ਨੌਰਥ ਵੈਨਕੂਵਰ ਆਰਸੀਐਮਪੀ ਨੇ ਘਰਾਂ 'ਚ ਚੋਰੀ ਕਰਨ ਵਾਲੇ ਸ਼ੱਕੀ ਦੀ ਪਛਾਣ ਕਰਨ ਲਈ ਜਨਤਾ ਤੋਂ ਮੰਗੀ ਮਦਦ

ਉੱਤਰੀ ਵੈਨਕੂਵਰ ਆਰਸੀਐਮਪੀ ਨੇ ਘਰਾਂ ਵਿਚ ਦਾਖ਼ਲ ਹੋ ਕੇ ਚੋਰੀ ਦੀਆਂ ਵਾਰਦਾਤਾਂ ਨੂੰ ਅੰਜ਼ਾਮ ਦੇਣ ਵਾਲੇ ਇੱਕ ਸ਼ੱਕੀ ਦੀਆਂ ਤਸਵੀਰਾਂ ਜਾਰੀ ਕੀਤੀਆਂ ਹਨ। ਪੁਲਿਸ ਨੇ ਕਿਹਾ ਕਿ 8 ਤੋਂ 10 ਜੁਲਾਈ ਵਿਚਕਾਰ ਤਿੰਨ ਬਰੇਕ ਐਂਡ ਐਂਟਰ ਦੀਆਂ ਘਟਨਾਵਾਂ ਹੋਈਆ। ਪਹਿਲਾਂ 8 ਜੁਲਾਈ ਨੂੰ ਚੈਸਟਰਫੀਲਡ ਐਵੇਨਿਊ ਦੇ 2100 ਬਲਾਕ ਵਿਚ ਇੱਕ ਰਿਹਾਇਸ਼ੀ ਇਮਾਰਤ ਵਿਚ ਸ਼ੱਕੀ ਵਲੋਂ ਤੋੜ-ਫੋੜ ਕਰਕੇ ਦਾਖਲ ਹੋਣ ਦੀ ਰਿਪੋਰਟ ਮਿਲੀ।

ਇਮਾਰਤ ਤੋਂ ਸੀਸੀਟੀਵੀ ਫੁਟੇਜ ਵਿਚ ਸ਼ੱਕੀ ਨੂੰ ਲਗਭਗ ਸਵੇਰੇ 4:00 ਵਜੇ ਅੰਦਰ ਦਾਖਲ ਹੁੰਦੇ ਹੋਏ ਦੇਖਿਆ ਗਿਆ। 10 ਜੁਲਾਈ ਨੂੰ ਉਸੇ ਰਿਹਾਇਸ਼ ਤੋਂ ਦੂਜੀ ਵਾਰ ਵਿਚ $600 ਕੈਸ਼, ਇੱਕ ਵ੍ਹੀਲਚੇਅਰ ਅਤੇ ਹੋਰ ਕਈ ਸਮਾਨ ਚੋਰੀ ਹੋਣ ਦੀ ਰਿਪੋਰਟ ਮਿਲੀ।

ਸੀਸੀਟੀਵੀ ਤੋਂ ਪਤਾ ਲੱਗਾ ਕਿ ਦੋਵੇਂ ਘਟਨਾਵਾਂ ਵਿਚ ਇੱਕ ਹੀ ਸ਼ੱਕੀ ਸ਼ਾਮਲ ਸੀ। ਫਿਰ ਉਸੇ ਦਿਨ ਸ਼ਾਮ ਨੂੰ ਸਟਰਫੀਲਡ ਐਵੇਨਿਊ ਦੇ 100 ਬਲਾਕ ਵਿਚ ਤੀਜੀ ਰਿਪੋਰਟ ਮਿਲੀ। ਪੁਲਿਸ ਦਾ ਮੰਨਣਾ ਹੈ ਕਿ ਤਿੰਨੋਂ ਘਟਨਾਵਾਂ ਵਿਚ ਇੱਕੋ ਹੀ ਸ਼ੱਕੀ ਸੀ। ਉੱਤਰੀ ਵੈਨਕੂਵਰ ਆਰਸੀਐਮਪੀ ਨੇ ਹੁਣ ਉਸ ਦੀ ਪਛਾਣ ਲਈ ਲੋਕਾਂ ਤੋਂ ਮਦਦ ਮੰਗੀ ਹੈ।