ਨੋਵਾ ਸਕੋਸ਼ੀਆ ਦੇ ਐਮ.ਪੀ. ਕ੍ਰਿਸ ਡੈਂਟ੍ਰਮਾਂਟ ਨੇ ਕੰਜ਼ਰਵੇਟਿਵ ਕਾਕਸ ਤੋਂ ਦਿੱਤਾ ਅਸਤੀਫਾ

ਨੋਵਾ ਸਕੋਸ਼ੀਆ ਦੇ ਐਮ.ਪੀ. ਕ੍ਰਿਸ ਡੈਂਟ੍ਰਮਾਂਟ ਨੇ ਕੱਲ੍ਹ ਕੰਜ਼ਰਵੇਟਿਵ ਕਾਕਸ ਤੋਂ ਅਸਤੀਫ਼ਾ ਦੇ ਦਿੱਤਾ ਅਤੇ ਫੈਡਰਲ ਬਜਟ ਪੇਸ਼ ਹੋਣ ਤੋਂ ਥੋੜ੍ਹੀ ਦੇਰ ਬਾਅਦ ਹੀ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਦੇ ਲਿਬਰਲ ਕਾਕਸ ਵਿਚ ਸ਼ਾਮਲ ਹੋ ਗਏ। ਉਨ੍ਹਾਂ ਦੇ ਇਸ ਕਦਮ ਨਾਲ ਲਿਬਰਲਸ ਹੁਣ ਸਿਰਫ ਦੋ ਸੀਟਾਂ ਘੱਟ ਨਾਲ ਬਹੁਮਤ ਦੇ ਨੇੜੇ ਆ ਗਏ ਹਨ ਅਤੇ ਸਰਕਾਰ ਦਾ ਬਜਟ ਹਾਊਸ ਔਫ ਕੌਮਨਜ਼ ਵਿਚ ਸਫਲਤਾਪੂਰਵਕ ਪਾਸ ਹੋਣ ਦੀ ਸੰਭਾਵਨਾ ਵੱਧ ਗਈ ਹੈ।

ਡੈਂਟ੍ਰਮਾਂਟ 2019 ਤੋਂ ਅਕਾਡੀ-ਐਨਾਪੋਲਿਸ ਤੋਂ ਐਮ.ਪੀ.ਹਨ ਅਤੇ ਇਸ ਤੋਂ ਪਹਿਲਾਂ ਨੋਵਾ ਸਕੋਸ਼ੀਆ ਦੀ ਵਿਧਾਨ ਸਭਾ ਵਿਚ 16 ਸਾਲ ਤੱਕ ਪ੍ਰੋਗਰੈਸਿਵ ਕੰਜ਼ਰਵੇਟਿਵ ਦੇ ਐਮ.ਐਲ.ਏ.ਵਜੋਂ ਸੇਵਾ ਨਿਭਾ ਚੁੱਕੇ ਹਨ। ਉਹ 2021 ਤੋਂ ਅਪ੍ਰੈਲ 2025 ਤੱਕ ਹਾਊਸ ਔਫ ਕੌਮਨਜ਼ ਦੇ ਡਿਪਟੀ ਸਪੀਕਰ ਵੀ ਸਨ। ਲਿਬਰਲ ਪਾਰਟੀ ਵਲੋਂ ਜਾਰੀ ਬਿਆਨ ਵਿਚ ਡੈਂਟ੍ਰਮਾਂਟ ਨੇ ਕਿਹਾ ਕਿ 2025 ਦਾ ਫੈਡਰਲ ਬਜਟ ਉਨ੍ਹਾਂ ਤਰਜੀਹਾਂ ਨੂੰ ਪੂਰਾ ਕਰਦਾ ਹੈ ਜੋ ਉਨ੍ਹਾਂ ਆਪਣੀ ਰਾਈਡਿੰਗ ਵਿਚ ਸਭ ਤੋਂ ਵੱਧ ਸੁਣੀਆਂ ਸਨ,ਜਿਸ ਕਾਰਨ ਉਨ੍ਹਾਂ ਨੇ ਸਰਕਾਰੀ ਕਾਕਸ ਵਿਚ ਸ਼ਾਮਲ ਹੋਣ ਦਾ ਫੈਸਲਾ ਕੀਤਾ।

ਉਥੇ ਹੀ, ਕੰਜ਼ਰਵੇਟਿਵ ਹਾਊਸ ਲੀਡਰ ਐਂਡਰਿਊ ਸ਼ੀਅਰ ਦਾ ਮੰਨਣਾ ਹੈ ਕਿ ਡੈਂਟ੍ਰਮਾਂਟ ਨੂੰ ਇਸ ਸਾਲ ਦੇ ਸ਼ੁਰੂ ਵਿਚ ਸਪੀਕਰ ਬਣਨ ਲਈ ਕਾਕਸ ਵਲੋਂ ਸਪੋਰਟ ਦੀ ਘਾਟ ਕਾਰਨ ਨਿੱਜੀ ਸ਼ਿਕਾਇਤਾਂ ਸਨ। ਸ਼ੀਅਰ ਨੇ ਕਿਹਾ ਕਿ ਮੈਨੂੰ ਇਸ ਗੱਲ ਦੀ ਨਿਰਾਸ਼ਾ ਹੈ ਕਿ ਉਨ੍ਹਾਂ ਆਪਣੀਆਂ ਨਿੱਜੀ ਸ਼ਿਕਾਇਤਾਂ ਨੂੰ ਆਪਣੇ ਹਲਕੇ ਦੇ ਲੋਕਾਂ ਪ੍ਰਤੀ ਆਪਣੀ ਵਚਨਬੱਧਤਾ ਦੇ ਰਾਹ ਵਿਚ ਆਉਣ ਦਿੱਤਾ।