20.86C Vancouver 20.86C VancouverJan 6, 2026 6:10 PM - Connect Newsroom - Jasmine Singh with files from The Canadian Press
ਨੋਵਾ ਸਕੋਸ਼ੀਆ ਸੂਬੇ ਤੋਂ ਇੱਕ ਬੇਹੱਦ ਮੰਦਭਾਗੀ ਖ਼ਬਰ ਸਾਹਮਣੇ ਆਈ ਹੈ,ਜਿੱਥੇ ਕੁੱਤਿਆਂ ਦੇ ਹਮਲੇ ਵਿਚ ਗੰਭੀਰ ਜ਼ਖ਼ਮੀ ਹੋਏ ਇੱਕ 13 ਸਾਲਾ ਬੱਚੇ ਦੀ ਮੌਤ ਹੋ ਗਈ। ਇਹ ਘਟਨਾ ਸ਼ੈਲਬਰਨ ਕਾਉਂਟੀ ਦੇ ਵੈਲਸ਼ਟਾਊਨ ਇਲਾਕੇ ਵਿਚ ਵਾਪਰੀ, ਜਿਸ ਨੇ ਪੂਰੇ ਭਾਈਚਾਰੇ ਨੂੰ ਝੰਜੋੜ ਕੇ ਰੱਖ ਦਿੱਤਾ ਹੈ।
ਪਿਛਲੇ ਹਫਤੇ ਸ਼ਨੀਵਾਰ ਸ਼ਾਮ ਕਰੀਬ 5:10 ਵਜੇ ਅੱਪਰ ਸੈਂਡੀ ਕੋਵ ਰੋਡ 'ਤੇ ਬੱਚਾ ਆਪਣੇ ਸਾਈਕਲ 'ਤੇ ਸਵਾਰ ਹੋ ਕੇ ਉੱਥੋਂ ਲੰਘ ਰਿਹਾ ਸੀ, ਜਦੋਂ ਅਚਾਨਕ ਤਿੰਨ ਵੱਡੀ ਨਸਲ ਦੇ ਕੁੱਤਿਆਂ ਨੇ ਉਸ ਉੱਤੇ ਹਮਲਾ ਕਰ ਦਿੱਤਾ।
ਹਮਲਾ ਇੰਨਾ ਭਿਆਨਕ ਸੀ ਕਿ ਬੱਚੇ ਨੂੰ ਗੰਭੀਰ ਹਾਲਤ ਵਿਚ ਲਾਈਫਲਾਈਟ ਰਾਹੀਂ ਹੈਲੀਫੈਕਸ ਦੇ ਹਸਪਤਾਲ ਲਿਜਾਇਆ ਗਿਆ ਸੀ। ਪੁਲਿਸ ਅਨੁਸਾਰ ਹਮਲਾ ਕਰਨ ਵਾਲੇ ਤਿੰਨੋਂ ਕੁੱਤਿਆਂ ਨੂੰ ਵੈਟਰਨਰੀ ਡੌਕਟਰ ਦੀ ਮਦਦ ਨਾਲ ਮਾਰ ਦਿੱਤਾ ਗਿਆ ਹੈ। ਸ਼ੈਲਬਰਨ ਰੀਜਨਲ ਹਾਈ ਸਕੂਲ ਵਿਚ ਪੜ੍ਹਦੇ ਇਸ ਗਰੇਡ 8 ਦੇ ਵਿਦਿਆਰਥੀ ਦੀ ਮੌਤ 'ਤੇ ਪੂਰੇ ਸਕੂਲ ਨੇ ਪਰਿਵਾਰ ਨਾਲ ਡੂੰਘੀ ਹਮਦਰਦੀ ਪ੍ਰਗਟਾਈ ਹੈ।
