19.92C Vancouver 19.92C VancouverDec 30, 2025 6:15 PM - Connect Newsroom - Jasmine Singh with files from The Canadian Press
ਸਸਕੈਚਵਨ ਦੇ ਬਿਗ ਆਈਲੈਂਡ ਲੇਕ ਕ੍ਰੀ ਨੇਸ਼ਨ, ਵਿਚ ਸ਼ੂਟਿੰਗ ਦੀ ਵਾਰਦਾਤ ਹੋਈ ਹੈ, ਜਿਸ ਨਾਲ ਪੂਰੇ ਇਲਾਕੇ ਵਿਚ ਦਹਿਸ਼ਤ ਦਾ ਮਾਹੌਲ ਹੈ। ਪੁਲਿਸ ਵਲੋਂ ਦਿੱਤੀ ਜਾਣਕਾਰੀ ਅਨੁਸਾਰ ਇਸ ਘਟਨਾ ਵਿਚ ਇੱਕ ਵਿਅਕਤੀ ਦੀ ਮੌਤ ਹੋ ਗਈ, ਜਦੋਂ ਕਿ ਤਿੰਨ ਹੋਰ ਗੰਭੀਰ ਰੂਪ ਵਿਚ ਜ਼ਖਮੀ ਹੋਏ ਹਨ। ਘਟਨਾ ਸਵੇਰੇ 6 ਵਜੇ ਦੇ ਕਰੀਬ ਵਾਪਰੀ। ਜਿਸ ਇਲਾਕੇ ਵਿਚ ਇਹ ਵਾਰਦਾਤ ਹੋਈ ਉਹ ਐਡਮਿੰਟਨ ਤੋਂ ਲਗਭਗ ਸਾਢੇ ਤਿੰਨ ਘੰਟੇ ਦੀ ਦੂਰੀ 'ਤੇ ਹੈ।
ਸਸਕੈਚਵਨ ਆਰ.ਸੀ.ਐਮ.ਪੀ. ਨੇ ਦੱਸਿਆ ਕਿ ਇਸ ਵਾਰਦਾਤ ਨੂੰ ਅੰਜਾਮ ਦੇਣ ਵਾਲੇ ਦੋ ਖਤਰਨਾਕ ਹਥਿਆਰਬੰਦ ਵਿਅਕਤੀ ਫ਼ਰਾਰ ਹਨ। ਸ਼ੱਕੀ ਹਮਲਾਵਰਾਂ ਨੂੰ ਆਖਰੀ ਵਾਰ ਬਿਗ ਆਈਲੈਂਡ ਲੇਕ ਕ੍ਰੀ ਨੇਸ਼ਨ ਦੇ ਇਲਾਕੇ ਵਿਚ ਇੱਕ ਏ.ਟੀ.ਵੀ.'ਤੇ ਸਵਾਰ ਦੇਖਿਆ ਗਿਆ ਸੀ। ਹਮਲਾਵਰਾਂ ਦੀ ਭਾਲ ਲਈ ਵੱਡੇ ਪੱਧਰ 'ਤੇ ਸਰਚ ਆਪ੍ਰੇਸ਼ਨ ਚਲਾਇਆ ਜਾ ਰਿਹਾ ਹੈ। ਪੁਲਿਸ ਨੇ ਅਜੇ ਤੱਕ ਉਹਨਾਂ ਦਾ ਕੋਈ ਵੇਰਵਾ ਜਾਂ ਹਮਲੇ ਦੇ ਕਾਰਨ ਸਾਂਝੇ ਨਹੀਂ ਕੀਤੇ।
ਜਾਂਚਕਰਤਾਵਾਂ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੀ ਪਹਿਲੀ ਤਰਜੀਹ ਇਨ੍ਹਾਂ ਦੋਵਾਂ ਹਥਿਆਰਬੰਦ ਵਿਅਕਤੀਆਂ ਨੂੰ ਜਲਦ ਤੋਂ ਜਲਦ ਕਾਬੂ ਕਰਨਾ ਹੈ। ਪੁਲਿਸ ਵਲੋਂ ਜਾਰੀ ਕੀਤੇ ਗਏ ਬਿਆਨ ਵਿਚ ਕਿਹਾ ਗਿਆ ਹੈ ਕਿ ਜਾਂਚਕਰਤਾ ਇਹ ਪਤਾ ਲਗਾਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ ਕਿ ਕੀ ਇਹ ਸ਼ੂਟਿੰਗ ਟਾਰਗੇਟਿਡ ਸੀ ਜਾਂ ਫਿਰ ਇਹ ਇੱਕ ਅਚਾਨਕ ਵਾਪਰੀ ਘਟਨਾ ਹੈ।
