ਅਮਰੀਕੀ ਡਾਲਰ ਦੇ ਮੁਕਾਬਲੇ ਪਾਕਿਸਤਾਨੀ ਰੁਪਿਆ ਹੁਣ ਤੱਕ ਦੇ ਸਭ ਤੋਂ ਹੇਠਲੇ ਪੱਧਰ 'ਤੇ ਡਿੱਗਾ

ਪਾਕਿਸਤਾਨੀ ਕਰੰਸੀ ਬੁੱਧਵਾਰ ਨੂੰ ਹੁਣ ਤੱਕ ਦੇ ਸਭ ਤੋਂ ਹੇਠਲੇ ਪੱਧਰ 'ਤੇ ਡਿੱਗ ਗਈ। ਇਸਲਾਮਾਬਾਦ ਦੇ ਇਤਿਹਾਸ ਵਿਚ ਪਹਿਲੀ ਵਾਰ ਅਮਰੀਕੀ ਡਾਲਰ ਖੁੱਲ੍ਹੇ ਬਾਜ਼ਾਰ ਵਿਚ ਪਾਕਿਸਤਾਨੀ ਕਰੰਸੀ ਦੇ ਮੁਕਾਬਲੇ 200 ਰੁਪਏ ਦੇ ਬੈਂਚਮਾਰਕ ਤੋਂ ਪਾਰ ਚਲਾ ਗਿਆ।

ਖੁੱਲ੍ਹੇ ਬਾਜ਼ਾਰ ਵਿਚ ਅਮਰੀਕੀ ਕਰੰਸੀ 200.50 ਰੁਪਏ 'ਤੇ ਪਹੁੰਚ ਗਈ। ਇਸ ਦੌਰਾਨ ਇੰਟਰਬੈਂਕ ਵਿਚ ਡਾਲਰ ਦਾ ਮੁੱਲ 198.39 ਪਾਕਿਸਤਾਨੀ ਰੁਪਏ ਤੱਕ ਜਾ ਪੁੱਜਾ, ਜੋ ਮੰਗਲਵਾਰ 195.74 ਦੇ ਪੱਧਰ 'ਤੇ ਰਿਹਾ ਸੀ।

ਵਿਦੇਸ਼ੀ ਭੰਡਾਰ ਵਿਚ ਆ ਰਹੀ ਕਮੀ ਤੇ ਵਟਾਂਦਰਾ ਦਰ ਨੂੰ ਸਮਰਥਨ ਮਿਲਣ ਵਿਚ ਉਮੀਦ ਤੋਂ ਵੱਧ ਸਮਾਂ ਲੱਗਣ ਦੇ ਮੱਦੇਨਜ਼ਰ ਪਾਕਿਸਤਾਨ ਦੇ ਪ੍ਰਧਾਨ ਮੰਤਰੀ ਸ਼ਾਹਬਾਜ਼ ਸ਼ਰੀਫ ਨੇ ਪਾਕਿਸਤਾਨੀ ਰੁਪਏ ਵਿਚ ਤੇਜ਼ ਗਿਰਾਵਟ ਨੂੰ ਰੋਕਣ ਲਈ ਸੋਮਵਾਰ ਐਕਸਚੇਂਜ ਕੰਪਨੀਜ਼ ਐਸੋਸੀਏਸ਼ਨ ਆਫ ਪਾਕਿਸਤਾਨ (ਈ. ਸੀ. ਏ. ਪੀ.) ਨਾਲ ਮੀਟਿੰਗ ਵੀ ਕੀਤੀ ਸੀ।

'ਡਾਨ' ਦੀ ਇਕ ਰਿਪੋਰਟ ਵਿਚ ਕਿਹਾ ਗਿਆ ਹੈ ਕਿ ਪੀ. ਐੱਮ. ਐੱਲ.-ਐੱਨ ਦੀ ਅਗਵਾਈ ਵਾਲੀ ਗਠਜੋੜ ਸਰਕਾਰ ਨੇ 11 ਅਪ੍ਰੈਲ ਨੂੰ ਜਦੋਂ ਸੱਤਾ ਸੰਭਾਲੀ ਸੀ ਉਸ ਸਮੇਂ ਡਾਲਰ 182.3 ਪਾਕਿਸਤਾਨੀ ਰੁਪਏ ਸੀ ਅਤੇ ਉਦੋਂ ਤੋਂ ਹੁਣ ਤੱਕ ਇਹ 11.4 ਰੁਪਏ ਯਾਨੀ 6.2 ਫੀਸਦੀ ਟੁੱਟ ਚੁੱਕਾ ਹੈ।