17.45C Vancouver 17.45C VancouverJan 11, 2021 4:35 PM -
ਵੀਕੈਂਡ ਦੌਰਾਨ ਮੈਟਰੋ ਵੈਨਕੂਵਰ ਇਲਾਕੇ ਵਿੱਚ ਗੈਂਗ ਸਬੰਧਤ ਗੋਲ਼ੀ ਚੱਲਣ ਦੀਆਂ ਦੋ ਵੱਖ ਵੱਖ ਵਾਰਦਾਤਾਂ ਵਿੱਚ ਇੱਕ ਆਦਮੀ ਦੀ ਮੌਤ ਹੋ ਗਈ ਹੈ ਅਤੇ ਦੂਜਾ ਜ਼ਖ਼ਮੀ ਹਾਲਤ ਵਿੱਚ ਹੈ।
ਰਿਚਮੰਡ ਆਰ.ਸੀ.ਐੱਮ.ਪੀ. ਮੁਤਾਬਕ ਸ਼ਨੀਵਾਰ ਰਾਤ ਤਕਰੀਬਨ 11:50 ਵਜੇ ਉਨ੍ਹਾਂ ਨੂੰ ਲੈਨਜ਼ਡਾਊਨ ਰੋਡ ਦੇ 8100 ਬਲਾਕ ’ਤੇ ਸਥਿਤ ਇੱਕ ਘਰ ਤੋਂ ਰਿਪੋਰਟ ਮਿਲੀ।
ਪੁਲੀਸ ਅਫ਼ਸਰ ਜਦ ਉੱਥੇ ਪਹੁੰਚੇ ਤਾਂ ਵੀਹਵਿਆਂ ਦੀ ਉਮਰ ਦੇ ਇੱਕ ਆਦਮੀ ਨੂੰ ਗੋਲ਼ੀ ਲੱਗਣ ਕਾਰਨ ਜ਼ਖ਼ਮੀ ਹਾਲਤ ਵਿੱਚ ਪਾਇਆ ਅਤੇ ਕੁਝ ਸਮਾਂ ਬਾਅਦ ਪੀੜਤ ਆਪਣੇ ਜ਼ਖ਼ਮਾਂ ਦੀ ਤਾਬ ਨਾ ਝੱਲਦਾ ਦਮ ਤੋੜ ਗਿਆ।
ਇੰਟੀਗ੍ਰੇਟਿਡ ਹੋਮਿਸਾਈਡ ਇਨਵੈਸਟੀਗੇਸ਼ਨ ਟੀਮ ਮੁਤਾਬਕ ਮ੍ਰਿਤਕ ਦਾ ਨਾਂ ਦਿਲਰਾਜ ਜੌਹਲ ਹੈ ਅਤੇ ਉਸ ਦੀ ਉਮਰ 28 ਸਾਲ ਸੀ।
ਪੁਲੀਸ ਜੌਹਲ ਨਾਲ ਵਾਕਫ਼ ਸੀ ਅਤੇ ਉਨ੍ਹਾਂ ਦਾ ਮੰਨਣਾ ਹੈ ਕਿ ਉਸ ਨੂੰ ਮਿਥ ਕੇ ਨਿਸ਼ਾਨਾ ਬਣਾਇਆ ਗਿਆ ਸੀ।
ਆਈ-ਹਿੱਟ ਦੇ ਸਾਰਜੰਟ ਫਰੈਂਕ ਜੈਂਗ ਮੁਤਾਬਕ ਜੌਹਲ ਲੋਅਰ ਮੈਨਲੈਂਡ ਦੀ ਗੈਂਗ ਹਿੰਸਾ ਵਿੱਚ 4 ਦਿਨਾਂ ਵਿੱਚ ਮਾਰਿਆ ਜਾਣ ਵਾਲਾ ਤੀਸਰਾ ਵਿਅਕਤੀ ਹੈ।
ਇੱਕ ਹੋਰ ਵਾਰਦਾਤ ਵਿੱਚ ਐਤਵਾਰ ਸਵੇਰ ਤਕਰੀਬਨ ਇੱਕ ਵਜੇ ਕੋਕੁਇਟਲਮ ਆਰ.ਸੀ.ਐਮ.ਪੀ. ਨੂੰ ਕਿੰਗਸਟਨ ਸਟਰੀਟ ਦੇ 1400 ਬਲਾਕ ਤੋਂ ‘ਡ੍ਰਾਈਵ ਬਾਏ’ ਸ਼ੂਟਿੰਗ ਦੀ ਖ਼ਬਰ ਮਿਲੀ।
ਗੋਲ਼ੀ ਲੱਗਣ ਕਾਰਨ ਇੱਕ ਆਦਮੀ ਜ਼ਖ਼ਮੀ ਹੋ ਗਿਆ ਅਤੇ ਕਈ ਵਿਅਕਤੀਆਂ ਨਾਲ ਭਰੇ ਵਾਹਨ ਨੂੰ ਵਾਰਦਾਤ ਤੋਂ ਬਾਅਦ ਉੱਥੋਂ ਤੇਜ਼ੀ ਨਾਲ ਨਿਕਲਦੇ ਦੇਖਿਆ ਗਿਆ।
ਕੁਝ ਸਮਾਂ ਬਾਅਦ ਪੁਲੀਸ ਨੂੰ ਗਿਸਲੈਸਨ ਐਵਨਿਊ ਦੇ 3500 ਬਲਾਕ ਵਿਖੇ ਇੱਕ ਸੜੀ ਹੋਈ ਗੱਡੀ ਬਰਾਮਦ ਹੋਈ।
ਵਾਰਦਾਤ ਦੌਰਾਨ ਜ਼ਖ਼ਮੀ ਹੋਏ ਆਦਮੀ ਨੂੰ ਹਸਪਤਾਲ ਲਿਜਾਂਦਾ ਗਿਆ ਅਤੇ ਉਸ ਦੀ ਹਾਲਤ ਖ਼ਤਰੇ ਤੋਂ ਬਾਹਰ ਦੱਸੀ ਗਈ ਹੈ।
