17.12C Vancouver 17.12C VancouverMay 11, 2020 4:39 PM -
ਆਰ.ਸੀ.ਐੱਮ.ਪੀ. ਮੁਤਾਬਕ ਪਿਛਲੇ ਮਹੀਨੇ ਨੋਵਾ ਸਕੋਸ਼ੀਆ ਵਿੱਚ ਵਾਪਰੀ ਮਾਸ ਸ਼ੂਟਿੰਗ ਵਿੱਚ ਹਮਲਾਵਰ ਵੱਲੋਂ ਵਰਤੇ ਗਏ ਚਾਰ ਸੈਮੀ ਆਟੋਮੈਟਿਕ ਹਥਿਆਰਾਂ ਵਿੱਚੋਂ ਤਿੰਨ ਅਮਰੀਕਾ ਤੋਂ ਆਏ ਮੰਨੇ ਜਾ ਰਹੇ ਹਨ।
ਅਧਿਕਾਰੀਆਂ ਮੁਤਾਬਕ ਸਿਰਫ ਇੱਕ ਬੰਦੂਕ ਦਾ ਤਾਲੁਕ ਕੈਨੇਡਾ ਨਾਲ ਹੈ।
ਦੋ ਹੈਂਡਗਨ ਅਤੇ ਦੋ ਰਾਈਫਲਾਂ ਕਿਹੜੇ ਬਰਾਂਡ ਜਾਂ ਕੈਲਿਬਰ ਦੀਆਂ ਸਨ ਇਹ ਜਾਣਕਾਰੀ ਸਾਂਝੀ ਨਹੀਂ ਕੀਤੀ ਗਈ ਪਰ ਪੁਲਿਸ ਦਾ ਕਹਿਣਾ ਹੈ ਕਿ ਹਮਲਾਵਰ ਕੋਲ ਇਨ੍ਹਾਂ ਹਥਿਆਰਾਂ ਲਈ ਲਾਇਸੈਂਸ ਨਹੀਂ ਸਨ।
18 ਅਤੇ 19 ਅਪ੍ਰੈਲ ਨੂੰ ਗੈਬਰੀਅਲ ਵੋਰਟਮੈਨ ਨੇ 22 ਵਿਅਕਤੀਆਂ ਨੂੰ ਮੌਤ ਦੇ ਘਾਟ ਉਤਾਰ ਦਿੱਤਾ ਅਤੇ ਫਿਰ ਆਪ ਵੀ ਪੁਲਿਸ ਵੱਲੋਂ ਮਾਰ ਦਿੱਤਾ ਗਿਆ।
ਹਮਲਿਆਂ ਦੌਰਾਨ ਵੋਰਟਮੈਨ ਵੱਲੋਂ ਵਰਤੀ ਗਈ ਨਕਲੀ ਪੁਲੀਸ ਦੀ ਗੱਡੀ ਉੱਤੇ ਲਾਏ ਗਏ ਆਰ.ਸੀ.ਐੱਮ.ਪੀ. ਦੇ ਡੈਕਲ ਤਿਆਰ ਕਰਨ ਲਈ ਵਰਤੇ ਗਏ ਮਟੀਰੀਅਲ ਦੇ ਸਪਲਾਇਰ ਦੀ ਪਛਾਣ ਵੀ ਕਰ ਲਈ ਗਈ ਹੈ।
ਜਾਂਚਕਰਤਾਵਾਂ ਮੁਤਾਬਕ ਇਹ ਡੈਕਲ ਵਪਾਰ ਮਾਲਕ ਦੀ ਇਜਾਜ਼ਤ ਤੋਂ ਬਿਨਾਂ ਤਿਆਰ ਕੀਤੇ ਗਏ ਸਨ।
ਆਰ.ਸੀ.ਐਮ.ਪੀ. ਮੁਤਾਬਕ ਮਾਹਿਰਾਂ ਵੱਲੋਂ ਹਮਲਾਵਰ ਦੀ ਮਨੋਵਿਗਿਆਨਿਕ ਆਟੋਪਸੀ ਕੀਤੀ ਜਾ ਰਹੀ ਹੈ ਤਾਂ ਕਿ ਉਸ ਵੱਲੋਂ ਕੀਤੇ ਗਏ ਕਤਲਾਂ ਦੇ ਪਿੱਛੇ ਦੇ ਕਾਰਨਾਂ ਬਾਰੇ ਪਤਾ ਲਾਇਆ ਜਾ ਸਕੇ।
ਹਮਲਾਵਰ ਵੱਲੋਂ ਹਮਲਿਆਂ ਦੌਰਾਨ ਕਈ ਥਾਵਾਂ ਤੇ ਅੱਗਾਂ ਵੀ ਲਾਈਆਂ ਗਈਆਂ ਸਨ ਅਤੇ ਜਾਂਚਕਰਤਾਵਾਂ ਦਾ ਮੰਨਣਾ ਹੈ ਕੇ ਪੋਰਟਾਪੀਕ ਵਿਖੇ ਸਥਿਤ ਉਸ ਦੇ ਘਰ ਵਿੱਚ ਗੈਸੋਲੀਨ ਦੀ ਵੱਡੀ ਸਪਲਾਈ ਮੌਜੂਦ ਸੀ।
