20.68C Vancouver 20.68C VancouverJan 30, 2024 2:38 PM - The Associated Press
ਪਾਕਿਸਤਾਨ ਦੇ ਰਾਵਲਪਿੰਡੀ ਦੀ ਵਿਸ਼ੇਸ਼ ਅਦਾਲਤ ਨੇ ਸਾਬਕਾ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਅਤੇ ਪਾਕਿਸਤਾਨ ਤਹਿਰੀਕ-ਏ-ਇਨਸਾਫ਼ ਦੇ ਫਾਊਂਡਰ ਤੇ ਸਾਬਕਾ ਵਿਦੇਸ਼ ਮੰਤਰੀ ਸ਼ਾਹ ਮਹਿਮੂਦ ਕੁਰੈਸ਼ੀ ਨੂੰ ਅਧਿਕਾਰਤ ਭੇਦ ਜਨਤਕ ਕਰਨ ਦੇ ਦੋਸ਼ ਵਿਚ 10-10 ਸਾਲ ਦੀ ਸਜ਼ਾ ਸੁਣਾਈ ਹੈ।
ਇਮਰਾਨ ਖਾਨ ਲਈ ਇਹ ਦੂਜਾ ਝਟਕਾ ਹੈ, ਮੌਜੂਦਾ ਸਮੇਂ ਉਹ ਭ੍ਰਿਸ਼ਟਾਚਾਰ ਦੇ ਇੱਕ ਕੇਸ ਵਿੱਚ ਤਿੰਨ ਸਾਲ ਦੀ ਸਜ਼ਾ ਕੱਟ ਰਹੇ ਹਨ। ਖਾਨ ਦੀ ਕਾਨੂੰਨੀ ਟੀਮ ਬੁੱਧਵਾਰ ਨੂੰ ਇਸਲਾਮਾਬਾਦ ਹਾਈ ਕੋਰਟ ਵਿਚ ਇਸ ਖਿਲਾਫ ਅਪੀਲ ਕਰੇਗੀ। ਇਹ ਫੈਸਲਾ ਉਸ ਸਮੇਂ ਆਇਆ ਹੈ ਜਦੋਂ ਪਾਕਿਸਤਾਨ ਵਿਚ 8 ਫਰਵਰੀ ਨੂੰ ਇਲੈਕਸ਼ਨ ਹਨ।
ਹਾਲਾਂਕਿ ਇਮਰਾਨ ਖਾਨ ’ਤੇ ਉਨ੍ਹਾਂ ਦੀ ਪਿਛਲੀ ਅਪਰਾਧਿਕ ਸਜ਼ਾ ਕਾਰਨ ਇਲੈਕਸ਼ਨ ਲੜਨ ’ਤੇ ਰੋਕ ਹੈ। ਗੌਰਤਲਬ ਹੈ ਕਿ ਅਪ੍ਰੈਲ 2022 ਵਿਚ ਸਰਕਾਰ ਡਿੱਗਣ ਮਗਰੋਂ ਇਮਰਾਨ ਵਲੋਂ ਲਗਾਤਾਰ ਦਾਅਵਾ ਕੀਤਾ ਗਿਆ ਕਿ ਉਨ੍ਹਾਂ ਦੀ ਸਰਕਾਰ ਡੇਗਣ ਲਈ ਅਮਰੀਕਾ ਅਤੇ ਉਸ ਸਮੇਂ ਦੇ ਆਰਮੀ ਚੀਫ ਜਨਰਲ ਕਮਰ ਜਾਵੇਦ ਨੇ ਸਾਜ਼ਿਸ਼ ਰਚੀ ਸੀ।
ਖਾਨ ਦਾ ਦੋਸ਼ ਸੀ ਕਿ ਇਸ ਸਾਜ਼ਿਸ਼ ਦੀ ਜਾਣਕਾਰੀ ਉਨ੍ਹਾਂ ਨੂੰ ਅਮਰੀਕਾ ਵਿਚ ਉਸ ਸਮੇਂ ਪਾਕਿਸਤਾਨ ਦੇ ਰਾਜਦੂਤ ਨੇ ਸੀਕ੍ਰੇਟ ਲੈਟਰ ਜ਼ਰੀਏ ਦਿੱਤੀ ਸੀ। ਇਸੇ ਲੈਟਰ ਨੂੰ ਲੈ ਕੇ ਇਮਰਾਨ ਖਾਨ ਕਈ ਰੈਲੀਆਂ ਵਿਚ ਦਿਖਾਉਂਦੇ ਨਜ਼ਰ ਆਏ, ਜਦੋਂ ਕਿ ਕਾਨੂੰਨੀ ਤੌਰ ’ਤੇ ਇਹ ਲੈਟਰ ਇੱਕ ਨੈਸ਼ਨਲ ਸੀਕ੍ਰੇਟ ਸੀ ਜਿਸ ਨੂੰ ਜਨਤਕ ਜਗ੍ਹਾ ’ਤੇ ਦਿਖਾਇਆ ਨਹੀਂ ਜਾ ਸਕਦਾ ਸੀ।
