15.64C Vancouver 15.64C VancouverAug 27, 2024 4:56 PM - The Canadian Press
ਉੱਤਰੀ ਵੈਨਕੂਵਰ ਦੀ ਲਿਨ ਕੈਨਿਯਨ ਪਾਰਕ ਵਿਚ ਬੀਤੇ ਐਤਵਾਰ ਇਕ 17 ਸਾਲਾ ਨੌਜਵਾਨ ਦੀ ਚੱਟਾਨ ਤੋਂ ਡਿੱਗ ਕੇ ਮੌਤ ਹੋ ਜਾਣ ਦੀ ਖਬਰ ਹੈ। ਉੱਤਰੀ ਵੈਨਕੂਵਰ ਫਾਇਰ ਅਤੇ ਬਚਾਅ ਸੇਵਾਵਾਂ ਦੇ ਮੁਖੀ ਮਾਈਕ ਡੈਂਕਸ ਅਨੁਸਾਰ ਉਨ੍ਹਾਂ ਨੂੰ ਦੁਪਿਹਰ 3 ਵਜੇ ਦੇ ਕਰੀਬ ਇਸ ਘਟਨਾ ਦੀ ਸੂਚਨਾ ਮਿਲੀ ਸੀ ਜਿਸ ’ਤੇ ਫਾਇਰ ਡਿਪਾਰਟਮੈਂਟ,ਬੀ.ਸੀ. ਐਂਬੂਲੈਂਸ ਅਤੇ ਆਰ.ਸੀ.ਐੱਮ.ਪੀ. ਵਲੋਂ ਤੁਰੰਤ ਕਾਰਵਾਈ ਕੀਤੀ ਗਈ।
ਡੈਂਕਸ ਨੇ ਦੱਸਿਆ ਕਿ ਇਹ ਨੌਜਵਾਨ ਚੱਟਾਨ ਦੇ ਕਿਨਾਰੇ ਤੋਂ ਕਰੀਬ 6 ਮੀਟਰ ਦੀ ਦੂਰੀ ’ਤੇ ਸਥਿਤ ਸੁਰੱਖਿਆ ਵਾੜ ਨੂੰ ਪਾਰ ਕਰ ਗਿਆ ਸੀ ਪਰ ਫਿਸਲ ਗਿਆ ਅਤੇ ਚੱਟਾਨ ਤੋਂ ਡਿੱਗ ਗਿਆ। ਅਸਿਸਟੈਂਟ ਚੀਫ਼ ਆਫ਼ ਆਪ੍ਰੇਸ਼ਨ ਡਵੇਨ ਡਰਬਨ ਨੇ ਸੋਮਵਾਰ ਇਕ ਬਿਆਨ ਵਿਚ ਦੱਸਿਆ ਕਿ ਉਨ੍ਹਾਂ ਨੂੰ ਨੌਜਵਾਨ ਬੇਹੋਸ਼ੀ ਦੀ ਹਾਲਤ ਵਿਚ ਮਿਲਿਆ ਸੀ ਪਰ ਜਦ ਤਕ ਇਕ ਬਚਾਅ ਕਰਤਾ ਇਕ ਰੋਪ ਸਿਸਟਮ ਦੀ ਵਰਤੋਂ ਕਰਕੇ ਉਸ ਤਕ ਪਹੁੰਚਿਆ ਉਦੋਂ ਤਕ ਬਦਕਿਸਮਤੀ ਨਾਲ ਉਸਦੀ ਮੌਤ ਹੋ ਚੁੱਕੀ ਸੀ।
ਡੈਂਕਸ ਨੇ ਦੱਸਿਆ ਕਿ ਮੂਲ ਰੂਪ ਨਾਲ ਵਿੰਡਸਰ ਓਨਟਾਰੀਓ ਦਾ ਰਹਿਣ ਵਾਲਾ ਨੌਜਵਾਨ ਪੱਥਰ ਦੀ ਢਲਾਨ ਤੋਂ ਲਗਭਗ 45 ਤੋਂ 50 ਮੀਟਰ ਹੇਠਾਂ ਡਿੱਗ ਗਿਆ ਸੀ। ਜ਼ਿਕਰਯੋਗ ਹੈ ਕਿ ਅਧਿਕਾਰੀ ਕਈ ਸਾਲਾਂ ਤੋਂ ਲੋਕਾਂ ਨੂੰ ਲਿਨ ਕੈਨਿਯਨ ’ਚ ਚੱਟਾਨ ਤੋਂ ਛਾਲ ਨਾ ਮਾਰਨ ਦੀ ਅਪੀਲ ਕਰ ਰਹੇ ਹਨ ਕਿਉਂਕਿ ਪਿਛਲੇ 50 ਸਾਲਾਂ ’ਚ ਪਾਰਕ ’ਚ 40 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ।
