17.28C Vancouver 17.28C VancouverOct 17, 2025 4:23 PM - Connect Newsroom
ਪੀ.ਐਮ.ਮਾਰਕ ਕਾਰਨੀ ਨੇ ਘੋਸ਼ਣਾ ਕੀਤੀ ਹੈ ਕਿ ਆਉਣ ਵਾਲੇ ਫੈਡਰਲ ਬਜਟ ਦੇ ਹਿੱਸੇ ਵਜੋਂ ਕੈਨੇਡਾ ਸਰਕਾਰ ਬਾਰਡਰ ਸਕਿਓਰਟੀ ਅਤੇ ਪਬਲਿਕ ਸੇਫਟੀ ਵਿਚ ਵਾਧਾ ਕਰਨ ਲਈ 1,000 ਨਵੇਂ ਸੀਬੀਐਸਏ ਅਧਿਕਾਰੀਆਂ ਦੀ ਭਰਤੀ ਕਰੇਗੀ। ਇਹ ਨਵੇਂ ਅਧਿਕਾਰੀ ਚੋਰੀ ਹੋਏ ਸਮਾਨ, ਗੈਰਕਾਨੂੰਨੀ ਹਥਿਆਰਾਂ ਅਤੇ ਨਸ਼ੀਲੇ ਪਦਾਰਥਾਂ ਦੀ ਆਵਾਜਾਈ ਰੋਕਣ, ਇੰਪੋਰਟ ਨਿਯਮਾਂ ਦੀ ਪਾਲਣਾ ਯਕੀਨੀ ਬਣਾਉਣ ਅਤੇ ਅਨਫੇਅਰ ਟਰੇਡ ਪ੍ਰੈਕਿਟਸ ਦੀ ਜਾਂਚ ਕਰਨ ਲਈ ਤਾਇਨਾਤ ਕੀਤੇ ਜਾਣਗੇ।
ਸਰਕਾਰ ਕੈਨੇਡਾ ਬਾਰਡਰ ਸਰਵਿਸ ਏਜੰਸੀ ਦੇ ਅਧਿਕਾਰੀਆਂ ਦੀ ਟ੍ਰੇਨਿੰਗ ਭੱਤੇ ਨੂੰ ਵੀ 2005 ਤੋਂ ਬਾਅਦ ਪਹਿਲੀ ਵਾਰ $125 ਤੋਂ ਵਧਾ ਕੇ $525 ਪ੍ਰਤੀ ਹਫ਼ਤਾ ਕਰ ਰਹੀ ਹੈ, ਜਿਸ ਦਾ ਉਦੇਸ਼ ਅਗਲੀ ਪੀੜ੍ਹੀ ਦੇ ਉੱਚ ਸਿਖਲਾਈ ਪ੍ਰਾਪਤ ਸਰਹੱਦੀ ਅਧਿਕਾਰੀਆਂ ਨੂੰ ਭਰਤੀ ਲਈ ਆਕਰਸ਼ਤ ਕਰਨਾ ਹੈ। ਇਸ ਦੇ ਨਾਲ ਹੀ ਪਬਲਿਕ ਸਰਵਿਸ ਸੁਪਰਐਨੂਏਸ਼ਨ ਐਕਟ ਵਿਚ ਸੋਧ ਕਰਕੇ ਸੀਬੀਐਸਏ ਅਧਿਕਾਰੀਆਂ ਤੇ ਹੋਰ ਫਰੰਟਲਾਈਨ ਫਰਸਟ ਰਿਸਪੋਂਡਰ ਵਾਸਤੇ ਰਿਟਾਇਰਮੈਂਟ ਲਾਭ ਲਈ ਨਵੇਂ ਵਿਕਲਪ ਦੀ ਵਿਵਸਥਾ ਕੀਤੀ ਜਾਵੇਗੀ। ਇਹ ਸੋਧ ਉਨ੍ਹਾਂ ਦੇ ਉੱਚ ਤਣਾਅ ਅਤੇ ਉੱਚ-ਖ਼ਤਰੇ ਵਾਲੇ ਕੰਮ ਦੀ ਮਾਨਤਾ ਦੇ ਤੌਰ 'ਤੇ ਕੀਤੀ ਜਾ ਰਹੀ ਹੈ।
ਨਵੇਂ ਨਿਯਮਾਂ ਅਨੁਸਾਰ, ਅਜਿਹੇ ਕਰਮਚਾਰੀ 25 ਸਾਲ ਦੀ ਸੇਵਾ ਪੂਰੀ ਕਰਨ ਤੋਂ ਬਾਅਦ ਪੈਨਸ਼ਨ ਵਿਚ ਬਿਨਾਂ ਕਟੌਤੀ ਦੇ ਰਿਟਾਇਰ ਹੋ ਸਕਣਗੇ। ਸਰਕਾਰ ਦਾ ਕਹਿਣਾ ਹੈ ਕਿ ਇਹ ਕਦਮ ਹਵਾ, ਜ਼ਮੀਨ, ਰੇਲ ਅਤੇ ਸਮੁੰਦਰੀ ਬੰਦਰਗਾਹਾਂ 'ਤੇ ਮਨੁੱਖੀ ਤਸਕਰੀ, ਇਮੀਗ੍ਰੇਸ਼ਨ ਧੋਖਾਧੜੀ ਅਤੇ ਅੱਤਵਾਦ ਵਿਰੁੱਧ ਨਜਿੱਠਣ ਵਿਚ ਸੁਧਾਰ ਕਰੇਗਾ।
