ਰਾਇਨ ਵੈਡਿੰਗ ਮਾਮਲੇ ਨਾਲ ਜੁੜੇ ਓਨਟਾਰੀਓ ਦੇ ਵਕੀਲ ਨੂੰ ਹਵਾਲਗੀ ਸੁਣਵਾਈ ਤੋਂ ਪਹਿਲਾਂ ਮਿਲੀ ਜ਼ਮਾਨਤ

ਕੈਨੇਡਾ ਦੇ ਸਾਬਕਾ ਓਲਿੰਪਕ ਖਿਡਾਰੀ ਰਾਇਨ ਵੈਡਿੰਗ ਦੇ ਡਰੱਗ ਨੈੱਟਵਰਕ ਨਾਲ ਸਬੰਧਤ ਕੇਸ ਵਿਚ ਅਮਰੀਕਾ ਨੂੰ ਹਵਾਲਗੀ ਦਾ ਸਾਹਮਣਾ ਕਰ ਰਹੇ ਟੋਰੌਂਟੋ ਦੇ ਜਾਣੇ-ਪਛਾਣੇ ਕ੍ਰਿਮੀਨਲ ਵਕੀਲ ਦੀਪਕ ਪਰਾਡਕਰ ਨੂੰ ਜ਼ਮਾਨਤ ਮਿਲ ਗਈ ਹੈ। ਹਾਲਾਂਕਿ ਹਵਾਲਗੀ ਦੀ ਕਾਰਵਾਈ ਅਜੇ ਜਾਰੀ ਹੈ ਪਰ ਓਨਟਾਰੀਓ ਸੁਪੀਰੀਅਰ ਕੋਰਟ ਨੇ ਵਕੀਲ ਨੂੰ ਸ਼ਰਤਾਂ 'ਤੇ ਬੇਲ ਦਿੱਤੀ ਹੈ।

ਪਰਾਡਕਰ 'ਤੇ ਦੋਸ਼ ਹੈ ਕਿ ਉਸ ਨੇ ਵੈਡਿੰਗ ਨੂੰ ਇੱਕ ਅਹਿਮ ਸਰਕਾਰੀ ਗਵਾਹ ਦੀ ਹੱਤਿਆ ਕਰਨ ਦੀ ਸਲਾਹ ਦਿੱਤੀ ਸੀ। 62 ਸਾਲਾ ਇਸ ਵਕੀਲ ਨੇ ਇਸ ਮਹੀਨੇ ਦੇ ਸ਼ੁਰੂ ਵਿਚ ਤਿੰਨ ਦਿਨਾਂ ਜ਼ਮਾਨਤ ਸੁਣਵਾਈ ਦੌਰਾਨ ਅਦਾਲਤ ਨੂੰ ਕਿਹਾ ਸੀ ਕਿ ਉਹ ਆਪਣੀ ਅਤੇ ਆਪਣੀ ਪਤਨੀ ਤਰਫੋਂ 2.5-2.5 ਮਿਲੀਅਨ ਡਾਲਰ ਜ਼ਮਾਨਤ ਲਈ ਗਿਰਵੀ ਰੱਖਣ ਲਈ ਤਿਆਰ ਹਨ, ਜੋ ਕਿ ਉਨ੍ਹਾਂ ਦੀ ਪੂਰੀ ਸੰਪਤੀ ਹੈ। ਮੰਗਲਵਾਰ ਨੂੰ ਸੁਣਵਾਈ ਦੌਰਾਨ ਜੱਜ ਨੇ ਪਰਾਡਕਰ ਦੇ $5-ਮਿਲੀਅਨ ਦੇ ਬੇਲ ਰਿਲੀਜ਼ ਪਲੈਨ ਨੂੰ ਮਨਜ਼ੂਰੀ ਦੇ ਦਿੱਤੀ।

ਜ਼ਮਾਨਤ ਦੀਆਂ ਸ਼ਰਤਾਂ ਅਧੀਨ ਉਹ ਆਪਣਾ ਪਾਸਪੋਰਟ ਵੀ ਜਮ੍ਹਾਂ ਕਰਵਾਏਗਾ ਅਤੇ ਕਿਸੇ ਵੀ ਇਲੈਕਟ੍ਰੌਨਿਕ ਡਿਵਾਈਸ ਦੀ ਵਰਤੋਂ ਨਹੀਂ ਕਰ ਸਕਦਾ, ਨਾਲ ਹੀ ਆਪਣੀ ਪਤਨੀ ਦੀ ਸਖ਼ਤ ਨਿਗਰਾਨੀ ਹੇਠ ਹਾਊਸ ਅਰੈਸਟ ਰਹਿਣਾ ਪਵੇਗਾ, ਜੋ ਉਨ੍ਹਾਂ ਦੀ ਜ਼ਮਾਨਤ ਲਈ ਜ਼ਿੰਮੇਵਾਰ ਹੋਵੇਗੀ। ਪਰਾਡਕਰ ਨੂੰ ਅਮਰੀਕੀ ਅਧਿਕਾਰੀਆਂ ਵਲੋਂ ਹਵਾਲਗੀ ਦੀ ਮੰਗ 'ਤੇ 18 ਨਵੰਬਰ ਨੂੰ ਟੋਰੌਂਟੋਂ ਖੇਤਰ ਦੇ ਉਸ ਦੇ ਘਰੋਂ ਗ੍ਰਿਫਤਾਰ ਕੀਤਾ ਗਿਆ ਸੀ।