ਸੈਨ ਫਰਾਂਸਿਸਕੋ ਬੇਅ ਇਲਾਕੇ 'ਚ ਖੇਤੀ ਕਾਨੂੰਨਾਂ ਦੇ ਹੱਕ 'ਚ ਕੱਢੀ ਗਈ ਕਾਰ ਰੈਲੀ

ਸੈਨ ਫਰਾਂਸਿਸਕੋ ਬੇਅ ਇਲਾਕੇ 'ਚ ਭਾਰਤ ਦੀ ਸਰਕਾਰ ਵੱਲੋਂ ਲਾਗੂ ਕੀਤੇ ਗਏ ਖੇਤੀ ਕਾਨੂੰਨਾਂ ਦੇ ਹੱਕ 'ਚ ਐਤਵਾਰ ਨੂੰ ਇੱਕ ਕਾਰ ਰੈਲੀ ਕੱਢੀ ਗਈI

ਇਹ ਰੈਲੀ ਸਥਾਨਕ ਸਮੇਂ ਮੁਤਾਬਕ ਦੁਪਹਿਰ ਡੇਢ ਵਜੇ ਮਿਸ਼ਨ ਸੇਨ ਹੋਜ਼ੇ ਹਾਈ ਸਕੂਲ ਦੀ ਪਾਰਕਿੰਗ 'ਚ ਕੀਤੀ ਗਈI

ਖੇਤੀ ਕਾਨੂੰਨਾਂ ਦੇ ਹੱਕ 'ਚ ਕੁਝ ਐੱਨ ਆਰ ਆਈਜ਼ ਵੱਲੋਂ ਇਹ ਕਾਰ ਰੈਲੀ ਕੀਤੀ ਗਈ| ਰੈਲੀ ਦੌਰਾਨ ਸਮਰਥਕਾਂ ਵੱਲੋਂ 'ਵੰਦੇ ਮਾਤਰਮ' ਦੇ ਨਾਅਰੇ ਲਾਏ ਗਏI

ਦੱਸਣਯੋਗ ਹੈ ਕਿ ਅਮਰੀਕਾ ਪਹਿਲਾਂ ਵੀ ਭਾਰਤ ਦੇ ਖੇਤੀ ਕਾਨੂੰਨਾਂ ਦੇ ਹੱਕ 'ਚ ਬੋਲ ਚੁੱਕਾ ਹੈ ਕਿ ਭਾਰਤੀ ਮੰਡੀਆਂ ਦੀ ਯੋਗਤਾ ਵਧਾਉਣ ਅਤੇ ਨਿੱਜੀ ਖੇਤਰ ਦੇ ਨਿਵੇਸ਼ ਨੂੰ ਹੋਰ ਉਤਸ਼ਾਹਿਤ ਕਰਨ ਦੇ ਕਦਮਾਂ ਦਾ ਉਹ ਸਵਾਗਤ ਕਰਦਾ ਹੈI

ਵਾਸ਼ਿੰਗਟਨ ਦੇ ਸੂਬਾਈ ਮਹਿਕਮੇ ਦੇ ਬੁਲਾਰੇ ਨੇ ਭਾਰਤ 'ਚ ਚੱਲ ਰਹੇ ਵਿਰੋਧ ਪ੍ਰਦਰਸ਼ਨ ਬਾਰੇ ਬੋਲਦਿਆਂ ਆਖਿਆ,"ਸ਼ਾਂਤਮਈ ਵਿਰੋਧ ਕਿਸੇ ਵੀ ਪੁੰਗਰਦੀ ਜਮਹੂਰੀਅਤ ਲਈ ਇੱਕ ਹਾਲਮਾਰਕ ਦੀ ਤਰਾਂ ਹੈ,"ਇਸਦੇ ਨਾਲ ਹੀ ਉਹਨਾਂ ਆਖਿਆ ਕਿ ਇਸ ਮਸਲੇ ਦਾ ਹੱਲ ਦੋਵਾਂ ਧਿਰਾਂ ਦੀ ਆਪਸੀ ਗੱਲ-ਬਾਤ ਨਾਲ ਹੀ ਨਿਕਲ ਸਕਦਾ ਹੈI

ਬੁਲਾਰੇ ਨੇ ਅੱਗੇ ਆਖਿਆ,"ਸਾਨੂੰ ਪਤਾ ਹੈ ਕਿ ਸ਼ਾਂਤਮਈ ਪ੍ਰਦਰਸ਼ਨ ਕਿਸੇ ਵੀ ਜਮਹੂਰੀਅਤ ਦਾ ਮਾਰਕਾ ਹੈ ਅਤੇ ਭਾਰਤੀ ਸਰਵ ਉੱਚ ਅਦਾਲਤ ਨੇ ਵੀ ਹੀ ਆਖਿਆ ਹੈI"

"ਅਸੀਂ ਚਾਹੁੰਦੇ ਹਾਂ ਕਿ ਦੋਵਾਂ ਧਿਰਾਂ ਵਿਚਾਲੇ ਜੋ ਵੀ ਤਲਖੀ ਹੈ, ਉਹ ਗੱਲ-ਬਾਤ ਰਾਹੀਂ ਹੱਲ ਹੋ ਜਾਵੇI ਕੁਲ ਮਿਲਾ ਕੇ, ਯੂਨਾਈਟਿਡ ਸਟੇਟਸ ਭਾਰਤੀ ਮੰਡੀਆਂ ਦੀ ਯੋਗਤਾ ਵਧਾਉਣ ਅਤੇ ਨਿੱਜੀ ਖੇਤਰ ਦੇ ਨਿਵੇਸ਼ ਨੂੰ ਹੋਰ ਉਤਸ਼ਾਹਿਤ ਕਰਨ ਦੇ ਕਦਮਾਂ ਦਾ ਉਹ ਸਵਾਗਤ ਕਰਦਾ ਹੈ," ਬੁਲਾਰੇ ਨੇ ਕਿਹਾI

ਗ਼ੌਰਤਲਬ ਹੈ ਕਿ ਬੀਤੇ ਸਾਲ 26 ਨਵੰਬਰ ਤੋਂ ਕਿਸਾਨ ਦਿੱਲੀ ਦੇ ਵੱਖੋ-ਵੱਖ ਬਾਰਡਰਾਂ 'ਤੇ ਭਾਰਤ ਸਰਕਾਰ ਵਲੋਂ ਪਾਸ ਕੀਤੇ ਤਿੰਨ ਖੇਤੀ ਬਿੱਲਾਂ-ਉਪਜ,ਵਪਾਰ ਅਤੇ ਵਣਜ ਬਿੱਲ(ਤਰੱਕੀ ਅਤੇ ਸਹੂਲਤ), 2020, ਕਿਸਾਨ (ਸਸ਼ਕਤੀਕਰਨ ਅਤੇ ਰੱਖਿਆ) ਸਮਰਥਨ ਮੁੱਲ ਸਮਝੌਤਾ ਅਤੇ ਖੇਤੀ ਸੇਵਾਵਾਂ ਬਿੱਲ,2020 ਅਤੇ ਜ਼ਰੂਰੀ ਵਸਤਾਂ(ਸੋਧ) ਬਿੱਲ,2020 ਦਾ ਵਿਰੋਧ ਕਰ ਰਹੇ ਹਨ।