11.25C Vancouver 11.25C VancouverDec 4, 2020 4:43 PM -
ਕੈਨੇਡਾ ਵਿਚ ਜਿੱਥੇ ਅਕਤੂਬਰ ਵਿਚ 84,000 ਨਵੀਂਆਂ ਨੌਕਰੀਆਂ ਦੇਖਣ ਨੂੰ ਮਿਲੀਆਂ, ਉਥੇ ਹੀ ਨਵੰਬਰ ਵਿਚ ਵਾਧਾ ਦਰ ਘੱਟਦੀ ਨਜ਼ਰ ਆਈ ਅਤੇ 62,000 ਨਵੀਂਆਂ ਨੌਕਰੀਆਂ ਆਰਥਿਕਤਾ ਵਿੱਚ ਸ਼ਾਮਲ ਕੀਤੀਆਂ ਗਈਆਂ ਸਨ।
ਸ਼ੁੱਕਰਵਾਰ ਨੂੰ ਜਾਰੀ ਕੀਤੀ ਗਈ ਸਟੈਟਿਸਟਿਕਸ ਕੈਨੇਡਾ ਦੀ ਰਿਪੋਰਟ ਮੁਤਾਬਕ ਪਾਰਟ-ਟਾਈਮ ਨੌਕਰੀਆਂ ਵਿੱਚ ਗਿਰਾਵਟ ਦੇਖਣ ਨੂੰ ਮਿਲੀ ਅਤੇ 99,000 ਫੁੱਲ-ਟਾਈਮ ਅਤੇ 37,000 ਪਾਰਟ-ਟਾਈਮ ਨੌਕਰੀਆਂ ਸ਼ਾਮਲ ਕੀਤੀਆਂ ਗਈਆਂ ਸਨ।
ਫਾਈਨੈਂਸ਼ਲ ਡਾਟਾ ਫਰਮ ‘ਰਿਫੀਨਿਟਿਵ’ ਮੁਤਾਬਕ ਅਰਥ ਸ਼ਾਸਤਰੀਆਂ ਦਾ ਅਨੁਮਾਨ 20,000 ਨੌਕਰੀਆਂ ਅਤੇ ਬੇਰੁਜ਼ਗਾਰੀ ਦੀ ਦਰ ਵਿਚ ਕੋਈ ਵੀ ਤਬਦੀਲੀ ਨਹੀਂ ਆਉਣ ਦਾ ਸੀ।
ਮਾਰਚ ਅਤੇ ਅਪ੍ਰੈਲ ਵਿਚ ਲੌਕਡਾਊਨ ਕਾਰਨ ਤਕਰੀਬਨ ਤਿੰਨ ਲੱਖ ਨੌਕਰੀਆਂ ਖ਼ਤਮ ਕੀਤੀਆਂ ਗਈਆਂ ਸਨ ਜਿਸ ਕਾਰਨ ਮਈ ਵਿੱਚ ਬੇਰੁਜ਼ਗਾਰੀ ਦੀ ਦਰ 13.7 ਫੀਸਦੀ ਹੋ ਗਈ ਸੀ ਅਤੇ ਨਵੰਬਰ ਵਿੱਚ ਹੋਏ ਵਾਧੇ ਨਾਲ ਹੁਣ ਉਸ ਕਮੀ ਨੂੰ ਪੂਰਾ ਕਰਨ ਲਈ 574,000 ਨੌਕਰੀਆਂ ਦੀ ਘਾਟ ਰਹਿ ਗਈ ਹੈ।
ਜਿੱਥੇ ਅਕਤੂਬਰ ਵਿੱਚ ਬੇਰੁਜ਼ਗਾਰੀ ਦੀ ਦਰ 8.9 ਫ਼ੀਸਦੀ ਸੀ ਉਥੇ ਹੀ ਨਵੰਬਰ ਵਿੱਚ 8.5 ਫ਼ੀਸਦੀ ਰਹੀ।
ਸਟੈਟਿਸਟਿਕਸ ਕੈਨੇਡਾ ਮੁਤਾਬਕ ਜੇ ਇਸ ਵਿੱਚ ਉਨ੍ਹਾਂ ਬੇਰੁਜ਼ਗਾਰ ਕਨੇਡੀਅਨ ਲੋਕਾਂ ਦੀ ਗਿਣਤੀ ਕੀਤੀ ਜਾਂਦੀ ਜਿਨ੍ਹਾਂ ਕੋਲ ਨੌਕਰੀਆਂ ਨਹੀਂ ਹਨ ਪਰ ਜਿਨ੍ਹਾਂ ਨੇ ਪਿਛਲੇ ਮਹੀਨੇ ਕੰਮ ਦੀ ਭਾਲ ਨਹੀਂ ਕੀਤੀ ਤਾਂ ਬੇਰੁਜ਼ਗਾਰੀ ਦੀ ਦਰ 10.9 ਫ਼ੀਸਦੀ ਹੋਣੀ ਸੀ।
