9.98C Vancouver 9.98C VancouverJul 23, 2020 12:33 AM -
ਬੁੱਧਵਾਰ ਨੂੰ ਬੀ.ਸੀ. 'ਚ ਕੋਰੋਨਾ ਵਾਇਰਸ ਦੇ 34 ਹੋਰ ਮਾਮਲੇ ਸਾਹਮਣੇ ਆਉਣ ਦੀ ਜਾਣਕਾਰੀ ਦਿੱਤੀ ਗਈ ਹੈ। ਹਾਲਾਂਕਿ ਚੰਗੀ ਖਬਰ ਰਹੀ ਕਿ ਕਿਸੇ ਹੋਰ ਵਾਇਰਸ ਪੀੜਤ ਦੇ ਦਮ ਤੋੜਨ ਬਾਰੇ ਨਹੀਂ ਦੱਸਿਆ ਗਿਆ ਹੈ।
ਇਹ ਮਾਮਲੇ ਮੰਗਲਵਾਰ ਤੋਂ ਬੁੱਧਵਾਰ ਦੇ ਦਰਮਿਆਨ ਦੇ ਹਨ।
ਹੁਣ ਬੀ.ਸੀ. 'ਚ ਕੋਵਿਡ-19 ਦੇ ਕੁੱਲ ਮਾਮਲਿਆਂ ਦੀ ਗਿਣਤੀ 3,362 ਹੋ ਗਈ ਹੈ।
ਬੀ.ਸੀ. ਦੀ ਪ੍ਰੋਵਿੰਸ਼ੀਅਲ ਸਿਹਤ ਅਫ਼ਸਰ, ਡਾ. ਬੌਨੀ ਹੈਨਰੀ ਅਤੇ ਸਿਹਤ ਮੰਤਰੀ ਐਡਰੀਅਨ ਡਿਕਸ ਵੱਲੋਂ ਇੱਕ ਪ੍ਰੈਸ ਬ੍ਰੀਫਿੰਗ ਜ਼ਰੀਏ ਅੱਜ ਦੇ ਮਾਮਲਿਆਂ ਦੀ ਜਾਣਕਾਰੀ ਜਾਰੀ ਕੀਤੀ ਗਈ ਹੈ।
ਸੂਬੇ 'ਚ ਵਾਇਰਸ ਸੰਬੰਧੀ ਮੌਤਾਂ ਦੀ ਗਿਣਤੀ 189 ਹੈ।
ਬੀ.ਸੀ. 'ਚ 285 ਵਾਇਰਸ ਸੰਬੰਧੀ ਐਕਟਿਵ ਮਾਮਲੇ ਦੱਸੇ ਜਾ ਰਹੇ ਹਨ।
ਸੂਬੇ ਦੇ ਕੁੱਲ 2,888 ਲੋਕ ਰਿਕਵਰ ਵੀ ਕਰ ਚੁੱਕੇ ਹਨ।
ਬੀ.ਸੀ. 'ਚ ਸਿਹਤ ਅਧਿਕਾਰੀਆਂ ਨੇ ਬਾਰਜ਼ ਅਤੇ ਨਾਈਟ ਕਲੱਬਾਂ 'ਚ ਪਬੰਦੀਆਂ ਨੂੰ ਵਧਾਉਣ ਦਾ ਵੀ ਫੈਸਲਾ ਲਿਆ ਹੈ।
ਪਬੰਦੀਆਂ ਅਨੁਸਾਰ ਹੁਣ ਤੋਂ ਬਾਰਜ਼ ਦੇ ਵਿੱਚ ਸੈਲਫ-ਸਰਵਿਸ ਦੀ ਇਜਾਜ਼ਤ ਨਹੀਂ ਹੋਵੇਗੀ, ਅਤੇ ਨੱਚਣ ਦੀ ਵੀ ਮਨਾਹੀ ਹੋ ਗਈ ਹੈ।
ਕਿਸੇ ਵੀ ਬਾਰ 'ਚ ਸਾਰੇ ਲੋਕਾਂ ਨੂੰ ਆਪਣੀ ਦੱਸੀ ਗਈ ਸੀਟ 'ਤੇ ਬੈਠਣ ਦੀ ਲੋੜ ਹੋਵੇਗੀ।
ਡਾ. ਬੌਨੀ ਹੈਨਰੀ ਨੇ ਅੱਜ ਜ਼ੋਰ ਦਿੱਤਾ ਕਿ ਵਧਦੇ ਮਾਮਲੇ ਸੂਬੇ ਦੇ ਲੋਕਾਂ ਲਈ ਅੱਖਾਂ ਖੋਲ੍ਹਣ ਦੀ ਲੋੜ ਜ਼ਾਹਿਰ ਕਰਦੇ ਹਨ, ਅਤੇ ਲੋਕਾਂ ਨੂੰ ਵਧੇਰੇ ਸਾਵਧਾਨੀ ਵਰਤਣ ਦੀ ਲੋੜ ਹੈ।
ਡਾ. ਬੌਨੀ ਹੈਨਰੀ ਨੇ ਦੱਸਿਆ ਕਿ ਕੈਲੋਨਾ 'ਚ ਦਰਜ ਕੀਤੀ ਗਈ ਆਊਟਬ੍ਰੇਕ ਦੇ ਕਾਰਨ, ਪੀੜਤ ਲੋਕਾਂ ਦੇ ਸੰਪਰਕ 'ਚ ਆਏ ਕਰੀਬ 1,000 ਲੋਕਾਂ ਨੂੰ ਖੁਦ ਨੂੰ ਇਕੱਲੇ 'ਚ ਰੱਖਣ ਲਈ ਕਿਹਾ ਗਿਆ ਹੈ।
ਸਿਹਤ ਅਧਿਕਾਰੀਆਂ ਨੇ ਦੱਸਿਆ ਕਿ ਕੈਲੋਨਾ 'ਚ ਸਾਹਮਣੇ ਆਏ ਆਊਟਬ੍ਰੇਕ ਨਾਲ ਸੰਬੰਧਤ ਕਈ ਮਾਮਲੇ ਸੂਬੇ ਦੇ ਹੋਰ ਇਲਾਕਿਆਂ ਤੱਕ ਵੀ ਪਹੁੰਚੇ ਸਨ, ਅਤੇ ਇਹ ਮਾਮਲੇ ਨਿੱਜੀ ਪਾਰਟੀਆਂ ਤੋਂ ਸ਼ੁਰੂ ਹੋਏ ਸਨ।
