਾਗਾਂ 'ਤੇ ਕੰਮ ਕਰ ਰਹੀ ਹੈ।
