ਕੈਨੇਡੀਅਨ ਸੰਸਦ ਨੇ ਇੱਕ ਵਾਰ ਦੇ ਜੀ.ਐੱਸ.ਟੀ. ਕ੍ਰੈਡਿਟ ਟਾਪ-ਅੱਪ ਨੂੰ ਦਿੱਤੀ ਮਨਜ਼ੂਰੀ

ਪੀ.ਐਮ.ਮਾਰਕ ਕਾਰਨੀ ਸਰਕਾਰ ਦੇ ਕੈਨੇਡਾ ਗ੍ਰੋਸਰੀ ਐਂਡ ਐਸੈਂਸ਼ਲਜ਼ ਬੈਨੀਫਿਟ ਐਕਟ ਨੂੰ ਰੌਇਲ ਅਸੈਂਟ ਮਿਲ ਗਈ ਹੈ, ਜਿਸ ਨਾਲ $40,000 ਤੱਕ ਦੀ ਕੁੱਲ ਆਮਦਨ ਵਾਲੇ ਲਗਭਗ 12 ਮਿਲੀਅਨ ਪਰਿਵਾਰਾਂ ਨੂੰ ਇਸ ਸਪਰਿੰਗ ਵਿਚ ਜੀ.ਐੱਸ.ਟੀ. ਕ੍ਰੈਡਿਟ ਦੀ ਇੱਕ ਵਾਧੂ ਪੇਮੈਂਟ ਵੀ ਮਿਲੇਗੀ। ​ਇਹ ਨਵਾਂ ਪ੍ਰੋਗਰਾਮ ਪੁਰਾਣੇ ਕੁਲ ਆਮਦਨ ਦਾ ਹੀ ਨਵਾਂ ਰੂਪ ਹੈ।

ਇਸ ਬੈਨੀਫਿਟ ਦੀ ਸਾਲਾਨਾ ਮੂਲ ਰਕਮ ਵਿਚ ਪੰਜ ਸਾਲਾਂ ਲਈ 25 ਫੀਸਦੀ ਦਾ ਵਾਧਾ ਕੀਤਾ ਗਿਆ ਹੈ ਅਤੇ ਲਾਭਪਾਤਰੀਆਂ ਨੂੰ ਮੂਲ ਰਕਮ ਦੇ 50 ਫੀਸਦੀ ਬਰਾਬਰ ਇੱਕ ਵਾਰ ਲਈ ਵਾਧੂ ਰਾਸ਼ੀ ਦਿੱਤੀ ਜਾਵੇਗੀ। ਇਹ ਪੈਸੇ ਜੁਲਾਈ 2026 ਤੋਂ ਖਾਤੇ ਵਿਚ ਆਉਣੇ ਸ਼ੁਰੂ ਹੋ ਜਾਣਗੇ।

ਸਰਕਾਰ ਦਾ ਕਹਿਣਾ ਹੈ ਕਿ ਵਨ-ਟਾਈਮ ਟੌਪ ਅੱਪ ਪੇਮੈਂਟ ਨੂੰ ਜਿੰਨੀ ਜਲਦ ਹੋ ਸਕੇ ਇਸ ਸਪਰਿੰਗ ਵਿਚ ਜਾਰੀ ਕਰ ਦਿੱਤਾ ਜਾਵੇਗਾ। ਦੋ ਬੱਚਿਆਂ ਸਮੇਤ 4 ਮੈਂਬਰਾਂ ਵਾਲੇ ਪਰਿਵਾਰ ਨੂੰ ਇਸ ਸਾਲ ਕੁੱਲ $1,890 ਮਿਲਣਗੇ, ਜਿਸ ਵਿਚ $533 ਵਨ ਟਾਈਮ ਟੌਪ-ਅੱਪ ਅਤੇ $272 ਦਾ ਨਵਾਂ ਵਾਧਾ ਸ਼ਾਮਲ ਹਨ।

ਸਿੰਗਲ ਪਰਸਨ ਨੂੰ ਇਸ ਸਾਲ $950 ਮਿਲਣਗੇ, ਜਿਸ ਵਿਚ ਉਹਨਾਂ ਨੂੰ $267 ਵਨ ਟਾਈਮ ਟੌਪ-ਅੱਪ ਦੇ ਰੂਪ ਵਿਚ ਪ੍ਰਾਪਤ ਹੋਣਗੇ। ਇਸ ਲਾਭ ਨੂੰ ਲੈਣ ਲਈ ਕਿਸੇ ਵੱਖਰੇ ਫਾਰਮ ਭਰਨ ਦੀ ਲੋੜ ਨਹੀਂ ਹੈ। ਜੇਕਰ ਤੁਸੀਂ ਟੈਕਸ ਰਿਟਰਨ ਭਰੀ ਹੋਈ ਹੈ ਤਾਂ ਇਹ ਪੈਸੇ ਆਪਣੇ ਆਪ ਤੁਹਾਡੇ ਖਾਤੇ ਵਿਚ ਆ ਜਾਣਗੇ।