ਗਾਜ਼ਾ ’ਚ ਇਜ਼ਰਾਇਲੀ ਹਮਲੇ ਦੌਰਾਨ ਮਾਰੇ ਗਏ ਕਈ ਲੋਕ, ਅੱਧੇ ਤੋਂ ਵੱਧ ਬੱਚੇ ਅਤੇ ਔਰਤਾਂ ਸ਼ਾਮਲ

ਗਾਜ਼ਾ ਦੇ ਸ਼ਹਿਰ ਬੀਤ ਲਹੀਆ ਵਿਚ ਇੱਕ ਭੀੜ-ਭੜਕੇ ਵਾਲੀ ਅਪਾਰਟਮੈਂਟ ਬਿਲਡਿੰਗ ’ਤੇ ਇਜ਼ਰਾਇਲੀ ਹਵਾਈ ਹਮਲੇ ਵਿਚ ਕਈ ਮਹਿਲਾਵਾਂ ਅਤੇ ਬੱਚੇ ਮਾਰੇ ਗਏ ਹਨ। ਰਿਪੋਰਟ ਮੁਤਾਬਕ, ਹਮਲਾ 5 ਮੰਜ਼ਲਾ ਰਿਹਾਇਸ਼ੀ ਬਿਲਡਿੰਗ ’ਤੇ ਹੋਇਆ। ਗਾਜ਼ਾ ਦੀ ਸਿਵਲ ਡਿਫੈਂਸ ਏਜੰਸੀ ਨੇ ਕਿਹਾ ਕਿ 93 ਲੋਕ ਮਾਰੇ ਗਏ ਹਨ ਅਤੇ 40 ਅਜੇ ਵੀ ਲਾਪਤਾ ਹਨ। ਇਜ਼ਰਾਈਲੀ ਫੌਜ ਪਿਛਲੇ ਦੋ ਹਫ਼ਤਿਆਂ ਤੋਂ ਉੱਤਰੀ ਗਾਜ਼ਾ ਵਿਚ ਖਾਸ ਤੌਰ ’ਤੇ ਜਬਲੀਆ, ਬੇਤ ਲਹੀਆ ਅਤੇ ਬੀਤ ਹਾਨੂਨ ਵਿਚ ਓਪਰੇਸ਼ਨ ਚਲਾ ਰਹੀ ਹੈ।

ਜਬਲੀਆ ਦੇ ਨਜ਼ਦੀਕੀ ਹਸਪਤਾਲ ਦਾ ਕਹਿਣਾ ਹੈ ਕਿ ਉਹ ਸਟਾਫ ਅਤੇ ਦਵਾਈਆਂ ਦੀ ਘਾਟ ਕਾਰਨ ਮਰੀਜ਼ਾਂ ਦੇ ਇਲਾਜ ਲਈ ਸੰਘਰਸ਼ ਕਰ ਰਿਹਾ ਹੈ। ਹਸਪਤਾਲ ਮੁਤਾਬਕ, ਉਸ ਕੋਲ ਪਹਿਲੀ ਸਹਾਇਤਾ ਸਮੱਗਰੀ ਤੋਂ ਇਲਾਵਾ ਕੁਝ ਵੀ ਨਹੀਂ ਬਚਿਆ ਹੈ।

ਇਜ਼ਰਾਇਲੀ ਫੌਜ ਨੇ ਮੰਗਲਵਾਰ ਨੂੰ ਬਿਆਨ ਵਿਚ ਕਿਹਾ ਕਿ ਉਸ ਨੇ ਪਿਛਲੇ 24 ਘੰਟਿਆਂ ਵਿਚ ਜਬਲੀਆ ਅਤੇ ਸੈਂਟਰਲ ਗਾਜ਼ਾ ਵਿਚ 40 ਅੱਤਵਾਦੀ ਮਾਰੇ ਹਨ। ਫੌਜ ਨੇ ਕਿਹਾ ਕਿ ਕੁਝ ਹਥਿਆਰਬੰਦ ਸਮੂਹ ਜਾਣਬੁੱਝ ਕੇ ਆਮ ਲੋਕਾਂ ਵਿਚ ਪਨਾਹ ਲੈ ਰਹੇ ਹਨ ਜਿਸ ਨੂੰ ਬਰਦਾਸ਼ਤ ਨਹੀਂ ਕੀਤਾ ਜਾ ਸਕਦਾ।